Homeမြန်မာသတင်း
MPT တာဝါတိုင် မိုးကြိုးလွှဲ ကြေးနန်းကြိုးများ ခိုးယူသူ ၃ ဦးကို ဝမ်းတွင်းမြို့တွင် ဖမ်းမိ
MPT တာဝါတိုင် မိုးကြိုးလွှဲ ကြေးနန်းကြိုးများ ခိုးယူသူ ၃ ဦးကို ဝမ်းတွင်းမြို့တွင် ဖမ်းမိ
DVB
·
October 17, 2019
မန္တလေးတိုင်း၊ ကျောက်ဆည်မြို့ MPT တာဝါတိုင်က မိုးကြိုးလွှဲ ကြေးနန်းကြိုးကို ဖြတ်တောက်ပြီး ခိုးယူလာသူတွေ ဖမ်းဆီးမိထားတယ်လို့ ဝမ်းတွင်းမြို့မရဲစခန်းက ပြောပါတယ်။
ရန်ကုန်-မန္တလေးလမ်းဟောင်း ဝမ်းတွင်းမြို့အလည်ဂိတ်မှာ ယာဉ်စည်းကမ်း လမ်းစည်းကမ်း ဆောင်ရွက်နေတဲ့ စုပေါင်းအဖွဲ့က ဖမ်းမိထားပြီး ကျောက်ဆည်မြို့မရဲစခန်းကို လွှဲပြောင်းပေးမယ် လို့ သိရပါတယ်။
ဝမ်းတွင်းမြို့မရဲစခန်း ဒုရဲအုပ်စောနိုင်ဦးက "ခိုးယူမှု အမှုအခင်းဖြစ်တာက ကျောက်ဆည်မြို့ မှာဆိုတော့ ကျောက်ဆည်မြို့မရဲစခန်းကို ပြန်လွှဲပေးရတာပါ။ ဒီမှာအမှုဖွင့် ဥပဒေအကြံတောင်း လုပ်ပေးတယ်။ ပြည့်စုံအောင်လုပ်ပြီး တရားခံ ၃ ဦးနဲ့ သက်သေခံပစ္စည်း အမှုတွဲ အားလုံးကို လွှဲပေးရပါတယ်။ ကြေး ၁၀ ပိဿာလောက်ရှိတယ်၊ အရှည်ကတော့ ပေ ၁၀၀ကျော် ရှိတယ်" လို့ ဒီဗွီဘီကို ပြောပါတယ်။
ဒေသခံဦးဇော်က "ဆိုင်ကယ်တစီးကို ၃ ယောက်စီးလာလို့ ဖမ်းလိုက်တာ ပီနံအိတ်ထဲက ကြေးနန်းကာဗာ ရာဘာဖြုတ်ပြီးသား ကြေးနန်းကြိုးတွေ ဖမ်းမိတာ"လို့ ပြောပါတယ်။
မကွေးတိုင်း၊ ချောက်မြို့ အမှတ်(၇) အုတ်ဖိုရပ်နေ အောင်သူ(ခ)သောင်းအေး(၂၈နှစ်)၊ ချစ်ဦးမောင်(၂၅နှစ်)နဲ့ ကိုမျိုး(၃၀နှစ်)တို့ ၃ဦးကို ဝမ်းတွင်းမြို့မရဲစခန်းမှာ ခိုးယူမှု ရာဇသတ်ကြီးပုဒ်မ ၃၇၉ နဲ့ အမှုဖွင့်ထားပါတယ်။
သတင်း-မောင်မောင်လင်း