မိုးညှင်းက ကျန်းမာရေးဝန်ထမ်းနှင့် စေတနာ့ဝန်ထမ်း ၁၈ ဦးတွင် COVID-19 ရောဂါပိုးမတွေ့
DVB
·
April 30, 2020
COVID-19 အတည်ပြုလူနာ နံပတ် ၁၄၄ နဲ့ ထိတွေ့ခဲ့တဲ့ ကချင်ပြည်နယ် မိုးညှင်းဆေးရုံက ကျန်းမာရေးဝန်ထမ်းတွေနဲ့ စေတနာ့ဝန်ထမ်းတွေ စုစုပေါင်း ၁၈ ဦးစလုံးမှာ COVID-19 ရောဂါပိုး မတွေ့ရှိရဖူးလို့ မိုးညှင်းဆေးရုံမှ ဆရာဝန်တဦးက ပြောပါတယ်။
မိုးညှင်းမြို့ quaratine စင်တာမှတဆင့် မိုးညှင်းခရိုင်ဆေးရုံကြီး ကြပ်မတ်ဆောင်သို့ ပြောင်းရွှေ့ကုသခဲ့တဲ့ လူနာအမှတ် ၁၄၄ နဲ့ ထိတွေ့ခဲ့သူတွေကို ဧပြီ ၂၇ ရက်က နှာခေါင်း အာခေါင်တို့ဖတ် ပေးပို့စစ်ဆေးထားတာဖြစ်ပါတယ်။
မိုးညှင်းဆေးရုံမှ ဆရာဝန် ဒေါက်တာဖြူလေးဝေက "၁၈ ဦးစလုံး ပိုးမတွေ့ အဖြေရပါတယ်။ ဒုတိယအကြိမ် မေလ ၄ ရက်နေ့ ပြန်စစ်ဆေးဖို့ တို့ဖတ်ပြန်ယူမှာပါ။ ဒုတိယအကြိမ်စစ်ဆေးလို့ ပိုးမတွေ့ Negative အဖြေထွက်လာရင် ၂၁ ရက် quarantine စောင့်ကြည့်ခံရတဲ့ နေအိမ် ၃၈ လုံးနဲ့ မိသားစုတွေ ထွက်လို့ရပါပြီ” လို့ ပြောပါတယ်။
COVID-19 လူနာ ၁၄၄ ကတော့ "ကျနော်နဲ့ထိတွေ့ခဲ့သူ ရန်ကုန်ချန်းရိစက်ရုံကရော မိုးညှင်းကတွေရော အားလုံးပိုးမတွေ့လို့ ဝမ်းသာပါတယ်။ ကျနော် မြစ်ကြီးနားဆေးရုံမှာပဲ ကျန်းမာရေးအခြေအနေ တဖြည်းဖြည်း ကောင်းလာပါပြီ”လို့ ဖုန်းနဲ့ဖြေကြားပါတယ်။
COVID-19 လူနာအမှတ် ၁၄၄ ဟာ ရန်ကုန်လှိုင်သာယာစက်မှုဇုန်ရှိ ချန်းရိ စက်ရုံက စကားပြန်ဝန်ထမ်းတဦးဖြစ်ပြီး အဆိုပါ စက်ရုံမှာ လုပ်သားအင်အား ၈၀၀၀ လောက် အလုပ်လုပ်ကိုင် နေကြတာဖြစ်တဲ့အတွက် ကူးစက်ခံရသူတွေ များပြားလာမှာကို စိုးရိမ်ခဲ့ကြတာပါ။
သတင်း - မုန်းမုန်းမင်း
