စစ်ကိုင်းမြို့က အိန္ဒိယပြန် ၂ ဦးတွင် ကိုဗစ်-၁၉ ရောဂါတွေ့ရှိ 

စစ်ကိုင်းတိုင်းဒေသကြီးမှာနေထိုင်တဲ့ အိန္ဒိယနိုင်ငံက ပြန်လာသူ ၂ ဦးမှာ ကိုဗစ်-၁၉ ရောဂါ စစ်ဆေးတွေ့ရှိရပြီး မြန်မာနိုင်ငံမှာ အတည်ပြုလူနာ စုစုပေါင်း ၂၃၆ ဦးရှိသွားပြီလို့ ကျန်းမာရေးနဲ့ အားကစားဝန်ကြီးဌာနက ဒီကနေ့ ည ၈ နာရီမှာ ထုတ်ပြန်ပါတယ်။

အဆိုပါ လူနာသစ် ၂ ဦးဟာ စစ်ကိုင်းမြို့မှာနေထိုင်တဲ့ အသက် ၃၀ အရွယ်အမျိုးသားတစ်ဦးနဲ့ အသက် ၃၂ နှစ်အရွယ် အမျိုးသားတစ်ဦးတို့ဖြစ်ကြပြီး နှစ်ဦးစလုံးဟာ အိန္ဒိယနိုင်ငံကပြန်လာပြီးနောက် အသွားအလာကန့်သတ်စောင့်ကြပ်ခံထားရသူတွေဖြစ်ပါတယ်။

ဆေးသုတေသနဦးစီးဌာန (DMR)မှ ဓာတ်ခွဲနမူနာ ၁၀၇ ခု၊ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမအသုတ်) ဓာတ်ခွဲ နမူနာ ၇၄၂ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) (PHL – Mdy) မှ ဓာတ်ခွဲနမူနာ ၂၄၄ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) (PHL – Mlm) မှ ဓာတ်ခွဲနမူနာ ၉၃ ခု စုစု ပေါင်း ၁,၁၈၆ ခုကို ဒီကနေ့ ညနေ စစ်ဆေးပြီးစီးခဲ့ရာ လူနာသစ် နှစ်ဦးတွေ့ရှိခဲ့တာပါ။

ဇွန်လ ၄ ရက်  ည ၈ နာရီအထိ မြန်မာနိုင်ငံမှာ ကိုဗစ်-၁၉ အတည်ပြုလူနာပေါင်း  ၂၃၆ ဦး၊ သေဆုံးသူ ၆ ဦးရှိပါတယ်။ လတ်တလော နှစ်ကြိမ် ဆက်တိုက် ပိုးမတွေ့ရှိသူ ၃ ဦး (Case- 194၊ 195နှင့်196) အပါအဝင် ရောဂါပိုးကင်းစင်လာသူ စုစုပေါင်း ၁၄၈ ဦးရှိပြီး ဒီအထဲက ၁၃၄ ဦး ဆေးရုံက ဆင်းခွင့်ပြုလိုက်ပြီလို့ ကျန်းမာရေးဌာန ထုတ်ပြန်ချက်အရ သိရပါတယ်။

PHOTO-MOHS