ညောင်လေးပင်မြို့နယ်တွင် သီးနှံဖျက်ပိုးကျပြီး စပါးစိုက်ဧက ၅၀၀ ကျော် ပျက်စီး
DVB
·
October 29, 2019
ပဲခူးတိုင်းဒေသကြီး၊ ညောင်လေးပင်မြို့နယ်၊ စည်ပင်ကျေးရွာမှာ သီးနှံဖျက်ပိုးတွေ ကျတာကြောင့် စပါး စိုက်ဧက ၅၀၀ ကျော်ပျက်စီးခဲ့ရပြီး ကျပ်သန်းထောင်ချီ ဆုံးရှုံးနစ်နာနေတယ်လို့ ဒေသခံ တောင်သူတွေက ပြောပါတယ်။
သီးနှံဖျက်ပိုးကြောင့် တောင်သူ ၂၉ ဦးရဲ့ စပါးစိုက်ဧက ၅၀၀ ကျော်ဆုံးရှုံးခဲ့ရပြီး ပျက်စီးမှုကြောင့် ကာလတန်ဖိုးငွေ ကျပ်သိန်း ၂၀၀၀ ကျော်ဆုံးရှုံးနစ်နာခဲ့ရတာပါ။
အောက်တိုဘာ ၂၄ ရက်နေ့ကတည်းက ပြွန်တန်ဆာမြို့ စည်ပင်ကျေးရွာက ၁၄၆၉ ကွင်းမှာ သီးနှံဖျက်ပိုးကျရောက်ခဲ့တာဖြစ်ပါတယ်။
အဆိုပါကွင်းဟာ ရေကြီးမှုဒဏ်မခံရပါက တဧကကိုစပါး တင်း ၁၀၀ လောက်ထွက်ရှိပြီး ဒီနှစ်မှာ ရေကြီးမှုဒဏ်မခံရဘဲ စပါးအထွက်နှုန်းကောင်းတဲ့ အချိန်မှာ ပိုး ဖျက်ဆီးခံလိုက်ရတာကြောင့် ဆုံးရှုံးနစ်နာမှုတွေများခဲ့တာလို့ တောင်သူ ဦးနိုင်ဝင်း ကပြောပါတယ်။
"ဒီနှစ်မှာ တဧကကို တင်းကိုးဆယ်တစ်ရာလောက်ထွက်မယ်လို့ မှန်းထားကြတာ၊ ရိတ်သိမ်းဖို့ရာလည်း တပတ်ဆယ်ရက်ပဲ လိုတော့တယ်။ ဒီလိုအချိန်မှာ ဧကငါးရာကျော်ကို လာကိုက်ဖဲ့ ဖျက်ဆီးသွားတာပဲ။"
စည်ပင်ကျေးရွာမှာ အရင်နှစ်တွေက စပါးဖျက်ပိုး ကျရောက်တာမျိုး မရှိခဲ့ပေမယ့် ဒီနှစ်မှာ ထူးခြားစွာစပါးဖျက်ပိုး ကျရောက်တာကို ကြုံတွေ့ခဲ့ရတာဖြစ်ပြီး ရိတ်သိမ်းဖို့ ရက်ပိုင်းအလိုမှာ စပါးခင်းတွေ ဖျက်ဆီးခံလိုက်ရတာလို့ တောင်သူ ဦးသိန်းထွန်းက ပြောပါတယ်။
သီးနှံဖျက်ပိုးဟာ ငမြောင်တောင်ပိုးနဲ့ဆင်တူပြီး ငမြောင်တောင်ပိုးလို အရေခွံမပျော့ဘဲ မာတာကြောင့် ပိုးသတ်ဆေးဖြန်းပေမယ့် သေဆုံးတာမရှိဘဲ ဝင်းမှည့်နေတဲ့ စပါးကိုသာရွေးချယ် ကိုက်ဖျက်စားသောက်တတ်တာကြောင့် တကွင်းလုံးဆုံးရှုံးခဲ့ရတာလို့ ဆိုပါတယ်။
"ဒီပိုးက စပါးစိမ်းနေရင်မစားဘူး။ ဝင်းမှည့်မှစားတာ၊ တကွင်းလုံးကို နှစ်ရက်လောက်နဲ့ အပြတ် စားလိုက်တဲ့သဘောပဲ၊ သိသိချင်းကို ကုန်တာ။ ညဘက်သွားကြည့်တော့ စပါးခင်းထဲ တိုးတောင် မတိုးရဲဘူး။ ကျနော်ရဲ့ ဧကခြောက်ဆယ်တကွင်းလုံးမှာ ပိုးကောင်တွေချည်းပဲ၊ ဆေးဖြန်း လည်း မရဘူး။ မျိုးဖိုးလေး ကျေမလားဆိုပြီး မနက်ရသလောက်ရိတ်မလို့ ပြန်သွားကြည့်တော့ အကုန်ဖျက်ဆီးခံလိုက်ရတာပဲ။"
ပိုးကျတဲ့ရွာတွေကို စိုက်ပျိုးရေးဦးစီးဌာနက ကွင်းဆင်းစစ်ဆေးနေပြီး စပါးဖျက်ပိုးမကျရောက်နိုင်အောင် ပိုးသတ်ဆေးဖြန်းပေးတာ၊ ပိုးသတ်ဆေးအခမဲ့ပေးဝေတာ အသိပညာပေးတာတွေ ပြုလုပ်ပေးနေပါတယ်။
လက်ရှိမှာ သီးနှံဖျက်ပိုးဟာ လျှော့နည်းသွားခြင်းမရှိဘဲ ပျက်စီးမှုတွေဆက်ရှိနေပြီး ထပ်မံ ဆုံးရှုံးမှာကို ဒေသခံတောင်သူတွေ စိုးရိမ်နေကြပါတယ်။
သတင်း၊ ဓာတ်ပုံ - နေလင်းထိုက်
