ကျောက်ဆည်တွင် သံဃာနှင့် သီလရှင်အပါး  ၂၅၀၀ ကျော်ကို ဆွမ်းဆန်စိမ်းလောင်းလှူ

ဝေဘူ ရတနာသုံးပါးပူဇော်ပွဲနဲ့ ဆွမ်းဆန်စိမ်းလောင်းလှုပွဲကြီးကို ပထမ ဝေဘူဆရာတော် ဘုရားကြီး သက်တော်ထင်ရှားရှိစဉ်ကပင် ကျင်းပလာခဲ့ပြီး ၅၉ ကြိမ်မြောက်အဖြစ် ဝေဘူ ရတနာသုံးပါးပူဇော်ပွဲနဲ့ ဆွမ်းဆန်စိမ်းလောင်းလှူပွဲကြီးကို မန္တလေးတိုင်းဒေသကြီး ကျောက်ဆည်ခရိုင် ကျောက်ဆည်မြို့ ဝေဘူချောင် ကျောင်းတိုက်ဝန်းအတွင်းမှာ နှစ်စဉ် စည်ကားသိုက်မြိုက်စွာ ကျင်းပခဲ့ပါတယ်။

အခုလိုဝေဘူ ရတနာသုံးပါးပူဇော်ပွဲနဲ့ ဆွမ်းဆန်စိမ်းလောင်းလှူပွဲကြီးကို ကျောက်ဆည်ခရိုင် အတွင်းက ကျောက်ဆည်၊ စဉ့်ကိုင်၊  မြစ်သား။ တံတားဦး၊မြို့နယ်တို့က ကျောင်းတိုက်အသီးသီးမှာ သတင်းသုံးနေကြတဲ့ ဆရာတော်ကြီး သံဃာတော်များ သီလရှင်များကို ပင့်ဖိတ်ကာ သံဃာတော် အပါး ၂၀၀၀ ကျော် သီလရှင်ယောဂီ ၅၀၀ ကျော်တို့ကိုလှူဒါန်းလောင်းလှူခဲ့ကြပါတယ်။

ကျောက်ဆည်မြို့နေထိုင်သူ မနွယ်နီဦးက “ကျမတို့ အဘိုးအဘွားလက်ထက် ကတည်းက ဆရာတော်ကြီး ဦးစီးကျင်းပတဲ့ ဒီဆွမ်းဆန်စိမ်လး လောင်းလှူပွဲကို လှူခဲ့ကြတာပါ။ မိဘဘိုးဘွားတွေ အမွေကို ဆက်လက်ထိန်းသိမ်းတာလည်း ဖြစ်ပါတယ်။ ဝေဘူဆရာတော်ဘုရားကြီးကိုလည်း ရည်မှန်းပြီး ပူဇော်ကန်တော့လှူဒါန်းတာပါ။ ပင့်ဖိတ်ခြင်းမခံရဘဲ ရောက်လာတဲ့ဆရာတော်တွေကိုလည်း တတ်နိုင်သလောက် လှူတာပါ”လို့ ပြောပါတယ်။

ပင့်ဖိတ်ထားခြင်းမရှိပေမဲ့ကြွရောက်လာတဲ့ သံဃာတော် သီလရှင်များကိုပါ ရပ်ဝေးရပ်နီးက စေတနာရှင် အလှုရှင်များ ကျောက်ဆည်မြို့ရဲ့ မြို့မိမြို့ဖများစေတနာရှင် အလှူရှင်တွေက ဆွမ်းဆန်စိမ်းအပါအဝင် ဝတ္ထုငွေနဲ့ လှူဖွယ်ပစ္စည်းတွေကို လောင်းလှူခဲ့ကြပါတယ်။

စောင်၊ ထီး၊ သင်္ကန်း၊ သပိတ်၊ ဝတ္ထုငွေ စတဲ့ လှူဒါန်းမှုအစုစုတို့ကို လှူဒါန်းခဲ့တဲ့ စေတနာရှင် အလှူရှင်အားလုံးကို တတိယဝေဘူဆရာတော်ဘုရားကြီး ဘဒ္ဒန္တ ဉာဏိန္ဒက ရေခဲဓမ္မာရုံအတွင်းမှာ ရေစက်ချအမျှဝေခဲ့ပါတယ်။