Email This Story :
လက်နက်မှု၊ မူးယစ်ဆေးဝါးမှုတွေနဲ့ ဖမ်းဆီးတရားစွဲခံနေရတဲ့ ACE ကုမ္ပဏီပိုင်ရှင် ဖြိုးကိုကိုတင့်ဆန်းကို ဒီကနေ့ မတ်လ ၃၀ ရက်နေ့မှာ ဒက္ခိဏသီရိခရိုင်တရားရုံးက စုစုပေါင်း ထောင်ဒဏ် နှစ် ၃၀ နဲ့ ၇ လ ပြစ်ဒဏ် အမိန့်ချမှတ်လိုက်ပါတယ်။
ဖြိုးကိုကိုတင့်ဆန်းနဲ့အတူ လေဆိပ်မှာ ဖမ်းဆီးရမိခဲ့တဲ့ ရဲမင်းဆွေ၊ ဇော်ဝင်းထိုက် အပါအဝင် အမှုဖြစ်စဉ်မှာပါဝင်ပတ်သက်ခဲ့သူ စုစုပေါင်း ၁၂ ဦးရှိခဲ့ပြီး ဖြိုးကိုကိုတင့်ဆန်း တစ်ဦးသာ ပြစ်ဒဏ်အများဆုံး ချမှတ်ခဲ့တာပါ။
ဖြိုးကိုကိုတင့်ဆန်းရဲ့ ရှေ့နေဖြစ်သူ ဦးမြင့်အောင်က “ ဖြိုးကိုကိုတင့်ဆန်းကို တရားစွဲတဲ့ အမှု ၁၄ မှု အမိန့်ချတယ်။ ဖြိုးကိုကိုတင့်ဆန်းအပေါ်မှာ လွှတ်တာတော့ တစ်ခုမှ မရှိဘူး။ ထောင်ဒဏ်စုစုပေါင်း အားလုံးချလိုက်တဲ့ အမှု ၁၄ မှုဆိုရင် ပြစ်ဒဏ်ပေါင်း နှစ် ၃၀ နဲ့ ၇ လလောက်ရှိမယ် ထင်တယ် ” လို့ပြောပါတယ်။
တရားခံစုစုပေါင်း ၁၂ ဦးထဲမှာ နှစ်ဦးသာ ချုပ်ရက်နဲ့ လွတ်မြောက်ခဲ့ပြီး တရားခံအသီးသီး ပြစ်ဒဏ် ကျခံရမှာဖြစ်ပါတယ်။
တရားခံတွေဘက်ကနေ ဥပဒေအရ ခံစားရှိတာတွေ ဆက်လက်ဆောင်ရွက်သွားမှာဖြစ်ပြီး ဖြိုးကိုကိုတင့်ဆန်းက အယူခံဆက်တက်ဖို့ ပြောဆိုခဲ့တယ်လို့ ရှေ့နေဦးမြင့်အောင်က ပြောပါတယ်။
ဖြိုးကိုကိုတင့်ဆန်းကို ၂၀၁၇ ခုနှစ် အောက်တိုဘာ ၁၅ ရက်နေ့က နေပြည်တော်လေဆိပ်မှာ လက်နက်တွေနဲ့အတူ ဖမ်းဆီးမိခဲ့တာဖြစ်ပြီး အမှုဟာ ၂ နှစ်နဲ့ ၃ လကျော်ကြာမြင့်ခဲ့ကာ ရုံးချိန်းပေါင်း ၁၀၉ ချိန်းဆို စစ်ဆေးမှုတွေ ပြုလုပ်ခဲ့ပြီးနောက် အမိန့်ချမှတ်လိုက်တာဖြစ်ပါတယ်။
