Homeမြန်မာသတင်း
လပွတ္တာမြို့နယ်၌ မီးလောင်မှုဖြစ်ပွား၊ နေအိမ် ၆ လုံးဆုံးရှုံးကာ လူ ၃၀ ကျော် မီးဘေးသင့်
လပွတ္တာမြို့နယ်၌ မီးလောင်မှုဖြစ်ပွား၊ နေအိမ် ၆ လုံးဆုံးရှုံးကာ လူ ၃၀ ကျော် မီးဘေးသင့်
DVB
·
May 27, 2020
ဧရာဝတီတိုင်း၊ လပွတ္တာမြို့နယ်၊ ဆားကျင်းကျေးရွာအုပ်စု၊ ရေဆိုင်ကုန်းကျေးရွာမှာ မေလ ၂၇ ရက်နေ့ မနက်အစောပိုင်းက မီးလောင်ကျွမ်းခဲ့မှုကြောင့် လူနေအိမ် ၅ လုံး မီးလောင်ဆုံးရှုံးကာ လူဦးရေ ၃၄ ဦး မီးဘေးသင့်ခဲ့တယ်လို့ ခရိုင်မီးသတ်ဦးစီးဌာနက သိရပါတယ်။
ရေဆိုင်ကုန်းကျေးရွာနေ အသက် ၃၂ နှစ်အရွယ် ဦးအောင်ကျော်မင်းရဲ့ နေအိမ် မီးဖိုချောင်းကနေ စတင်လောင်ကျွမ်းခဲ့တာဖြစ်ပါတယ်။
မီးလောင်တဲ့နေရာကို မီးသတ်တပ်ဖွဲ့ဝင် ၂၀ ဦးနဲ့ အရန်မီးသတ် တပ်ဖွဲ့ဝင် ၅၀ ဦးသွားရောက်မီးငြိမ်းသတ်ခဲ့ရတယ်လို့ လပွတ္တာခရိုင်မီးသတ်ဦးစီးမှူး ဦးကျော်မျိုးမြင့်က ဒီဗွီဘီကို ပြောပါတယ်။
"မီးလောင်မှုကြောင့် နေအိမ် ၆ လုံးတော့ ပျက်စီးဆုံးရှုံးသွားတယ်၊ လူထိခိုက်ဒဏ်ရာရတာမျိုးတော့မရှိဘူး။ မီးစလောင်တဲ့ နေအိမ်ပိုင်ရှင်ကိုတော့ ဥပဒေအတိုင်း အမှုဖွင့်အရေးယူထားပါတယ်"လို့ ပြောပါတယ်။
မီးလောင်ကျွမ်းခဲ့မှုကြောင့် နေအိမ် ၆ လုံးပျက်စီးခဲ့ရာ အိမ်ထောင်စု ၆ စုက မိသားစုဝင် အမျိုးသား ၉ ဦး အမျိုးသမီး ၁၂ ဦးနဲ့ ၁၈ နှစ်အောက်အရွယ် ၁၃ ဦး ပါဝင်ကာ စုစုပေါင်း ၃၄ ဦး မီးဘေးသင့်ခဲ့ပါတယ်။
မီးစတင်လောင်ကျွမ်းခဲ့တဲ့ နေအိမ်ပိုင်ရှင် ဦးအောင်ကျော်မင်းကို လပွတ္တာမြို့မရဲစခန်းမှာ (ပ) ၁၆၄/၂၀၂၀၊ ရာဇသတ်ကြီးပုဒ်မ ၂၈၅ (မီးပေါ့ဆမှု) နဲ့ အမှုဖွင့်အရေးယူထားတယ်လို့ ရဲတပ်ဖွဲ့ က သိရပါတယ်။
သတင်း- မင်းထက်မုန်း (ပုသိမ်)