Home
မြန်မာသတင်း
နစ်နာသူများ တိုင်ကြားလာပါက ဖုန်းအော်ပရေတာများကို အရေးယူမည်
DVB
·
February 8, 2020
ဆက်သွယ်ရေးဝန်ဆောင်မှုတွေနဲ့ပတ်သက်လို့ သုံးစွဲသူ ပြည်သူတွေ ထိခိုက်နစ်နာမှုတွေရှိလို့ တိုင်ကြားလာရင် ဖုန်းအော်ပရေတာတွေကို ဥပဒေနဲ့အညီ အရေးယူမယ်လို့ ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စု ဒုတိယဝန်ကြီး ဦးသာဦးက ပြောဆိုလိုက်ပါတယ်။ ဖေဖော်ဝါရီ ၇ ရက်က ကျင်းပတဲ့ အမျိုးသားလွှတ်တော် ပုံမှန်အစည်းအဝေးမှာ မန္တလေးတိုင်း လွတ်တော်ကိုယ်စားလှယ် ဦးထွန်းထွန်းဦးရဲ့ မေးခွန်းကို ဒုတိယဝန်ကြီးက ဖြေဆိုခဲ့တာပါ။  ဦးထွန်းထွန်းဦးက ဖုန်းသုံးစွဲသူတွေရဲ့ ဖုန်းဘေလ်တွေထဲက တခြားဝန်ဆောင်မှုအတွက် ဆိုပြီး ငွေတွေ ဖြတ်တောက်တာတွေ များလာလို့ သုံးစွဲသူတွေ ဆုံးရှုံးနစ်နာနေတာကြောင့် ထိရောက်စွာ တားဆီးပေးဖို့ အစီအစဉ် ရှိ၊ မရှိဆိုတဲ့  မေးခွန်းကို မေးမြန်းခဲ့တာပါ။  ဒုတိယဝန်ကြီးက ဆက်သွယ်ရေးဝန်ဆောင်မှုလုပ်ငန်းတွေနဲ့ ပတ်သက်ပြီး သုံးစွဲသူ ပြည်သူတွေ ထိခိုက်နစ်နာအောင် ဆောင်ရွက်တာတွေ၊ ဝန်ကြီးဌာနက ထုတ်ပြန်တဲ့ ညွှန်ကြားချက်တွေကို မလိုက်နာရင် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ဆက်သွယ်ရေးညွှန်ကြားမှုဦးစီးဌာန၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာတွေဆီ  တိုင်ကြားလာတာတွေကို ဆက်သွယ်ရေးဥပဒေ၊ နည်းဥပဒေများ၊ စားသုံး သူအကာအကွယ်ပေးရေး ဥပဒေ၊ နည်းဥပဒေများနှင့်အညီ အရေးယူ ဆောင်ရွက်သွားမှာဖြစ်ပြီး သုံးစွဲသူတွေ ထိခိုက်နစ်နာဆုံးရှုံးမှု မရှိစေဖို့ စားသုံးသူရေးရာဦးစီးဌာနနဲ့ ပူးပေါင်းညှိနှိုင်း ဆောင်ရွက် ပေးနေတယ်လို့ ဆိုပါတယ်။ ဒါအပြင် ဝန်ဆောင်မှု အစီအစဉ်နဲ့ပတ်သက်ပြီး နားလည်မှု မလွဲဖို့နဲ့ ဒေတာအသုံးပြုမှု ပိုမိုကုန်ကျနိုင်တဲ့ အချက်တွေကိုသိဖို့ အော်ပရေတာတွေကို သုံးစွဲသူ ပညာပေးအစီအစဉ် လုပ်ခိုင်းခဲ့တယ်လို့ ဒုတိယဝန်ကြီးက ပြောပါတယ်။ ဖုန်းအော်ပရေတာတွေဟာ ထပ်ဆောင်းဝန်ဆောင်မှုအစီအစဉ်နဲ့ပတ်သက်လို့  စာတို ပို့တာ၊ Website တွေ၊ Facebook စတာတွေ၊ ဖုန်းခေါ်ဆိုတဲ့ နည်းလမ်းတွေနဲ့ သုံးစွဲသူတွေဆီ အသိပေးကြော်ငြာတာ၊  ဝန်ဆောင်မှုပေးရာမှာ တချို့ထပ်ဆောင်းဝန်ဆောင်မှုတွေဟာ Social Media တွေပေါ် ကြော်ငြာထားပြီး သုံးစွဲသူအများစုဟာ အသေးစိတ်အချက်အလက်တွေကို သေချာစွာ ဖတ်ရှုခြင်း မရှိဘဲ ဝန်ဆောင်မှုတွေကို ရယူ သုံးစွဲနေတာကြောင့် တယ်လီဖုန်းဘေလ် ဖြတ်တောက်တာတွေ ဖြစ်ပေါ်ခဲ့တယ်လို့ သိရပါတယ်။ ဝန်ကြီးဌာနအနေနဲ့ ပြည်သူတွေ ဈေးနှုန်းသင့်တင့်စွာနဲ့ ကြိုက်နှစ်သက်ရာ ဝန်ဆောင်မှု အစီအစဉ်တွေကို ရွေးချယ်အသုံးပြုနိုင်စေဖို့ စီစဉ်ဆောင်ရွက်ပေးနေပြီး အခုလို ဝန်ဆောင်မှု အစီအစဉ်တွေနဲ့ ပတ်သက်လို့ သုံးစွဲသူတွေ နစ်နာဆုံးရှုံးမှု မရှိဖို့ ဆက်သွယ်ရေး အော်ပရေတာတွေကို ကြီးကြပ်ဆောင်ရွက်နေတယ်လို့ သိရ ပါတယ်။ လတ်တလောမှာတော့ ဝန်ကြီးဌာနအနေနဲ့ အော်ပရေတာတွေနဲ့ပတ်သက်လို့ သုံးစွဲသူ ပြည်သူတွေ ကြုံတွေ့နေရတဲ့ အခက်အခဲတွေကို ဖြေရှင်းပေးဖို့ Facebook Page မှ ဖြစ်စေ၊ ဖုန်းနဲ့ဖြစ်စေ တိုင်ကြားတာတွေကို လက်ခံဆောင်ရွက်ပေးနေတယ်လို့ ဒုတိယဝန်ကြီးရဲ့ လွှတ်တော်တွင်း ဖြေကြားချက်အရ သိရပါတယ်။ ၂၀၁၉ ခုနှစ်အတွင်း ဖုန်းဘေလ် ဖြတ်တောက်ခံရတာတွေကြောင့် တိုင်ကြားလာတဲ့ အမှု ၃၀ ကို ဖြေရှင်း ဆောင်ရွက်ပေးခဲ့တဲ့အပြင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနကို တိုင်ကြားလာတဲ့ အမှုတွေကို စားသုံးသူ ကာကွယ်ရေးဥပဒေနှင့်အညီ ဖြေရှင်းဆောင်ရွက်ခဲ့ရာမှာ ၂၁၂ မှုကို ဖြေရှင်းပေးနိုင်ခဲ့တယ်လို့ ဒုတိယဝန်ကြီးရဲ့ အဆိုအရ သိရပါတယ်။
Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024