ဥက္ကံမြို့ပဋိပက္ခဖြစ်စဉ်တွင် ၁၈ ဦးကို ဖမ်းဆီး
DVB
·
May 1, 2013
ရန်ကုန်တိုင်းဒေသကြီး ဥက္ကံမြို့မှာ မနေ့ညက ဖြစ်ပွားခဲ့တဲ့ ပဋိပက္ခမှာ ပါဝင်ပတ်သက်တယ်လို့ ယူဆရတဲ့ လူ ၁၈ ဦးကို ဖမ်းဆီးထားတယ်လို့ ဥက္ကံရဲစခန်းက ပြောပါတယ်။
ပဋိပက္ခကြောင့် ၁ ဦး သေဆုံး၊ ၁၀ ဦး ဒဏ်ရာရှိပြီး ၂ ဦးက စိုးရိမ်ရကြောင်း ဒီနေ့ထုတ် နိုင်ငံပိုင်သတင်းစာတွေမှာ ဖော်ပြထားပါတယ်။
ပဋိပက္ခဖြစ်စဉ်မှာ လှုံ့ဆော်သူတွေလို့ ယူဆရတဲ့ ၁၈ ဦးကို စစ်ဆေးနေပြီး ပျက်စီးဆုံးရှုံးမှု အခြေအနေနဲ့ ပတ်သက်လို့တော့ မသိရသေးဘဲ အခြေအနေကို ထိန်းသိမ်းနိုင်ပြီလို့ ဥက္ကံရဲစခန်း တာဝန်ရှိသူက ပြောပါတယ်။
မနေ့ညက ဖြစ်ပွားတဲ့ ပဋိပက္ခကြောင့် ကျေးရွာ ၃ ရွာ မီးရှို့ဖျက်ဆီးခံခဲ့ရပြီး အိမ်ခြေ ၇၈ အိမ် မီးလောင် ပျက်စီးခဲ့တယ်လို့ ဥက္ကံမြို့ ဈေးအနီးမှာ နေသူတဦးက ပြောပါတယ်။
ဥက္ကံမြို့ မီးရှို့ဖျက်ဆီးမှုတွေကြောင့် အခက်အခဲဖြစ်နေတဲ့ ဒုက္ခသည်တွေဟာ လတ်တလော နေရာအတည်တကျ မရှိသေးဘဲ ကြုံသလို နေနေကြရပြီး အမျိုးသားဒီမိုကရေစီအဖွဲ့ချုပ်နဲ့ အဖွဲ့အစည်းတချို့က ဆန်နဲ့ ရိက္ခာတွေ ဝေပေးနေတယ်လို့ မြို့ခံက ပြောပါတယ်။
ဥက္ကံမြို့မှာ ဖြစ်ပျက်ခဲ့တဲ့ အခြေအနေနဲ့ပတ်သက်ပြီး အစိုးရက ဥပဒေအတိုင်း ကိုယ်တွယ်ဆောင်ရွက်ဖို့ လိုတယ်လို့ အစ္စလာမ်သာသနာရေးရာကောင်စီဌာနချုပ် တွဲဖက်အတွင်းရေးမှူး ဦးဝဏ္ဏရွှေက ပြောပါတယ်။
“ဥပဒေကို ကိုင်တွယ်ဆောင်ရွက်နေတဲ့ အစိုးရအပေါ်ပဲ မူတည်ပါတယ်။ အစိုးရက ဥပဒေချိုးဖောက်တဲ့သူကို တိတိကျကျ အရေးယူမယ်၊ ထိန်းသိမ်းမယ်၊ ကာကွယ်မယ်ဆိုရင်တော့ ရမှာပေါ့။ မဟုတ်ရင်တော့ တနေရာကနေ တနေရာ ဖြစ်မှာပဲ။”
ဥက္ကံမြို့နယ်မှာ ဧပြီ ၃၀ ရက်နေ့ မနက်ပိုင်းက ဘုရားကြီးဈေးထဲမှာ ဆွမ်းခံကြွလာတဲ့ အသက် ၁၁ နှစ်အရွယ် ကိုရင်တပါးနဲ့ အမျိုးသမီးတဦး တိုက်မိလို့ သပိတ်ကွဲရာကနေ ဘာသာရေးအဆောက်အဦ ၂ ခုနဲ့ ဆိုင်ခန်းတချို့ ဖျက်ဆီးမှုတွေ ဖြစ်ခဲ့ပြီး ရဲက သေနတ်ပစ်ဖောက်ထိန်းသိမ်းခဲ့ရပါတယ်။ ဒီနောက် ညဘက်ပိုင်းမှာ မီးရှို့ဖျက်ဆီးမှုတွေ ဆက်လက်ဖြစ်ပွားခဲ့တာပါ။