ရေစကြို ကျေးရွာ ၇ ရွာတွင် မြေအောက်ရေခန်းခြောက်၍ သောက်သုံးရေရှားပါး
DVB
·
May 24, 2020
မကွေးတိုင်း၊ ရေစကြိုမြို့နယ်အတွင်းရှိ ကျေးရွာ ၇ ရွာမှာ မြေအောက်ရေခန်းခြောက်ပြီး သောက်သုံးရေးရှားပါးတာကြောင့် မြို့နယ်မီးသတ်ဦးစီးဌာနက တရက်ကို ရေဂါလန် ၂၀၀၀ သွားရောက်လှူဒါန်းပေးနေရတယ်လို့ ရေစကြိုမြို့ မီးသတ်ဦးစီးအရာရှိ ဦးညီညီအောင်က ပြောပါတယ်။
“ကျနော့်ကို ဆက်သွယ်တဲ့ ရွာတွေက ၇ ရွာ ၈ ရွာလောက် ဒိုင်ခံရေရှားပါးနေတာ။ မဆက်သွယ်တဲ့ရွာတွေတော့ ရှိမှာပေါ့။ ဟိုတလောက မြေငလျင်လှုပ်လိုက်တာနဲ့ ရေတွင်းတွေက မြေအောက်ရေခန်းသွားတာလို့ ပြောတယ်။ စက်ရေတွင်းတွေက မြေအောက်ရေက မထွက်တော့တာ။ ထွက်လာတဲ့ရေနဲ့ မောင်းရတဲ့ ဆီနဲ့ မမျှတတာ။ ရေထွက်နှုန်း ကျဆင်းလာတာ။”
ရေစကြိုမြို့နယ်အတွင်းရှိ ဥက္ကံကျေးရွာ၊ ကျောက်ထပ်၊ ကျောက်လှေကား၊ ချင်းယား၊ ကျောက္ကာ၊ ရွာသစ်၊ ဘောင်ဘဲတန်း၊ သိမ်းကုန်း စတဲ့ ရွာတွေမှာ ရေကန်ရေခန်းတာနဲ့ မြေအောက်ရေ ခန်းခြောက်တာတွေကြောင့် သောက်သုံးရေ အခက်အခဲ ကြုံနေကြရတာပါ။
ရေစကြိုမြို့နယ်အတွင်းရှိ သောက်သုံးရေ အခက်အခဲဖြစ်နေတဲ့ ကျေးရွာတွေကို ကံပွင့် အမွှေးတိုင်ကုမ္ပဏီ ရေအလှူတော်အသင်း၊ ကျေးရွေပရဟိတ အသင်းအဖွဲ့တွေ၊ သဘာဝဘေးအန္တရာယ် စီမံခန့်ခွဲမှုဦးစီးဌာန၊ မြို့နယ်အမျိုးသားဒီမိုကရေစီအဖွဲ့ချုပေ၊ ပခုက္ကူမြို့က ပရဟိအဖွဲ့တွေနဲ့ စေတနာရှင် အလှူရှင်တွေ သောက်သုံးရေ သွားရောက်လှူဒါန်းပေးနေကြတယ်လို့ သိရပါတယ်။
မေ ၂၃ ရက်နေ့ကလည်း ရေစကြို့မြို့ မီးသတ်ဦးစီးဌာနက ကျောက္ကာကျေးရွာနဲ့ ချင်းယားကျေးရွာ နှစ်ရွာကို သောက်သုံးရေ သွားရောက်လှူဒါန်းခဲ့တယ်လို့ သိရပါတယ်။
ကိုလင်း(ချောက်)၊ ဓာတ်ပုံ - ဦးညီညီအောင်