စာသင်ကာလတိုးမြှင့်မှုကို ကန့်ကွက်သည့်အနေဖြင့် ဖဲကြိုးစိမ်းလှုပ်ရှားမှုပြုလုပ်
1.4K
ပညာရေးဝန်ကြီးဌာနကနေ အခြေခံပညာစာသင်ကျောင်းတွေကို မတ်လအကုန်အထိ စာသင်ကာလ တိုးမြှင့်လိုက်တဲ့အပေါ် ကန့်ကွက်တဲ့အနေနဲ့ ဖဲကြိုးစိမ်းလှုပ်ရှားမှုကို ဇန်နဝါရီ ၈ ရက်နေ့က ရန်ကုန်ပညာရေးတက္ကသိုလ်မှာ ပြုလုပ်ခဲ့ပါတယ်။
ဖဲကြိုးစိမ်းလှုပ်ရှားမှုကိုတော့ ရန်ကုန်ပညာရေးတက္ကသိုလ် ကျောင်းသားများသမဂ္ဂက ဦးဆောင်လုပ်ဆောင်တာဖြစ်ပြီး ကျောင်းသား/ကျောင်းသူတွေကို ဖဲကြိုးစိမ်းတွေ မျှဝေပေးခဲ့ပါတယ်။
ပညာရေးဝန်ကြီးဌာန တာဝန်ရှိသူတွေအနေနဲ့ အခြေခံပညာရေးလုပ်ငန်းခွင်မှ ဆရာ/ဆရာမတွေ၊ ဝန်ထမ်းတွေနဲ့ ကျောင်းသားတွေရဲ့ သဘောထားတွေကို ကောက်ခံမှုမရှိဘဲ မိမိတို့သဘောဆန္ဒအရ အခုလို စာသင်ကာလတိုးမြှင့်လိုက်တာဟာ ဆရာတွေ၊ ဝန်ထမ်းတွေနဲ့ ကျောင်းသားအားလုံးအတွက် အခက်အခဲဖြစ်နိုင်တာကြောင့် ကန့်ကွက်ရတာလို့ ဖဲ ကြိုးစိမ်းလှုပ်ရှားမှု ဦးဆောင်ကော်မတီရဲ့ ကော်မတီဝင်တဦးဖြစ်တဲ့ ကိုအောင်ပြည့်စုံဖြိုးက ဒီဗွီဘီကို ပြောပါတယ်။
ဖဲကြိုးစိမ်းလှပ်ရှားမှု ဦးဆောင်ကော်မတီအနေနဲ့ တနိုင်ငံလုံးမှာရှိတဲ့ ပညာရေး တက္ကသိုလ်တွေနဲ့ ပညာရေးကောလိပ်တွေမှာ ဖဲကြိုးစိမ်းလှုပ်ရှားမှုတွေကို ဇန်နဝါရီလ ၇ ရက်နေ့ကနေ စတင်လုပ်ဆောင်နေတာ ဖြစ်ပါတယ်။
ပညာရေးဝန်ကြီးဌာနကနေ ဆရာ/ဆရာမတွေ၊ ဝန်ထမ်းတွေနဲ့ ကျောင်းသားသမဂ္ဂ အဖွဲ့အစည်းတွေ နဲ့ ညှိနှိုင်းတိုင်ပင်ပြီး စာသင်ကာလအသစ် ပြန်လည်သတ်မှတ်တဲ့အချိန်မှသာ ဖဲကြိုးစိမ်းလှုပ်ရှားမှုကို ရပ်နားသွားမယ်လို့ ဇန်နဝါရီလ ၆ ရက်နေ့က ဖဲကြိုးစိမ်းလှုပ်ရှားမှု ဦးဆောင်ကော်မတီက သဘောထားထုတ်ပြန်ကြေညာထားပါတယ်။
အခြေခံပညာမှာ စာသင်ကာလတိုးမြှင့်တဲ့အပေါ် ပညာရေးကျောင်းသားသမဂ္ဂတွေက ဖဲကြိုးစိမ်းလှုပ်ရှားမှုတွေ လုပ်ဆောင်သလို မြန်မာနိုင်ငံ ဆရာ/ဆရာမများအဖွဲ့ချုပ် အပါအဝင် ဆရာသမဂ္ဂတွေကလည်း ကန့်ကွက်ကြောင်းကြေညာချက်တွေ ထုတ်ပြန်ထားပါတယ်။
