ဧရာဝတီတိုင်းလွှတ်တော်အစည်းအဝေးကို ဧရာရွှေဝါခန်းမတွင် ရွေ့ပြောင်းကျင်းပမည်
DVB
·
May 26, 2020
ဧရာဝတီတိုင်းဒေသကြီးလွှတ်တော် ၂၃ ကြိမ်မြောက်ပုံမှန်အစည်းအဝေးကို ဇွန်လ ၄ ရက်နေ့ ပြန်လည်ကျင်းပဖို့ လွှတ်တော်ကိုယ်စားလှယ်တွေကို ခေါ်ယူထားပြီး အစည်းအဝေးနေရာကိုတော့ ဧရာရွှေဝါခန်းမမှာ ကျင်းပမယ်လို့ ဧရာဝတီတိုင်းဒေသကြီးလွှတ်တော် ဥက္ကဋ္ဌက ပြောပါတယ်။
အရင်က ဧရာဝတီတိုင်းဒေသကြီးလွှတ်တော် ပုံမှန်အစည်းအဝေးတွေကို ဧရာဝတီတိုင်းဒေသကြီးအစိုးရရုံးမှာ ကျင်းပခဲ့ပေမယ့် ခုလို့ ကိုဗစ်-၁၉ ကပ်ဘေးကာလမှာ ရောဂါ ကူးစက်မှုမရှိရလေအောင် ခုံတွေကို ၆ ပေခြားထားနိုင်ဖို့ ဧရာရွှေဝါခန်းမသို့ ပြောင်းရွှေ့ကျင်းပတာလည်း ဖြစ်ပါတယ်။
ဧရာဝတီတိုင်းဒေသကြီးလွှတ်တော် ဥက္ကဋ္ဌဦးအောင်ကျော်ခိုင်က “လက်ရှိအခန်းမှာက ၆ ပေခြားပုံစံချတာ အဆင်မပြေဘူး။ လွှတ်တော်ခန်းမကြီးကလည်း မပြီးသေးတော့ ဧရာရွှေဝါခန်းမမှာ စီစဉ်ထားပါတယ်”လို့ ပြောပါတယ်။
ဧရာဝတီတိုင်းလွှတ်တော် ၂၃ ကြိမ်မြောက်ပုံမှန်အစည်းအဝေကို ဇွန်လ ၄ ရက်နေ့မှ စတင်ကျင်းပဖို့ရှိပြီး အစည်းအဝေးကာလမှာ ကိုဗစ်-၁၉ ရောဂါနဲ့ ပတ်သက်တဲ့ မေးခွန်းတွေနဲ့ ၂၀၁၉-၂၀၂၀ ဖြည့်စွက်ဘတ်ဂျက် အတည်ပြုရေးကိစ္စတွေ ဆွေးနွေးမယ်လို့ သိရပါတယ်။
ဧရာဝဝီတိုင်းဒေသကြီးလွှတ်တော် အစည်းအဝေးခန်းမကိုတော့ ဆောက်လုပ်နေဆဲဖြစ်ပြီး ယုနှစ်အတွင်း ဖွင့်လှစ်နိုင်ဖို့ ကြိုးပမ်းဆောင်ရွက်နေပါတယ်။
သတင်း- စည်သူမောင်မောင်
