ချမ်းမြသာစည် မီးလောင်မှု နေအိမ် ၁၃ လုံး ဆုံးရှုံး
DVB
·
March 2, 2020
မန္တလေးတိုင်း၊ ချမ်းမြသာစည်မြို့နယ်၊ ရန်ကုန်-မန္တလေးလမ်း အနောက်ဘက်ရှိ ချမ်းမြသာစည်တောင်ရွာသစ် သုခလမ်းသွယ်မှာ မတ်လ ၁ ရက်နေ့ မွန်းလွဲပိုင်းက မီးလောင်မှု ဖြစ်ပွားခဲ့တာကြောင့် နေအိမ် ၁၃ လုံး ဆုံးရှုံးခဲ့တယ်လို့ သိရပါတယ်။
ချမ်းမြသာစည် တောင်ရွာသစ် အကွက် ၈၆၀ ရှိ ပျဉ်ထောင် ၂ ထပ် နေအိမ် ဘုရားစင်ကနေ သွယ်တန်းထားတဲ့ ဝါယာကြိုး အပူလွန်ကဲရာကနေ ဘုရားစင်ကို မီးစတင်ကူးစက် လောင်ကျွမ်းခဲ့ပြီး စုစုပေါင်း နေအိမ် ၁၃ လုံး ဆုံးရှုံးခဲ့တာပါ။
မီးလောင်မှုကို တိုင်းဒေသကြီး မီးသတ်ဦးစီးမှူး ဦးသန်းဇော်ဦး ဦးဆောင်ပြီး မီးငြိမ်းသတ်ယာဉ် အစီး ၃၀၊ ရေသယ် ယာဉ် အစီး ၂၀၊ အုပ်ချုပ်မှုယာဉ် ၃ စီး၊ သန္ဓေ ၇၀၊ အရန်မီးသတ် ၁၃၀ တို့နဲ့ သွားရောက်ငြှိမ်းသတ်ခဲ့ပါတယ်။
မီးလောင်မှုကြောင့် ကျပ် ၆၅ သိန်းကျော်ဖို့ ဆုံးရှုံးခဲ့တယ်လို့ သိရပါတယ်။ နေအိမ်ဆုံးရှုံးခဲ့ကြတဲ့ အိမ်ထောင်စု ၂၂ စုက လူ ၆၉ ဦးတို့ကို ရွာဘုံဆုတောင်းပြည့် ဓမ္မရုံအတွင်းမှာ ကူညီရေးစခန်းဖွင့်လှစ်စောင့်ရှောက်ထားပါတယ်။
ချမ်းမြသာစည်မြို့နယ် အမှတ်(၁၁)နယ်မြေရဲစခန်းက မီးစတင်လောင်ကျွမ်းရာအိမ်ရဲ့ အိမ်ငှားဖြစ်သူကို ပ-၉၂ /၂၀၂၀)၊ ပုဒ်မ (၂၈၅) နဲ့ အမှုဖွင့် အရေးယူထားပါတယ်။
