ပေါင်မြို့နယ်တွင် ဖယောင်းတိုင်မီးဖြင့်စာကျက်ရာမှ နေအိမ် ၆ လုံး မီးလောင်ဆုံးရှုံး
Email This Story :
မွန်ပြည်နယ်၊ ပေါင်မြို့နယ်၊ ပေါင်းရပ်ကွက်၊ ဆယ်အိမ်စုပိုင်းမှာ အောက်တိုဘာ ၂၀ ရက်နေ့ ည ၁၁ နာရီလောက်က အဋ္ဌမတန်းကျောင်းသူတဦး ဖယောင်းတိုင်မီးနဲ့ စာကျက်ပြီး အိပ်ပျော်သွားရာမှ မီးကူးစက်လောင်ခဲ့လို့ နေအိမ် ၆ လုံးနဲ့ ဆိတ် ၇ကောင် ပျက်စီးဆုံးရှုံးခဲ့ပါတယ်။
နေအိမ်မီးလောင်ဆုံးရှုံးခဲ့သူ ဒေါ်ငွေအေးက “အဒေါ်တို့က ည ၁၀ နာရီလောက်မှာ အိပ်ပျော်သွားကြတာ။ သမီးက ၈ တန်းကျောင်းသူဆိုတော့ ဖယောင်းတိုင်ထွန်းပြီး စာကျက်နေ တယ်။ သူ့ကိုအိပ်ရင်လည်း ဖယောင်းတိုင်မီးငြိမ်းပြီးမှ အိပ်လို့မှာထားတာ။ ဘယ်အချိန်သူလည်း အိပ်ပျော်သွားတယ် မသိတော့ဘူး။ ည ၁၁ နာရီဝန်းကျင်လောက်မှာ အဒေါ့်မျက်နှာကို မီးလာ ဟတ်တော့မှ အဒေါ်လည်း အိမ်မီးလောင်နေတာကို သိတော့တယ်။ ဘေးအိမ်မှာလည်း ဆိတ်တွေ မွေးထားပြီး ကြိုးချည်ထားတော့ အဲ့ဒီဆိတ် ၇ ကောင်ပါ ပြေးမလွတ်တော့ဘဲ မီးထဲပါသွားတယ်။ အိမ်နီးနားချင်းတွေကတော့ အဒေါ့်အိမ်ကစပြီး လောင်တာဆိုတော့ ၀ိုင်းပြီးအပြစ်ပြောကြတာပေါ့” လို့ ဒီဗွီဘီကိုပြောပါတယ်။
အဆိုပါမီးလောင်ကျွမ်းခဲ့မှုကြောင့် ပျဉ်ထောင်သွပ်မိုး နေအိမ် ၁ လုံး၊ ဖက်မိုး ထရံကာတဲအိမ် ၄ လုံး၊ တိုက်ခံပျဉ်ထောင်သွပ်မိုး နေအိမ် ၁ လုံးနဲ့ ဆိတ် ၇ ကောင် ပျက်စီးဆုံးရှုံးခဲ့ပြီး လူထိခိုက်သေဆုံးမှုမရှိဘူးလို့ ပေါင်မြို့နယ်မီးသတ်တပ်ဖွဲ့က သတင်းထုတ်ပြန်ထားပါတယ်။
အိမ်ရှင်ဖြစ်သူ ဦးချစ်လှိုင်ကို ပေါင်မြို့မ ရဲစခန်းက (ပ)၂၆၃၃/၂၀၁၉၊ မီးကိုပေါ့လျော့စွာအသုံးပြုခဲ့မှု ဥပဒေပုဒ်မ ၂၈၅ နဲ့ အမှုဖွင့်စစ်ဆေးနေတယ်လို့ သိရပါတယ်။
သတင်း+ဓာတ်ပုံ= ယူမင်းစိုး
