Homeမြန်မာသတင်း
လယ်ယာမြေ စီမံခန့်ခွဲရေးနှင့် စာရင်းအင်းဦးစီးမှူး ၁ ဦးကို အဂတိလိုက်စားမှုဖြင့် အမှုဖွင့်
လယ်ယာမြေ စီမံခန့်ခွဲရေးနှင့် စာရင်းအင်းဦးစီးမှူး ၁ ဦးကို အဂတိလိုက်စားမှုဖြင့် အမှုဖွင့်
DVB
·
December 2, 2019
စွန့်လွှတ်ပြီးတဲ့ သိမ်းဆည်းခံလယ်တွေ လုပ်ပိုင်ခွင့်ရဖို့အတွက် လာဘ်စားခဲ့တယ်ဆိုတဲ့ စွပ်စွဲချက်နဲ့ လယ်ယာမြေ စီမံခန့်ခွဲရေးနဲ့ စာရင်းအင်းဦးစီးဌာန ဦးစီးမှူးတယောက်ကို အဂတိလိုက်စားမှုနဲ့ အမှုဖွင့်လိုက်ပါ တယ်။
မွန်ပြည်နယ်၊ ရေးမြို့နယ်၊ အံဒင်ကျေးရွာအုပ်စုမှာ တပ်မတော်က ပြန်လည်စွန့်လွှတ်ခဲ့တဲ့ သိမ်းဆည်းခံလယ်ယာမြေ ၄၅၃ ဧကကို ပြန်ရဖို့အတွက် မြို့နယ်လယ်ယာမြေစီမံခန့်ခွဲရေးနဲ့ စာရင်းအင်းဦးစီးဌာန ဒုတိယဦးစီးမှူး (ဦးစီးမှူးတာဝန်) ဦးဝင်းအောင်က တဧကကို ကျပ် တသိန်း ပေးရင် ပြန်ပေးမယ်ဆိုတာကြောင့် မူလလယ်ပိုင်ရှင်တွေက ကျပ်သိန်း ၅၀ ပေးခဲ့ရတယ်ဆိုပြီး အဂတိလိုက်စားမှုတိုက်ဖျက်ရေးကော်မရှင်ကို တိုင်ကြားလာခဲ့တာပါ။
စစ်ဆေးရာမှာတော့ ဦးဝင်းအောင်ဟာ အဲဒီလယ်မြေတွေထဲက မူလပိုင်ရှင်တွေဆီက ဝယ်ယူခဲ့တယ်ဆိုတဲ့ စာချုပ်တွေပြပြီး လယ်ယာမြေ လုပ်ပိုင်ခွင့်ပြုလက်မှတ် ပုံစံ ၇ ရရှိရေး လျှောက်ထားတင်ပြလာသည့် လယ်ပိုင်ရှင် ၁၄ ယောက်ဆီကနေ ကျပ်သိန်း ၂၀၀ တောင်းခံခဲ့တာ ပေါ်ပေါက်ခဲ့တယ်လို့ ကော်မရှင်က ဆိုပါတယ်။
ဒီထဲက ကျပ်သိန်း ၁၀၀ ကို ၃ ကြိမ်ခွဲယူခဲ့တာ စစ်ဆေးပေါ်ပေါက်တာကြောင့် ဦးဝင်းအောင်ကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၆ အရ ရေးမြို့မရဲစခန်း ဒီနေ့ ပထမသတင်းပေး တိုင်ကြားချက်ဖွင့်လှစ်ပြီး တရားစွဲဆို အရေးယူနိုင်ရေး ဆောင်ရွက်နေပါတယ်။