Homeမြန်မာသတင်း
မီးပုံးပျံ ဦးကျော်ရင်ကို ဂုဏ်ပြုပြီး ထား၀ယ်မြို့တွင် မီးပုံးကြီးများ စုပေါင်းအလှပြလွှတ်တင်
မီးပုံးပျံ ဦးကျော်ရင်ကို ဂုဏ်ပြုပြီး ထား၀ယ်မြို့တွင် မီးပုံးကြီးများ စုပေါင်းအလှပြလွှတ်တင်
DVB
·
October 15, 2019
ထား၀ယ်ရိုးရာသပိတ်မျှောပွဲတော်နဲ့ မီးပုံကြီးများ စုပေါင်းအလှပြလွှတ်တင်ပွဲကို တနင်္သာရီတိုင်း ထား၀ယ်မြို့၊ တလိုင်းမရပ်ကွက်၊ ဆိပ်ကမ်းသာလမ်းမှာ မနေ့ညက ကျင်းပပါတယ်။
မီးပုံးကြီးပေါ်မှာ လိုက်ပါစီးနင်းရာက ကမ္ဘာ့ကျော်ခဲ့တဲ့ ထား၀ယ်သား မီးပုံးပျံ ဦးကျော်ရင်ကို ဂုဏ်ပြုတာနဲ့ ထားဝယ်ရိုးရာအစဉ်အလာကို ထိန်းသိမ်းတဲ့အနေနဲ့ ထား၀ယ်သူ/ ထား၀ယ်သားတွေက မီးပုံးပျံလွှတ်ပြိုင်ပွဲကို ပြုလုပ်ကြတာပါ။
မီးပုံးကြီးများ စုပေါင်းအလှပြပွဲမှာ ကူးတို့ကျေးရွာက ဥသြမောင်အဖွဲ့၊ မောင်းမကန်ကျေးရွာ လူငယ်အဖွဲ့၊ တနင်္ဂနွေဆွမ်းလောင်းအဖွဲ့(ကမြောကင်း-သောကြာပြင်)၊ Dawei Mountain Rescue Team- DMRTအဖွဲ့၊ Dawei LGBT Community အဖွဲ့၊ တနင်္သာရီတိုင်းဒေသကြီးလူငယ်ရေးရာ ကော်မတီ၊ အားသစ်လူငယ်အဖွဲ့(ကြက်စားပြင်)နဲ့ ကျွန်းမွှေးရပ်ကွက်မှ လူငယ်တွေ အပါအ၀င် စုစုပေါင်း မီးပုံးကြီး ၉ လုံးကို လွှတ်တင်ခဲ့ပါတယ်။
ကူးတို့ကျေးရွာ ထား၀ယ်ရိုးရာသပိတ်မျှော ပွဲတော်မှာတော့ မီးပုံးအလယ်မှာ ပြည်ထောင်စုမြန်မာနိုင်ငံတော်အလံကို ပုံဖော်ထားတဲ့ မီးပုံးကြီးကို ဥသြမောင် အမည်နဲ့ ပထမဆုံးမီးပုံးအလှပြလွှတ်တင်ခဲ့ပါတယ်။
ကမ္ဘာအလယ်မှာ မြန်မာနိုင်ငံကြီးဖွံဖြိုးတိုးတက်စေဖို့နဲ့ စည်းလုံးညီညွတ်မှုရစေဖို့ ဒီမီးပုံးကြီးကို အထူးစိတ်ကူးပုံဖော်ပြုလုပ်ထားတာလို့ ရွာသားတွေက ဆိုပါတယ်။
ထား၀ယ်မြို့ပေါ်နဲ့ မြို့အနီးရှိ ကျေးရွာတွေမှာ သီတင်းကျွတ်လပြည့်နေ့ မနက်ပိုင်းက မီးပုံးကြီး ၁၁လုံး၊ သီတင်းကျွတ်လပြည့်ညမှာ မီးပုံးကြီး ၆ လုံးကို လွှတ်တင်ခဲ့ပြီး သီတင်းကျွတ်လပြည့်ကျော် ၁ရက်နေ့မှာ ညောင်ဇင်ရွာကနေ မီးပုံးကြီး ၂လုံးကို လွှတ်တင်ခဲ့ပါတယ်။
ထား၀ယ်ရိုးရာ သပိတ်မျောပွဲတော်ကို အရင်နှစ်တွေက တရက်သာ ကျင်းပခဲ့ပေမယ့် လည်း အခုနှစ်မှာ ပွဲတော်ကာလကို ၃ ရက်ကျင်းပခဲ့ပါတယ်။
အခုနှစ်ထား၀ယ်မှာ မီးပုံးကြီးတွေ စုပေါင်းအလှပြလွှတ်တင်တာကို စတင်နိုင်ခဲ့ပြီး လာမယ့် နှစ်တွေမှာတော့ နို်ငငံအဆင့် မီးပုံးပြိုင်ပွဲပြုလုပ်ဖို့ ရည်မှန်းထားတယ်လို့ ထား၀ယ်ရိုးရာသပိတ်မျှော ပွဲတော်ပွဲ ဖြစ်မြောက်ရေးကော်မတီဥက္ကဋ္ဌ ဦးရဲထွဋ်နိုင်က ပြောပါတယ်။
သတင်း-တင့်လွင်