ကမမောင်း-ဖာပွန်ကားလမ်း ဖြတ်သန်းသွားလာချိန် တပ်မတော် ကန့်သတ်

ကရင်ပြည်နယ်အတွင်း ကမမောင်း-ဖာပွန်သွား ကားလမ်းမကြီးကို တပ်မတော်က နယ်မြေလုံခြုံရေးအရ ဖြတ်သန်းသွားလာချိန်ကို ပိတ်ပင်ကန့်သတ်လိုက်တယ်လို့ ကရင်ပြည်နယ် ပစ်ခတ်တိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ  (JMC-s) အရပ်သားကိုယ်စားလှယ် (ဖာပွန်)ဦးမျိုးချစ်က က ဒီဗွီဘီကို ပြောပါတယ်။ မေ ၆ ရက်နေ့ကစတင်ပြီး တပ်မတော်နဲ့ ကေအန်ယူ တပ်မဟာ ၅ တို့တိုက်ပွဲဖြစ်ပွား ပြီးနောက် မေ ၈ ရက် ညနေကစတင်ကာ ကေအန်ယူဘက်က ယာဉ်သွားလာမှု  ယာယီပိတ်ထားလိုက်ပြီးနောက် တပ်မတော်ဘက်က အခုလို ဖြတ်သန်းသွားလာမှုတွေကို ကန့်သတ်လိုက်တာပါ။ ကရင်ပြည်နယ် (JMC-s)အရပ်သားကိုယ်စားလှယ်(ဖာပွန်)ဦးမျိုးချစ်က "တပ်မတော်ဘက်ကနေ ပြီးတော့ နယ်မြေလုံခြုံရေး အခြေအနေအရ ညနေ ၆ နာရီ မနက် ၆ နာရီ ပိတ်လိုက်တယ်။ ဒီလိုပစ်ခတ်တိုက်ခိုက်မှုတွေ၊ လမ်းပိတ်ဆိုမှုတွေက မေ ၁၆ ရက်နေ့ကျရင် နေပြည်တော် UPDJC မှာ ဆွေးနွေးဖို့ရှိတယ်။ ဆွေးနွေးပြီးရင်တော့ အဆင်ပြေသွားမယ်လို့ ထင်တယ်"လို့ ပြောပါတယ်။ ခရီးသွားလာမှုကို အချိန်ကန့်သတ်လိုက်တဲ့အတွက် တော်တော်ဒုက္ခရောက်တယ်လို့ ​​ဒေသခံခ ရီးသွားတွေက ပြောပါတယ်။ ဖာပွန်မြို့နယ်၊ ဝှေ့မှုန်ကျေးရွာ၊ ဦးသန်းဝင်းက "အခုက ခရီးသွားပြည်သူတွေတော်တော် ဒုက္ခရောက်တယ်။ ကျန်းမာရေးနဲ့ပတ်သက်ရင် စိုးရိမ်ရတဲ့လူနာဆိုရင် ဘယ်လိုလုပ်မလဲ"လို့ ဆိုပါတယ်။ တပ်မဟာ ၅ နယ်မြေ ဖာပွန်ခရိုင်အတွင်း COVID- 19 ကာကွယ်တားဆီးရေး ရောဂါစစ်ဆေးရေးစခန်းဖွင့်လှစ်တာနဲ့ပတ်သက်ပြီး တပ်မတော်က ဝင်ရောက်ဟန့်တားပြီး ယာယီတဲတွေကို မီးရှို့ဖျက်ဆီးလိုက်တဲ့အတွက် နှစ်ဖက်တင်းမာမှုဖြစ်ပွားပြီး တိုက်ပွဲတွေ ဖြစ်ပွားနေတာပါ။ မေ ၁၄ ရက် မနက် ၈ နာရီလောက်ကလည်း  ကမမောင်း-ဖာပွန်ကားလမ်းမကြီးဘေး ရေပူအေးစခန်းအနီးမှာ မိနစ်အနည်းငယ်လောက် နှစ်ဖက်ပစ်ခတ်မှုဖြစ်ပွားခဲ့တယ်လို့ ဒေသခံတွေက ပြောပါတယ်။ ကေအန်ယူနဲ့ တပ်မတော်တို့ကြား ပစ်ခတ်မှုတွေ မကြာခဏဖြစ်ပွားနေတဲ့အတွက် စားဝတ်နေရေးအတွက် ရှာဖွေလုပ်ကိုင်စားသောက်ဖို့ အခက်အခဲဖြစ်သလို ​မြေမြုပ်မိုင်းအန္တရယ်ကိုပါ ဒေသခံတွေအနေနဲ့ စိုးရိမ်နေရပါတယ်။ နှစ်ဘက်တိုက်ပွဲတွေ အခြေအနေနဲ့ ခရီးသွားလာမှု ကန့်သတ်တာတွေနဲ့ပတ်သက်ပြီး တပ်မတော်(ရတခ) ပြောရေးဆိုခွင့်ရှိသူ ဗိုလ်မှူးကြီးမောင်မောင်လတ်ကို ဆက်သွယ်မေးမြန်းရာမှာ မေးမြန်းခွင့် မရခဲ့ပါဘူး။ သတင်း-ရဲမင်းခေါင်

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up