ယာဉ်မောင်းအိပ်ငိုက်ပြီး ကားမှောက်ရာက တရားမဝင် ဘင်္ဂါလီ ၄ ဦး ဖမ်းဆီးရမိ
DVB
·
December 31, 2019
ပဲခူးတိုင်း၊ တောင်ငူမြို့နယ် နေပြည်တော်-ရန်ကုန် အမြန်လမ်းမကြီး မိုင်တိုင်၁၄၆/၆ နဲ့ ၁၄၆/၇ အကြားမှာ ဒီနေ့မနက် ၆ နာရီခွဲက အိမ်စီးစလွန်းကားတစ်စီးဟာ ယာဉ်မောင်းအိပ်ငိုက်ပြီး တိမ်းမှောက်ရာက တရားမဝင်ခိုးသွင်းလာတဲ့ ဘင်္ဂါလီ ၄ ယောက်ကို ဖမ်းဆီးရမိခဲ့တယ်လို့ နယ်မြေရဲစခန်းက ပြောပါတယ်။
ဇီးပင်သာ အမြန်လမ်းရဲစခန်းက စခန်းမှူး ရဲအုပ် မင်းမနိုင်က "မနက်က ၆ နာရီခွဲလောက်က ဖြစ်တာ၊ ကားမှောက်တော့ ဘင်္ဂါဘီနှစ်ယောက် ဒဏ်ရာရ တယ်။ နေပြည်တော်ကို (refer)လုပ်ထားတယ်။ နောက်အမျိုးသမီးတယောက် ဒဏ်ရာရတယ်။ ကားပေါ်မှာက ယောက်ျားလေး ၅ ယောက်နဲ့ မိန်းလေး တယောက်ပါတယ်။ အားလုံးပေါင်း ၆ ယောက်ပေါ့ဗျာ။ ၃ ယောက်ဒဏ်ရာရတယ်။ တယောက်ပွဲချင်းပြီး သေတယ်။ ၂ ယောက်က ဘာမှ မဖြစ်ဘူး။ သေတာက ယာဉ်မောင်းရဲမင်း"လို့ ပြောပါတယ်။
ယာဉ်မောင်း ရဲမင်းမောင်းနှင်လာပြီး ရန်ကုန်နေ မခိုင်သဇင် (၂၂)နှစ်၊ မြောက်ဦးမြို့နယ်မှာ ယိုင်သည်ရွာမှာနေတဲ့ မာဘူး၊ ဆော်ယောက်၊ မတူဖိုလ်၊ စီဒီကူရ်ရာဟာမန်း တို့လိုက်ပါလာတဲ့ Toyota Corona (ခဲရောင်)ယာဉ်ဟာ ဒီကနေ့က နေပြည်တော်- ရန်ကုန် လမ်းပိုင်းမိုင်တိုင် ၁၄၆/၆ နဲ့ ၁၄၆/၇ အကြားမှာ ယာဉ်မောင်းအိပ်ငိုက်ပြီး အရှိန်လွန်ကာ လမ်းလယ်ကျွန်းပေါ်ရှိထန်းပင်ကို ဝင်တိုက်မိပြီး တိမ်းမှောက်ခဲ့တာဖြစ်ပါတယ်။
ယာဉ်တိမ်းမှောက်မှုကြောင့် ယာဉ်မောင်း ရဲမင်းမှာ အခင်းဖြစ်နေရာမှာ ဆုံးသွားခဲ့ပြီး မခိုင်သဇင်ကတော့ ဝဲဘက်ခြေသလုံးရိုးကျိုးကာ ယာလက်ခုံနဲ့ ဦးခေါင်းပိုင်း ဒဏ်ရာရသွားကာ မာဘူးက နဖူးပေါက်ပြဲဒဏ်ရာ၊ ယာနားပေါက်ပြဲဒဏ်ရာနဲ့ ဆော်ယောက်မှာ မျက်နှာပေါက်ပြဲဒဏ်ရာ၊ နှာခေါင်းသွေးထွက်ဒဏ်ရာတွေ ရရှိခဲ့ပါတယ်။
သတင်း - သားကြီး