Lead Story ငြိမ်းချမ်းရေး နိုင်ငံရေး သတင်း
ပြည်ထောင်စု ငြိမ်းချမ်းရေး အကောင်အထည်ဖော်နိုင်မည်ဟု အမျိုးသားနေ့တွင် သမ္မတပြော
Email This Story :
အမျိုးသားရေးစိတ်ဓာတ်နဲ့ ပြည်ထောင်စုစိတ်ဓာတ်တွေ အစဉ်ရှိနေမယ်ဆိုရင် ပြည်ထောင်စု ငြိမ်းချမ်းရေးကို အကောင်အထည်ဖော်နိုင်မယ်လို့ ယုံကြည်တဲ့အကြောင်း နိုင်ငံတော် သမ္မတ ဦးဝင်းမြင့်က ပြောကြားလိုက်ပါတယ်။
တန်ဆောင်မုန်းလပြည်ကျော် ၁၀ ရက် ဒီကနေ့ ကျရောက်တဲ့ ၉၉ နှစ်မြောက် အမျိုးသားအောင်ပွဲနေ့ အထိမ်းအမှတ် အခမ်းအနားကို ပေးပို့တဲ့ သဝဏ်လွှာမှာ ပြောသွားတာဖြစ်ပါတယ်။
“နိုင်ငံတော်အစိုးရအနေဖြင့် တစ်မြေတည်းနေ တစ်ရေတည်းသောက် တိုင်းရင်းသားများအတွက် ပြည်ထောင်စုငြိမ်းချမ်းရေးကို မရမနေ တည်ဆောက်ရာတွင် အမျိုးသားရေးစိတ်ဓာတ်မှာ လွန်စွာအဓိကကျပါသည်။ တိုင်းပြည်နှင့် လူမျိုးအကျိုးကို ထာဝရသယ်ပိုးလိုသည့် အမျိုးသားရေးစိတ်ဓာတ်၊ ဥမကွဲသိုက်မပျက် အတူတကွ အေးချမ်းစွာနေထိုင်လိုသည့် ပြည်ထောင်စု စိတ်ဓာတ်များ အစဉ်ကိန်းအောင်းနေမည်ဆိုပါလျှင် ပြည်ထောင်စုငြိမ်းချမ်းရေး ကို အကောင်အထည်ဖော်နိုင်မည်ဟု အလေးအနက်ယုံကြည်ပါသည်။” လို့ သမ္မတရဲ့ သဝဏ်လွှာမှာ ဖော်ပြပါတယ်။
ယနေ့အချိန်အခါဟာ အမျိုးသားရေးစိတ်ဓာတ်အခြေခံနဲ့ တိုင်းရင်းသား သွေးစည်းညီညွတ်မှုခိုင်မြဲရေး၊ တိုင်းရင်းသားတို့ရဲ့ စုပေါင်းစွမ်းအားနဲ့ ဒီမိုကရေစီဖက်ဒရယ်ပြည်ထောင်စုကြီး တည်ဆောက်ရေးတို့ကို ပြည်သူ တရပ်လုံးက စွမ်းစွမ်းတမံ အကောင်အထည်ဖော်ကြရမယ့် အချိန်ရောက်နေပြီလို့လည်း သမ္မတ ဦးဝင်းမြင့်က ပြောပါတယ်။
ရန်ကုန်တက္ကသိုလ်အက်ဥပဒေကို ကျောင်းသားတွေက စတင်သပိတ် မှောက်ခဲ့တဲ့ တန်ဆောင်မုန်းလပြည့်ကျော် ၁၀ ရက်နေ့ကို အမျိုးသားအောင်ပွဲနေ့အဖြစ် ၁၉၂၁ ခုနှစ်က မန္တလေးမြို့မှာ ကျင်းပခဲ့တဲ့ ဂျီစီဘီအေအသင်းကြီးရဲ့ နဝမအကြိမ်ညီလာခံမှာ အတည်ပြုဆုံးဖြတ်ခဲ့ တာပါ။
အမျိုးသားအောင်ပွဲနေ့ အထိမ်းအမှတ်အခမ်းအနားတွေကို နေပြည်တော်အပါအဝင် နိုင်ငံတဝန်းက မြို့တွေ နယ်တွေအသီးသီးမှာ ကျင်းပပါတယ်။
