တောင်ကြီးတွင် ယာဉ်တိုက်မှု လျော့ချရေး ဆိုင်ကယ်ဘက်မှန်တပ် ကမ်ပိန်းပြုလုပ်
DVB
·
January 18, 2020
တောင်ကြီးမြို့မှာ ဆိုင်ကယ်စီးသူတိုင်း ဆိုင်ကယ်ဦးထုပ်ဆောင်းပေမယ့် ယာဉ်တိုက်မှုအန္တရာယ်လျော့ချဖို့ ဆိုင်ကယ်ဘက်မှန်တပ် ဖို့လိုအပ်တဲ့အတွက် ပထမဆုံးအကြိမ် ဆိုင်ကယ်ဘက်မှန်တပ် ကမ်ပိန်း ပြုလုပ်ခဲ့ပါတယ်။
ကမ်ပိန်းကို အမှတ် ၁၈ ယာဉ်ထိန်းတပ်ဖွဲ့၊ ကညန၊ အရပ်ဘက်အဖွဲ့တို့ပူးပေါင်းပြီး ဘက်မှန်မပါတဲ့ ဆိုင်ကယ်စီးသူကိုတားပြီး ဘက်မှန်တပ်ပေးတာ၊ ရောင်ပြန်စတေကာတပ်တာ၊ လက်ကမ်းစာဆောင်ပေးတာ ယာဉ်မောင်းလိုင်စင်ပြုလုပ်ဖို့ ပညာပေးတာတွေ ပြုလုပ်ခဲ့တာလို့ တရားဥပဒေစိုးမိုးရေးကွန်ရက်အဖွဲ့ဝင် ကိုဝင်းနိုင်စိုးက ပြောပါတယ်။
တောင်ကြီးမြို့ဟာ နိုင်ငံတဝန်းမှာ ဆိုင်ကယ်စီးဦးထုပ်ဆောင်းပြီး ယာဉ်စည်းကမ်း လမ်းစည်းကမ်း လိုက်နာမှု အရှိဆုံးဖြစ်ပေမယ့် ဆိုင်ကယ်ဘက်မှန်တပ်ပြီးစီးတာ နည်းသေးတဲ့အတွက် ကမ်ပိန်းပြုလုပ်ရတာဖြစ်ပြီး အရေးယူတဲ့အပိုင်းတွေလည်းပြု လုပ်သွားမယ်လို့ (အမှတ် ၁၈ ယာဉ်ထိန်းတပ်ဖွဲ့မှူး ရဲမှူး ထွန်းနိုင်အောင်က ပြောပါတယ်။
ဒီကနေ့ ကမ်ပိန်းမှာ ဆိုင်ကယ်ဘက်မှန် အစုံ ၁၀၀ ကို အခမဲ့ တပ်ဆင်ပေးပြီး နောက်အမြဲတမ်း တပ်ဆင်အသုံးပြုဖို့လည်း တိုက်တွန်းနှိုးဆော်ထားပါတယ်။
ရှမ်းပြည်နယ် တောင်ပိုင်းမှာ ၂၀၁၉ ခုနှစ်က ယာဉ်မတော်တဆ ဖြစ်ပွားမှု ၅၀၃ မှု ရှိပြီး ဒဏ်ရာသူ ၇၉၄ ဦး၊ သေဆုံးသူ ၂၃၄ ဦးရှိကာ ဆုံးရှုံးမှုတန်ဖိုးက ၃၄၈ သိန်းရှိပါတယ်။
ယာဉ်တိုက်မှုဟာ ၂၀၁၈ ခုနှစ်က ၄၀၀ ကျော်သာရှိပြီး ၂၀၁၉ ခုနှစ်က ပိုများလာတယ်လို့ ဆိုပါတယ်။
ကမ်ပိန်းကို တောင်ကြီး မြို့ တက္ကသိုလ်ကျောင်းအနီး ဧရာဝတီ ကဖေးလမ်းဆုံနဲ့ အနောက်မြို့ပတ်လမ်း နဂါးပွက်ကျောင်းအနီးမှာ ပြုလုပ်ခဲ့ပါတယ်။
ခွန်ရာဇာ