ဘာသာရေးပဋိပက္ခများကို တားဆီးကာကွယ်ရန် အတိုင်ပင်ခံပုဂ္ဂိုလ်တိုက်တွန်း
DVB
·
November 15, 2019
ဘာသာရေးဆိုင်ရာ ပဋိပက္ခတွေကို တားဆီးကာကွယ်ကြဖို့နဲ့ ပဋိပက္ခဖြစ်ပွားရာ နယ်မြေဒေသတွေမှာ ဒုက္ခရောက်ရသူတွေကို ကာကွယ်စောင့်ရှောက်ပေးဖို့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က တိုက်တွန်းလိုက်ပါတယ်။
နိုဝင်ဘာ ၁၄ ရက်က နေပြည်တော်မှာ ကျင်းပတဲ့ မြန်မာနိုင်ငံမှာ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးအတွက် ဘာသာ ပေါင်းစုံ ငြိမ်းချမ်းရေး (ငြိမ်းချမ်းမေတ္တာ)အဖွဲ့ရဲ့ တတိယအကြိမ် အကြံပြုဆွေးနွေးဝိုင်းမှာ တက်ရောက် မိန့်ခွန်းပြောရာမှာ ထည့်သွင်းပြောသွားတာပါ။
နိုင်ငံတော် အတိုင်ပင်ခံပုဂ္ဂိုလ်က ဘာသာရေးဆိုင်ရာ ပဋိပက္ခတွေကို တားဆီး ကာကွယ်ကြရမှာဖြစ်ကြောင်း၊ ပဋိပက္ခဖြစ်ပွားရာ နယ်မြေဒေသအတွင်း ဒုက္ခ ရောက်ရသူတွေကို ကာကွယ်စောင့်ရှောက် အကူအညီ ပေးရမှာဖြစ်ကြောင်း၊ ပြန်လည်ထူထောင်ရေး အစီအစဉ်တွေကို သွက်သွက် လက်လက် ထိထိရောက်ရောက်အကောင်အထည်ဖော် ပေးကြရမှာဖြစ်ကြီး မိမိတို့ ကိုးကွယ်ရာဘာသာကြီးတွေဟာ တဦးနဲ့တဦးအပေါ် ယုံကြည်မှုနဲ့အတူ လက်တွဲ လုပ်ဆောင်ခြင်းနဲ့ မိမိတို့နိုင်ငံတော်ထူထောင်ရေးအတွက် တတပ်တအား ပါဝင်ကူညီကြဖို့ သွင်သင်ဆုံးမပေးနိုင်မှာ ဖြစ်ကြောင်း ပြောသွားပါတယ်။
ဒီဆွေးနွေးပွဲတွေဟာ မြန်မာနိုင်ငံရှိ မတူကွဲပြားတဲ့ ကိုးကွယ်ယုံကြည်မှုတွေအကြား အပြန်အလှန် လေးစားမှုနဲ့ အပြန်အလှန်နားလည်မှုတို့ တိုးတက်ဖြစ်ပေါ် လာခြင်းဖြင့် မိမိတို့လူ့အဖွဲ့အစည်းအတွင်း ငြိမ်းချမ်းရေးဖွံ့ဖြိုးတိုးတက်မှုကို အားကောင်းလာစေလိမ့်မယ်လို့လည်း ဒေါ်အောင်ဆန်းစုကြည်က ပြောသွားပါတယ်။
အကြံပြုဆွေးနွေးဝိုင်းကို ဒုသမ္မတဦးမြင့်ဆွေနဲ့ ဦးဟင်နရီဗန်ထီးယူ၊ ပြည်သူ့ လွှတ်တော်ဥက္ကဋ္ဌ ဦးတီခွန်မြတ်၊ အမျိုးသားလွှတ်တော်ဥက္ကဋ္ဌ မန်းဝင်းခိုင်သန်း၊ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၊ ပြည်ထောင်စုဝန်ကြီးတွေ၊ အန်စီအေ လက်မှတ်ရေးထိုးထားတဲ့တိုင်းရင်းသားလက်နက်ကိုင်အဖွဲ့ကိုယ်စားလှယ်တွေနဲ့ သံတမန်တွေ တက်ရောက်ပါတယ်။
ဒီဆွေးနွေးဝိုင်းကို ဘာသာပေါင်းစုံငြိမ်းချမ်းရေးအဖွဲ့ (မြန်မာ)က နယူးယောက် အခြေစိုက် ငြိမ်းချမ်းရေးအတွက် ကိုးကွယ်ရာဘာသာများ Religions for Pace – International (RfP)အဖွဲ့နဲ့ပူးပေါင်း စီစဉ်တာဖြစ်ပါတယ်။
ဓာတ်ပုံ- အတိုင်ပင်ခံရုံး