မိတ္ထီလာတွင် တရုတ်နိုင်ငံသား ၁ ဦးကို လဝကဥပဒေဖြင့် အမှုဖွင့်အရေးယူ
992
မန္တလေးတိုင်း၊ မိတ္ထီလာမြို့၊ ပြည်သာယာ ၃ လမ်းထိပ်မှာ ကိုဗစ်-၁၉ ရောဂါ ကာကွယ်ထိန်းချုပ်ဖို့ ထုတ်ပြန်ထားတဲ့ ညမထွက်ရအမိန့်ကို ဖောက်ဖျက်ကျူးလွန်ခဲ့သူ ၃ ဦးကို သက်ဆိုင်ရာက အရေးယူခဲ့ပါတယ်။
အရေးယူခံရတဲ့ ၃ ဦးအနက် တစ်ဦးဟာ အသက် ၂၈ နှစ်အရွယ် တရုတ်နိုင်ငံသား လျိုရှင်(ခ)လျိုထိုက်ဟုန် ဖြစ်ပြီး ဝမ်းတွင်းမြို့နယ် ကျောင်းကုန်းရွာမှာ ခွင့်ပြုချက်မဲ့ ၅ လကျော်နေထိုင်ခဲ့တာကြောင့် လဝကဥပဒေနဲ့ ဇွန်လ ၁၅ ရက်မှာ အမှုဖွင့်လိုက်တာလို့ မိတ္ထီလာအမှတ်(၃)ရဲစခန်းက ပြောပါတယ်။
စခန်းမှူး ရဲအုပ်ဝင်းမြင့်ဦးက "ဒုလဝကမှူးတစ်ဦးက တရားလိုလုပ်ပြီး အမှုလာဖွင့်တယ်။ လဝကဥပဒေနဲ့ပါ မလှိုင်နယ်ဘက်မှာ စိုက်ပျိုးရေးလုပ်မလို့ ရောက်နေတာ စိုက်တော့ မစိုက်ရသေးဘူး။ ရေတွင်းတူးနေတာလို့ သိရတယ်"လို့ ပြောပါတယ်။
မိတ္ထီလာမြို့နယ်ဘက်မှာ တရုတ်နိုင်ငံသားတွေက လာရောက်ပြီး မြေငှားက စိုက်ပျိုးရေးလုပ်ငန်းတွေ လာရောက် လုပ်ကိုင်ကြတာဖြစ်ပါတယ်။
ဒေသခံကိုမျိုးဦးက " နယ်တွေဘက်မှာ တရုတ်တွေ မြေငှားပြီး စိုက်ပျိုးရေး လာလုပ်ကြတယ်။ နယ်ခံတွေကလည်း မြေငှားခရကြတယ်။ သူတို့ဆီက နည်းပညာယူပြီး နယ်ခံတွေ စိုက်ပျိုးစားကြရင် မြေငှားခထက် ပိုရမှာပါ" လို့ ပြောပါတယ်။
မိတ္ထီလာအမှတ်(၃)ရဲစခန်းမှာ တရုတ်နိုင်ငံသားလျိုရှင်(ခ)လျိုထိုက်ဟုန်ကို နိုင်ငံအတွင်း ခွင်ပြုချက်မဲ့နေထိုင်မှု လဝကအက်ဥပဒေ ၁၃(၁)ဖြင့် အမှုဖွင့်ထားပါတယ်။
သတင်း-မောင်မောင်လင်း
