ဗြိတိန်ဝန်ကြီးချုပ်နေရာ အရွေးခံမည့် မိုက်ကယ်ဂုဗ် မူးယစ်ဆေး သုံးခဲ့ဖူးကြောင်း ၀န်ခံ

ဗြိတိန်ဝန်ကြီးချုပ် ထရေဇာမေရဲ့ နေရာကို အစားထိုးလက်ခံဖို့ ထိပ်တန်းပြိုင်ဘက်ဖြစ်တဲ့ မိုက်ကယ်ဂုဗ်က အကြိမ်ရေအတော်များများ မူးယစ်ဆေး သုံးမိတဲ့အတွက် နက်နက်ရှိုင်းရှိုင်း နောင်တရတယ်လို့ ပြောလိုက်ပါတယ်။ လူငယ်သတင်းထောက်ဘဝက လူမှုရေး မိတ်ဆုံပွဲတွေမှာ ကိုကင်း မူးယစ်ဆေး သုံးဖူးတယ်လို့ ဂုဗ်က ပြောတဲ့အကြောင်း ဗြိတိန်အခြေစိုက် ဒေးလီးမေးလ်သတင်းဌာနက ဇွန်လ ၇ ရက်မှာ ကိုးကားဖော်ပြခဲ့တာပါ။ “ဒါဟာ အမှားပဲ၊ အတိတ်ကို ပြန်တွေးခဲ့ရင် မလုပ်ဖြစ်ခဲ့ဖို့ ဆန္ဒရှိမိတယ် ထင်တယ်” လို့ မိုက်ကယ်ဂုဗ်က ပြောပါတယ်။ “လွန်ခဲ့တဲ့ နှစ်၂၀ က အမှားပါပဲ။ ဒါပေမယ့် အတိတ်က အမှားက အခု အရည်အချင်း မဲ့တယ်လို့ ငြင်းလို့ရတယ်ဆိုတာ မယုံဘူး” လို့ သူက ဆက်ပြောပါတယ်။ ဥရောပသမဂ္ဂ (အီးယူ) ကနေ ဗြိတိန်က သဘောတူညီချက်မရှိဘဲ ခွဲထွက်မလား အဲလို ခွဲထွက်ရင် မှန်လား မှားလား ဆိုတာနဲ့ ပတ်သက်ပြီး အငြင်းပွားနေလို့ ဗြိတိန်ဝန်ကြီးချုပ် မေဟာ ရာထူးကနေ နုတ်ထွက်တော့မှာပါ။ သူ့နေရာအတွက် ကိုယ်စားလှယ်လောင်းတွေ ရွေးနေချိန်မှာ မိုက်ကယ်ဂုဗ်ရဲ့ နောက်ကြောင်း ပေါ်ပေါက်လာခဲ့ပါတယ်။ ဝန်ကြီးချုပ်လောင်း ကိုယ်စားလှယ်တွေဟာ တနင်္လာနေ့မှာ ပြိုင်ပွဲဆက်ပြိုင်မလားဆိုတာ ကြေညာရမှာပါ။ ဝန်ကြီးချုပ် ရွေးချယ်ရေး လုပ်ငန်းစဉ်ဟာ ဇူလိုင် လကုန်ပိုင်းမှာ ပြီးစီးရမှာ ဖြစ်ပါတယ်။

More News
Up