ဝက်လက်မြို့တွင် ညမထွက်ရအမိန့်ချိုးဖောက်သူ လူငယ် ၆ ဦးကို ထောင်ဒဏ် ၃ လစီချမှတ်
DVB
·
May 6, 2020
စစ်ကိုင်းတိုင်းဒေသကြီး၊ ဝက်လက်မြို့မှာ ညအချိန်မတော်ဆိုင်ကယ် ၂ စီးနဲ့ လှည့်လည်သွားလာနေသူ ၆ ဦးကို မေလ ၅ ရက်နေ့က ထောင်ဒဏ် ၃ လစီချမှတ်ခဲ့တယ်လို့ အထွေထွေအုပ်ချုပ်ရေးဦးစီးဌာနက သိရပါတယ်။
ဝက်လက်မြို့နယ် အုပ်ချုပ်ရေးမှူးအဖွဲ့နဲ့ မြို့မရဲစခန်းတာဝန်ရှိသူတွေဟာ မေလ ၄ ရက် ည ၁၁ နာရီလောက်က လှည့်ကင်းဆောင်ရွက်နေစဉ် အမှတ် ၃ ရပ်ကွက်၊ ဝက်လက်-ရွာသာကြီး ကား လမ်းမပေါ်မှာ ဆိုင်ကယ်စီးနင်းလာတဲ့ အသက် ၂၀ ကျော်ကနေ ၃၀ ကျော်အကြားရှိ လူငယ် ၆ ဦးကို စစ်ဆေးမေးမြန်းရာမှာ အကြောင်းတစုံတရာမရှိပါဘဲ ဒေသန္တရအမိန့် ဖောက်ဖျက်ကျူးလွန်ကာ သွားလာနေတာတွေ့ရှိရတဲ့အတွက် မြို့နယ်ရဲတပ်ဖွဲ့မှ ဖမ်းဆီးခဲ့တာပါ။
ဝက်လက်မြို့နယ်မှာ ည ၁၀ နာရီမှမနက် ၄ နာရီအထိ ဒေသန္တရညမထွက်ရအမိန့်ကို မတ်လ ၂၆ ရက်နေ့က စတင်ခဲ့တာဖြစ်ပြီး ရက်အကန့်အသက်မရှိ ထုတ်ပြန်ထားတာ ဖြစ်ပါတယ်။
ဒေသန္တရအမိန့်ချိုးဖေါက်သူ ၆ ဦးကို ဝက်လက်မြို့နယ် အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူး ဦးစိုးလှိုင်မောင်က တရားလိုပြုတိုင်ကြားခဲ့ပြီး မြို့နယ်တရားရုံးကနေ ရာဇသတ်ကြီးပုဒ်မ ၁၈၈ အရ ထောင်ဒါဏ် ၃ လစီချမှတ်ခဲ့တယ်လို့ မြို့နယ်အုပ်ချုပ်ရေးမှူးရုံးက သိရပါတယ်။
သတင်း-အောင်စံလင်း
