“စိုးစိတ်တိုးတိတ်လွမ်းချိန်”(သို့)အလွမ်းသီချင်းသည် -အက်စတာဒေါ့သ်ချင်းဆုန်(ရုပ်သံ)

“အို မင်းကလေးကို စိုးစိတ်တိုးတိတ် လွမ်းချိန်မှာ… ကိုယ် မြတ်နိုးတဲ့ သီချင်းလေး များစွာ တိုင်တည်နေမှာပါ… ဒါကို သိစိတ်အတွင်းက မရည်ရွယ်လည်း… မသိစိတ်ထဲက ရည်ရွယ်ထား”

ဒါကတော့ တေးရေးညီညီသွင်ရေးစပ်ပေးထားပြီး ကွယ်လွန်သွားခဲ့ပြီဖြစ်တဲ့ နာမည်ကြီး တေးသံရှင် စိုးလွင်လွင်ရဲ့ “စိုးစိတ်တိုးတိတ်လွမ်းချိန်”အမည်ရတဲ့ သီချင်းထဲက စာသားတွေဖြစ်ပြီး ဒီတခါမှာတော့ မြန်မာအိုင်ဒေါသီချင်းဆိုပြိုင်ပွဲရဲ့ စင်မြင့်ထက်မှာ တကျော့ပြန်နားဆင်ခဲ့ကြရတာပါ။

ဒီသီချင်းနဲ့ အလွမ်းသီချင်းသည်လေးတဦးလို အစွမ်းပြယှဉ်ပြိုင်ခဲ့သူကတော့ ချင်း တိုင်းရင်းသူ ပြိုင်ပွဲဝင် အက်စတာဒေါ့သ်ချင်းဆုန်ပဲ ဖြစ်ပါတယ်။

ပဉ္စမမြောက်သီတင်းပတ်အနေနဲ့ မနေ့ညက ကျင်းပခဲ့တဲ့ မြန်မာအိုင်ဒေါ သီချင်း ဆိုပြိုင်ပွဲမှာတော့ တချိန်က နာမည်ကြီး တေးသံရှင် စိုးလွင်လွင်ရဲ့ သီချင်းတွေနဲ့အတူ ပြိုင်ပွဲဝင် Top Finalists ၇ ယောက်ဖြစ်ကြတဲ့ ယောကီး၊ ဘင်ဂျမင်ဆုန်း၊ နော်စေးစေးထူး၊ ထက်အဉ္စလီ၊ အက်စတာဒေါ့သ်ချင်းဆုန်၊ မူးလာနဲ့ အေးမြဖြူတို့က အစွမ်းပြ ယှဉ်ပြိုင်ခဲ့ ကြတာပါ။

ချင်းတိုင်းရင်းသူလေး အက်စတာဟာ မြန်မာအိုင်ဒေါရဲ့ Performance Show မှာ တော့ တေးသံရှင် ချောစုခင်ရဲ့ ‘ကိုယ့်အတွက်အိပ်မက်မင်းမက်လား’၊ ဒုတိယ သီတင်း ပတ် Rock Week မှာတော့ တေးသံရှင် ကော်နီရဲ့ ‘ရင်ကိုဖွင့်လိုက်စမ်း’၊ အမှတ်တရ တ က္ကသိုလ်သီချင်းတွေနဲ့ တတိယသီတင်းပတ်မှာတော့ တေးသံရှင်မဒီရဲ့ ‘အချစ်တွေနဲ့ လွမ်း နေတယ်’၊ ကန်းထရီးကျေးလက်သီချင်းတွေနဲ့ စတုတ္ထသီတင်းပတ်မှာတော့ အဆိုတော် သရုပ်ဆောင်မင်းသား စိုးသူရဲ့ ‘ဘရိတ်မပါတဲ့ကား’သီချင်းတွေနဲ့ အစွမ်းပြ ယှဉ်ပြိုင်ခဲ့ ပြီး တဆင့်ပြီးတဆင့် တက်လှမ်းလာ နိုင်ခဲ့တာပါ။

“မင်းကလေးနဲ့ စကား ပြောဖြစ်တဲ့… အချိန်အခါ တွေတိုင်း… အို ထူးဆန်းတဲ့ ရင်ခုန်သံတွေ ခံစား… နေရတဲ့ ခဏကို နှစ် ခြိုက်မိပါတယ်… တို့ ဘဝကို လွှမ်းမိုးလွန်း သူရေ… မင်းကလေးနဲ့တို့နဲ့ကြားက ခင်မင်မှုစည်း… အို တိုးရှေ့သို့ ကိုယ်ဝင်လာချင် ပေမယ့်… မပျော်ရဲတဲ့ ဘဝမှာ အားနည်း ချက်တွေနဲ့… မပြောရဲပါ နှုတ်ဆိတ်လို့ ငြိမ် သက်”

ခုသီတင်းပတ်ရဲ့ စိုးလွင်လွင်သီချင်းတွေနဲ့ ညမှာလည်း အက်စတာက သူ့ရဲ့ ကိုယ် ပိုင်သီဆိုဟန်၊ စတိုင်အပြည့်နဲ့ ပရိသတ်တွေကိုရော ဒိုင်တွေကိုပါ ဖမ်းစားထားနိုင်ခဲ့ပါ တယ်။

သီဆိုယှဉ်ပြိုင်မှုသီချင်းအဆုံးမှာတော့ ဒိုင်တွေက မှတ်ချက်ပေးခဲ့ချိန်မှာတော့ ဒိုင် တွေထဲက တဉီးဖြစ်တဲ့ ဖြူဖြူကျော်သိန်းက “ညီမလေးဆိုသွားတာ တကယ့်ကို ခံစား သက်ဝင်မှုက နောက်ထပ် ပုံစံအသစ်တခု အရသာတခုနဲ့ Interpretation တခုကို ပေး သွားနိုင်တယ်။ Bravo သမီး”လို့ မှတ်ချက်ပေးသွားခဲ့ပြီး အောင်ကိုလတ်ကတော့ “စိုးလွင် လွင်ရဲ့ သီချင်းကို Variation အနေနဲ့ ပြန်ဆိုတဲ့ အက်စတာကတော့ လုံးဝ ကြောက်စရာ ကြီးပါ”လို့ ချီးကျူးမှတ်ချက်တွေ ပေးခဲ့ကြတာပါ။

ပရိသတ်တွေရဲ့ မဲပေးရွေးချယ်မှုနဲ့ အဆုံးအဖြတ်ပေးမယ့် အခုညရဲ့ Result Show မှာတော့ ပြိုင်ပွဲဝင် Top finalists ၇ ယောက်ထဲက ဘယ်ပြိုင်ပွဲဝင်တွေက နောက်တဆင့် ဆက်လက်ပြီးတော့ တက်လှမ်းသွားနိုင်မလဲ၊ သူတို့ထဲက ဘယ်သူက ပြိုင်ပွဲကနေ လက်ပြ နှုတ်ဆက်သွားရမလဲ ဆိုတာကိုတော့ စောင့်မျှော်ကြည့်ရှုကြရမှာပဲ ဖြစ်ပါတယ်။