Email This Story :
ရှမ်းပြည်မြောက်ပိုင်း ကျောက်မဲခရိုင် ကျောက်မဲမြို့နယ် မိုင်းငေါ့မြို့နယ်ခွဲမှာ ပြီးခဲ့တဲ့ ဇန်နဝါရီ ၆ ရက်နေ့က ရွာသား ၂ ဦး မိုင်းနင်းမိလို့ ဆေးရုံမှာ တက်ရောက်ကုသနေရပါတယ်။
ကျောက်မဲမြို့နယ် ကွင်းစလန်းကျေးရွာအုပ်စု ပန်လော့ရွာက ကိုထွန်းလူ၊ အိုက်ဟိန်းတို့ နှစ်ဦးဟာ ပြီးခဲ့တဲ့ ၆ ရက်နေ့က မိုင်းငေါ့မြို့မှာ ဆိုင်ကယ်ပစ္စည်းတွေ သွားဝယ်ပြီး ဆိုင်ကယ်နဲ့အပြန် မိုင်းငေါ့မှ ၄ မိုင်ခွဲအကွာ နမ့်တွေရွာနားမှာ လက်လုပ်မိုင်းထိမိတာလို့ ဒဏ်ရာရသူတွေကို အကူအညီပေးခဲ့တဲ့ ကျောက်မဲမြို့ ဇီဝိတဒါနလူမှုကူညီရေး အသင်း ဥက္ကဌ ဦးတင်မောင်သိန်းက ဒီဗွီဘီကို ပြောပါတယ်။
“ဖြစ်တာက ၆ ရက်နေ့ ညနေပိုင်းက၊ ကျောက်မဲဆေးရုံကိုတော့ မနေ့ညနေမှ ရောက်လာ တယ်။ သူတို့ရွာက မြို့နဲ့လည်းဝေးတယ်လေ။ သူတို့က ပန်လော့ရွာကနေ မိုင်းငေါ့မှာ ဈေးလာဝယ်နေကျ။ အဲဒီနေ့ နမ့်တွေရွာကနေ ကျော်လာပြီးတော့ လမ်းဘေးမှာ ထောင်ထားတဲ့ မိုင်းကို ဆိုင်ကယ်နဲ့ တိုက်မိတာ၊ ဆိုင်ကယ်က အရှိန်နဲ့ သွားတဲ့အတွက် သူတို့ လွန်ပြီးမှ ပေါက်ကွဲတယ်။ မိုင်းစတွေက သူတို့ ၂ ယောက်လုံးရဲ့ ဝဲဘက် ခြေထောက်တွေ၊ ခါးတွေ၊ လက်တွေ၊ တစ်တောင်ဆစ်၊ ခြေကျင်းဝတ်၊ လက်ကောက်ဝတ်တွေ ထိသွားတယ်။ ပြီးတော့ သူတို့ ၂ ယောက်လုံး အဲဒီမှာ မေ့လဲသွားကြတယ်။ ရွာသားတွေက လာတွေ့တော့ နမ့်တွေရွာကို ခေါ်သွားတယ်။ ရှေးဦးသူနာပြုစုပေးပြီး မိုးချုပ်သွားတယ်။ နောက်နေ့မနက် (ဇန်နဝါရီ ၇ ရက် မနက်)မှ ကျနော်တို့ကို အကြောင်းကြားလာလို့ အိုတမာပလောင် လူမှုကူညီရေးအသင်းနဲ့ ဆက်သွယ်ပြီး ကျောက်မဲဆေးရုံကို သယ်လာခဲ့တာပါ။ ခရီးကဝေးပြီး လမ်းလည်းကြမ်းတော့ ညနေမှရောက်လာကြတယ်။”
ကျောက်မဲမြို့နယ်ထဲမှာ ပြီးခဲ့တဲ့နှစ်ကလည်း ရွာသားတွေ လက်ဖက်ခြံသွားရင်း၊ ဈေးသွားရင်း မိုင်းနင်းမိကာ အသက်ဆုံးရှုံးဒဏ်ရာရခဲ့တာတွေရှိခဲ့ပါတယ်။
အဲဒီဒေသမှာ တီအန်အယ်လ်အေ ပလောင်တပ်၊ အက်စ်အက်စ်အေ တောင်ပိုင်းနဲ့ မြောက်ပိုင်း ရှမ်းတပ် ၂ ဖွဲ့ နဲ့ မြန်မာ့တပ်မတော်တို့ လှုပ်ရှားလျက်ရှိပြီး မကြာမကြာ ထိတွေ့ပစ်ခတ်မှုတွေလည်း ရှိနေတယ်လို့ ကျောက်မဲဒေသခံတွေက ပြောပါတယ်။
ဓာတ်ပုံ- ဦးတင်မောင်သိန်း
