Homeမြန်မာသတင်း
ဂန့်ဂေါမြို့တွင် အမိန့်မလိုက်နာသည့် Home Quarantine စောင့်ကြည့်ခံရသူ ၂ ဦးကို ထောင်ဒဏ် ၃ လစီချမှတ်
ဂန့်ဂေါမြို့တွင် အမိန့်မလိုက်နာသည့် Home Quarantine စောင့်ကြည့်ခံရသူ ၂ ဦးကို ထောင်ဒဏ် ၃ လစီချမှတ်
Aung Ko Latt
·
April 10, 2020
ဂန့်ဂေါမြို့မှာ အမိန့်မလိုက်နာတဲ့ Home Quarantine စောင့်ကြည့်ခံရသူ ၂ ဦးကို ထောင်ဒဏ် ၃ လစီချမှတ်လိုက်တယ်လို့ သိရပါတယ်။
မကွေးတိုင်းဒေသကြီး၊ ဂန့်ဂေါမြို့၊ စည်ပင်ရပ်ကွက်နဲ့ ကျောတိုက်ရပ်ကွက်မှာ မတ်လ ၂၆ ရက်နေ့က အမေရိကန်နိုင်ငံကနေ ပြန်လည်ရောက်ရှိလာသူ ဦးတင်ယမန်း၊ ဦးဆန်းဇော်ဦးတို့ကို နေအိမ်မှာ သီးသန့်စောင့်ကြည့်မှု Home Quarantine ၁၄ ရက်အဖြစ် ထားရှိခဲ့ပါတယ်။
စောင့်ကြည့်နေစဉ်ကာလအတွင်း သတ်မှတ်ထားတဲ့ ၁၄ ရက်မပြည့်မီ နေအိမ်ကနေ မတူပီမြို့ကို ကိုယ့်သဘောဆန္ဒနဲ့ကိုယ် ထွက်ခွာသွားတာကြောင့် သက်ဆိုင်ရာကနေ ဖမ်းဆီးခဲ့ပြီး မြို့မရဲစခန်းမှာ ကူးစက်ရောဂါများ ကာကွယ်နှိမ်နင်းရေးဥပဒေ ပုဒ်မ ၁၈ နဲ့ သီးခြားစီ အမှုဖွင့်ခဲ့တာပါ။
အမှုနဲ့ပတ်သက်လို့ ဂန့်ဂေါမြို့နယ်တရားရုံးက ဧပြီလ ၆ ရက်နေ့မှာ တစ်ယောက်ကို ထောင်ဒဏ် ၃ လစီကျခံစေရန် အမိန့်ချမှတ်ခဲ့ပါတယ်။ ကိုရိုနာဗိုင်းရပ်စ်ရောဂါနဲ့ပတ်သက်ပြီး အခုလို အမှုဖွင့်အရေးယူတာက ဂန့်ဂေါမြို့နယ်မှာ ပထမဦးဆုံးအကြိမ်လည်းဖြစ်ပါတယ်။
COVID-19 ရောဂါ ကာကွယ်ထိန်းချုပ်ရေး၊ အရေးပေါ် တုန့်ပြန်ဆောင်ရွက်ရေးအတွက်လည်း ဂန့်ဂေါခရိုင်အထွေထွေရောဂါကုဆေးရုံကြီး သံဃာဆောင်မှာ သီးသန့်ပြင်ဆင်တာတွေ ပြုလုပ်ထားကာ ကျေးရွာတိုင်းမှာလည်း ပြည်တွင်း၊ ပြည်ပက ပြန်လာသူတွေကို Facility Quarantine အဖြစ် ၁၄ ရက်စောင့်ကြည့်တာတွေ ပြုလုပ်နေပါတယ်။
ဂန့်ဂေါမြို့နယ် တိုင်းဒေသကြီး လွှတ်တော်ကိုယ်စားလှယ် ဦးအောင်ဆန်းဝင်းက "ဂန့်ဂေါမှာတော့ ကိုဗစ်ရောဂါနဲ့ပတ်သက်ပြီး အခုထိ စိုးရိမ်၊ သံသယလူနာမတွေ့ရှိရသေးပါဘူး။ ရှိခဲ့ရင်လည်း အရေးပေါ်တုန့်ပြန်ရေးအတွက်လည်း တိုင်းအစိုးရကနေ လောလောဆယ် တစ်မြို့နယ်ကို ငွေကျပ် ၁၀ သိန်းစီထောက်ပံ့ပေးထားပါတယ်။ မနေ့ကမှ ထုတ်ခဲ့တာ။ အကုန်စီစဉ်ထားပါတယ်။ ဆေးဝါးတွေလည်း ထိုက်သင့်သလောက် လုံလောက်မှု ရှိပါတယ်။ သိပ်ပြီးထူးခြားမှုတော့ မရှိသေးပါဘူး။"လို့ ပြောပါတယ်။
လက်ရှိမှာတော့ တိုင်းအစိုးရကနေ တိုင်းအတွင်း ပြေးဆွဲနေတဲ့ ခရီးသည် မော်တော်ယာဉ်၊ ရေယာဉ်လိုင်းတွေ ခေတ္တရပ်နားထားကြဖို့ ထုတ်ပြန်ထားပါတယ်။ မကွေးတိုင်းဒေသကြီးအတွင်းမှာ ကိုဗစ်ရောဂါနဲ့ပတ်သက်လို့ စောင့်ကြည့်၊ သံသယလူနာ ၆၂ ဦးရှိပြီး ရောဂါပိုးမတွေ့ရသေးဘူးလို့ ကျန်းမာရေးနှင့် အားကစားဝန်ကြီးဌာနက ထုတ်ပြန်တဲ့ စာရင်းတွေအရ သိရပါတယ်။
