ကျောက်မျက် ကျောက်စိမ်းပွဲပြုလုပ်၊ ကျပ်သန်း ၄ သောင်းခန့် ရောင်းချနိုင်မည်ဟု မျှော်မှန်း
1.1K
မြန်မာကျပ်ငွေနဲ့ ရောင်းချတဲ့ ကျောက်မျက်၊ ကျောက်စိမ်းပွဲကို နေပြည်တော်ရှိ မဏိရတနာကျောက်စိမ်းခန်းမမှာ ဖေဖော်ဝါရီ ၂ ရက်နေ့ကနေ ၇ ရက်နေ့ထိ ပြုလုပ်နေပြီး ကျပ်သန်း ၄ သောင်းဖိုးလောက်အထိ ရောင်းချနိုင်မယ် မျှော်မှန်းထားတယ်လို့ သိရပါတယ်။
ဒီပွဲမှာ ကျောက်မျက်အတွဲပေါင်း ၂၈၆ တွဲ၊ ကျောက်စိမ်းအတွဲပေါင်း ၃၆၉၅ တွဲတို့ကို အိတ်ဖွင့်တင့်ဒါစနစ်နဲ့ ရောင်းချနေတယ်လို့ မြန်မာ့ကျောက်မျက်ရတနာရောင်းဝယ်ရေးလုပ်ငန်း ခေတ္တဦးဆောင်ညွှန်ကြားရေးမှူး ဦးမင်းသူက ပြောပါတယ်။
“ဒီနှစ်ကျောက်တွဲတွေရဲ့ အခြေအနေကြည့်ရတာကတော့ အရပ်အခေါ် ခါးပိုင်းကျောက်တွေပေါ့၊ အများလုပ်ငန်းသုံးပေါ့၊ အချောထည်ထုတ်လုပ်မဲ့သူတွေ၊ ကျောက်နဲ့ပတ်သက်ပြီး စိတ်ဝင်စားတဲ့သူတွေအတွက် အဆင်ပြေမဲ့အနေအထားရှိပါတယ်။ ဒါကြောင့် ကျနော်တို့ မှန်းတာကတော့ ကျပ်သန်း ၄ သောင်းဝန်းကျင်တော့ ဖြစ်နိုင်မယ်။ သို့သော်လည်း ကျောက်ရဲ့အခြေအနေတွေက အတိအကျကြီးတော့ပြောဖို့ခက်တာပေါ့။”
ကျောက်မျက်ပြပွဲတွေကို တနှစ်မှာ ယူရိုပွဲ ၂ ကြိမ်၊ ကျပ်ငွေပွဲ ၂ ကြိမ် ကျင်းပဖို့ စီစဉ်နေတယ်လို့ ဆိုပါတယ်။
၂၀၁၉ ခုနှစ်ကပြုလုပ်ခဲ့တဲ့ မြန်မာကျပ်ငွေပွဲမှာ အတွဲပေါင်း ၃၁၀၀ ကျော်ခင်းကျင်းပြသခဲ့ပြီး ကျပ်သန်း ၅ သောင်းကျော် ရောင်းချခဲ့ရတယ်လို့ ဆိုပါတယ်။
