ကျိုက်မရောမြို့နယ်တွင် မီးလောင်မှုကြောင့် လေဖြတ်ရောဂါသည် ၁ ဦး သေဆုံး
DVB
·
December 23, 2019
မွန်ပြည်နယ်၊ ကျိုက်မရောမြို့နယ်၊ လက်ပံကျေးရွာမှာ ဒီဇင်ဘာ ၂၂ ရက် နေ့လယ် ၁ နာရီခွဲလောက်က မီးလောင်မှုဖြစ်ပွားပြီး နေအိမ် ၁၅ လုံး ပျက်စီးဆုံးရှုံးခဲ့တယ်လို့ မွန်ပြည်နယ် မီးသတ်ဦးစီးဌာန ပြည်နယ်ဦးစီးမှူး ဦးတင်မောင်နီက ဒီဗွီဘီကို ပြောပါတယ်။
မီးလောင်မှုကြောင့် လေဖြတ်ရောဂါ ခံစားနေရတဲ့ အသက် ၅၀ အရွယ် အမျိုးသား တစ်ဦး မီးထဲပါသွားခဲ့ပြီး မော်လမြိုင်ပြည်သူ့ဆေးရုံအရောက်မှာ သေဆုံးခဲ့တာပါ။
နေအိမ်ရှိ လျှပ်စစ်မီးဖို အပူလွန်ကဲရာကနေ မီးလောင်မှု စတင် လောင်ကျွမ်းခဲ့တာဖြစ်ပြီး မီးလောင်မှု ဖြစ်စဉ်ကြောင့် လူပေါင်း ၈၀ နီးပါး မီးဘေးသင့်ခဲ့ရပါတယ်။
လက်ရှိမှာတော့ မီးလောင်ပျက်စီးခဲ့တဲ့ နေအိမ် တလုံးစီအတွက် ငွေကျပ် ၂ သိန်းစီ ထောက်ပံ့ကူညီ ပေးထားတယ်လို့ ကျိုက်မရောမြို့နယ် အုပ်ချုပ်ရေးမှူး ဦးကျော်မြင့်က ပြောပါတယ်။
အခုမီးလောင်မှုကြောင့် ကာလတန်ဖိုးမှာ ကျပ်သိန်းပေါင်း ၁၃၀ လောက် ပျက်စီးဆုံးရှုံးခဲ့တယ်လို့ မွန်ပြည်နယ် မီးသတ်ဦးစီးဌာနက သိရပါတယ်။
