ရဲအယောင်ဆောင်ပြီး ချစ်သူစုံတွဲထံက ငွေနှင့် ဖုန်းခြိမ်းခြောက်ယူသွားသူ ၂ ဦးကို ဖမ်းဆီး

ဧရာဝတီတိုင်း၊ ပုသိမ်မြို့၊ အမှတ် ၃ ရပ်ကွက်ရှိ ကန်ပတ်လမ်းမှာ ချစ်သူစုံတွဲတွေထံက ရဲအယောင်ဆောင်ပြီး ငွေနဲ့ ဖုန်းတွေကို ခြိမ်းခြောက်လုယက်ခဲ့တဲ့ အမျိုးသား ၂ ဦးကို ပုသိမ်မြို့မရဲစခန်းမှာ အမှုဖွင့်ဖမ်းဆီးစစ်ဆေးနေပါတယ်။ ကန်ပတ်လမ်းကိုလာတဲ့ ချစ်သူဆုံတွဲတွေကို ရဲတွေအသုံးပြုတဲ့စကားတွေပြောဆိုကာ ငွေနဲ့ဖုန်းတောင်းယူခဲ့တဲ့ အမျိုးသား ၂ ဦးကို မြို့မ ရဲစခန်းက ရဲတပ်ဖွဲ့ဝင်တွေက  မတ်လ ၁၀ ရက်နေ့မှာ ဖမ်းဆီးခဲ့တာလို့ ရဲတပ်ဖွဲ့က တာဝန်ရှိသူကပြောပါတယ်။ ကန်ကြီးထောင့်မြို့နယ်မှာ နေထိုင်တဲ့ ကိုစိုးသွင်က ပုသိမ်မြို့မှာရှိတဲ့ သူ့ရဲ့ချစ်သူနဲ့ ကန်ပတ်လမ်းမှာလာရောက်တွေ့ပြီး လမ်းလျှောက်ပြန်လာချိန်မှာ အမည်မသိသူ ၂ ဦးက ရဲအယောင်ဆောင်ပြီး ခြိမ်းခြောက်ငွေတောင်းခဲ့တာဖြစ်ပါတယ်။ ခြိမ်းခြောက်ငွေတောင်းခံခဲ့ရတဲ့ ကာယကံရှင် ကိုစိုးသွင်က “ကျနော်တို့ကို အဲဒီနေရာကို အတွဲမလာရဘူး ပြောတယ်။ ငါတို့က ရဲတွေ ရဲစခန်း လိုက်ခဲ့ပြောတယ်။ မိဘတွေခေါ်မယ် ပြောတယ်။ မလိုက်ချင်ရင် ပိုက်ဆံ ၃၀၀၀၀ပေးပြောတယ်။ ကျနော်တို့မှာ ပိုက်ဆံပါမလာဘူးဆိုတော့ ဖုန်း ၂ လုံး ကို ယူသွားပြီး ရဲစခန်းမှာ လာရွေးလို့ ပြောပြီးထွက်သွားတယ်။ လူမြင်ရင်မှတ်မိလို့ အသိရဲကို အကူအညီတောင်းတာ”လို့ ပြောပါတယ်။  လုယက်ခံရကြောင်းတိုင်ကြားပြီး  နှစ်ရက်အကြာမှာ အခင်းဖြစ်တဲ့နေရာအနီး ရဲတပ်ဖွဲ့က မသင်္ကာစရာ ၂ ဦးဖြစ်တဲ့ အသက် ၄၅ နှစ်အရွယ် မောင်သန်းနဲ့ အသက် ၃၈ နှစ်အရွယ် သီဟဇော်တို့ကို ဖမ်းဆီးစစ်ဆေးနိုင်ခဲ့တာပါ။ စစ်ဆေးမေးမြန်းရာမှာ  ဖမ်းမိထားတဲ့ အမျိုးသား ၂ ဦးက စုံတွဲထံကနေ ငွေကျပ် ၄ သိန်းတန်ဖိုးရှိတဲ့ ဖုန်း နှစ်လုံးကို ရဲအယောင်ဆောင်ပြီး ရယူခဲ့တယ်လို့ ထွက်ဆိုခဲ့ကြောင်း ရဲမှတ်တမ်းတွေအရ သိရပါတယ်။ လတ်တလော ဖမ်းမိသူ ၂ ဦးကို ပုသိမ်မြို့မရဲစခန်းမှာ ရာဇသတ်ကြီးပုဒ်မ ၃၈၄/၁၇၀ နဲ့အမှုဖွင့်စစ်ဆေး နေတယ်လို့ သိရပါတယ်။ မင်းထက်မုန်း (ပုသိမ်)

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up