မန္တလေးတက္ကသိုလ် ကျောင်းသားသပိတ် ဖြေရှင်းပေးရန် ကျောင်းသားသမဂ္ဂ ၁၄ ခု ဆန္ဒပြ (ဓာတ်ပုံ)

မန္တလေးတက္ကသိုလ် ကျောင်းသားသပိတ် ချက်ချင်းဖြေရှင်းပေးဖို့ ရန်ကုန်အခြေစိုက် ကျောင်းသားသမဂ္ဂ ၁၄ ခု ပူးပေါင်းပြီး ရန်ကုန်တက္ကသိုလ်ဝင်းထဲမှာ ဒီနေ့ ဆန္ဒဖော်ထုတ်ခဲ့ကြပါတယ်။

မန္တလေးတက္ကသိုလ်ကျောင်းဝင်းအတွင်းက စားသောက်ဆိုင်တန်း Food Court တည်ဆောက်တာ တင်ဒါမခေါ်ဘဲ ဆောက်တယ်ဆိုပြီး မန္တလေးတက္ကသိုလ် ကျောင်းသားများသမဂ္ဂက ဦးဆောင်ပြီး ပြီးခဲ့တဲ့နှစ် စက်တင်ဘာက စတင် ဆန္ဒပြ သပိတ်မှောက်ခဲ့ကြတာပါ။

ဒီနောက် Food Court တည်ဆောက်တဲ့ကိစ္စကို စစ်ဆေးနိုင်ဖို့အတွက် ပညာရေးဝန်ကြီးဌာန ဒုတိယဝန်ကြီး ဦးဝင်းမော်ထွန်း ဦးဆောင်တဲ့ စစ်ဆေးရေးအဖွဲ့က ၂၀၁၉ စက်တင်ဘာ ၇ ရက်၊ ၈ ရက်နေ့တွေမှာ မန္တလေးတက္ကသိုလ်ပါမောက္ခချုပ်နဲ့အတူ တာဝန်ရှိသူတွေက မန္တလေးတက္ကသိုလ် ကျောင်းသားသမဂ္ဂအဖွဲ့တို့က တာဝန်ရှိသူကျောင်းသားကျောင်းသူများကို စစ်ဆေးခဲ့ပြီး ၄ လကျော်ကြာတဲ့အထိ အရေးယူအပြစ်ပေးချင်းမရှိတာကြောင့် ကျောင်းသားတွေက ဆက်လက် သပိတ်မှောက်နေကြတာလည်း ဖြစ်ပါတယ်။

Food Courtကို ပြီးခဲ့တဲ့နှစ် သြဂုတ်လပထမပတ်အတွင်းက ဖွင့်လှစ်ဖို့ ရှိခဲ့ပေမယ့် သပိတ်မှောက် ကန့်ကွက်မှုတွေကြောင့် ရပ်ဆိုင်းထားခဲ့ရပါတယ်။