ဧရာဝတီတိုင်းတွင် ပထမဆုံးအကြိမ် မွန်အမျိုးသားနေ့ ကျင်းပ
DVB
·
February 10, 2020
ဧရာဝတီတိုင်း၊ ပုသိမ်မြို့မှာ ၇၃ ကြိမ်မြောက် မွန်အမျိုးသားနေ့အခမ်းအနားကို ပထမဆုံး အကြိမ်အဖြစ် မြကျွန်းသာအိမ်ယာ မြက်ခင်းပြင်မှာ ဖေဖော်ဝါရီ ၉ ရက် မနက်က ကျင်းပပါတယ်။
မွန်အမျိုးသားနေ့ကို မွန်လူမျိုးများနေထိုင်တဲ့ မွန်ပြည်နယ်၊ ကရင်ပြည်နယ်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီးနဲ့ တနင်္သာရီတိုင်း ဒေသကြီးတို့မှာရှိတဲ့ မြို့နယ်တွေမှာ နှစ်စဉ်ကျင်းပပြုလုပ်ခဲ့ပြီး ဒီနှစ်တွင်း ဧရာဝတီတိုင်းတွင် ပထမဆုံးအကြိမ်ကျင်းပတာလို့ အခမ်းအနားကိုဦးဆောင်ပြုလုပ်သူ မွန်အမျိုး သမီးများပါတီဗဟိုကော်မတီ ဥက္ကဋ္ဌ မိသန်းရှင် (မိလျိုင်မာ)က ပြောပါတယ်။
အရင်က မွန်လူမျိုးတို့ နေထိုင်ခဲ့တဲ့ မွန်တို့ဌာနေ ရာမညတိုင်းကြီး ၃ တိုင်းမှာ ပုသိမ်ဆိုတဲ့ တိုင်းလည်းပါဝင်ခဲ့ကာ ပုသိမ်တိုင်းမှာ မြို့နယ် ၃၂ မြို့နယ်ပါရှိကာ အခုအချိန်မှာ ပုသိမ်တိုင်းမှာ မွန်လူမျိုးတွေ လျော့နည်းလာကာ မွန်ယဉ်ကျေးမှုနဲ့ ရိုးရာဓလေ့ထုံးစံတွေ ပျောက်ကွယ်သွားခဲ့ ပြီဖြစ်တယ်လို့ အခမ်းအနားသဘာပတိ ဗညားအောင်မိုးက အမှာစကားမှာ ထည့်သွင်းပြောပါတယ်။
မွန်လူမျိုးတွေရဲ့ ကိုးကွယ်မှုတွေထဲ တလိုင်းထုံးစံ ကိုးကွယ်မှုတွေဟာ မွန်တို့ရဲ့ ယဉ်ကျေးမှု ထုံးစံဖြစ်ပြီး ဧရာဝတီတိုင်းအတွင်းမှာ တလိုင်းတို့ရဲ့ ထုံးစံကိုးကွယ်မှုတွေကို ထိန်းသိမ်းထားတာ တွေ့ရတယ်လို့ အခမ်းအနားစီစဉ်သူတွေက ပြောပါတယ်။
ဧရာဝတီတိုင်းမှာ ပထမဆုံးအကြိမ်ပြုလုပ်တဲ့ ၇၃ ကြိမ်မြောက် မွန်အမျိုးသားနေ့ အခမ်းအနားကို တိုင်းဒေသကြီးအစိုးရအဖွဲ့ရဲ့ ခွင့်ပြုချက် ရယူကာ မနက်ပိုင်းမှာ မွန်အမျိုးသားအလံ ကို လွှင့်တင်ခဲ့ပြီး၊ နိုင်ငံတော်အလံကိုအလေးပြုခြင်း၊ မွန်အမျိုးသားအလံအား အလေးပြုတာတွေ ပြုလုပ်ခဲ့ပြီး ညနေပိုင်းမှာတော့ မွန်ရိုးရာ ယဉ်ကျေးမှု အကတွေနဲ့ မွန်လှပျိုဖြူတွေက ကပြ ဖျော်ဖြေတင်ဆက်ခဲ့ပါတယ်။
သတင်း- မင်းထက်မုန်း (ပုသိမ်)