ပွင့်ဖြူမြို့နယ်တွင် မိုးရွာသွန်းပြီးနောက် မြေလွှာအက်ကွဲကြောင်းများဖြစ်ပေါ်နေ
DVB
·
June 6, 2019
မကွေးတိုင်းဒေသကြီး၊ ပွင့်ဖြူမြို့နယ် မရိုးကုန်းကျေးရွာမှာ ဇွန်လ ၂ ရက်က ရွာသွန်းခဲ့တဲ့ မိုးကြောင့် လူနေအိမ်ခြေ ၂၀ လောက်ရဲ့ ဘေးပတ်ဝန်းကျင်မှာ မြေလွှာအက်ကွဲကြောင်းကြီးတွေ ဖြစ်ပေါ်နေပါတယ်။
မကွေးတိုင်းဒေသကြီး ဝန်ကြီးချုပ်ရဲ့ တာဝန်ပေးချက်အရ မန်းရေနံမြေ ဘူမိဗေဒအရာရှိ ဦးလတ်မောင်မောင်နဲ့ မြို့နယ်အုပ်ချုပ်ရေးမှူး၊ မြို့နယ်ရဲတပ်ဖွဲ့မှူးနဲ့ ဌာနဆိုင်ရာဝန်ထမ်းတွေက လိုအပ်ရင် နေအိမ်တွေရွှေ့ပြောင်းပေးဖို့ အဆိုပါရွာကို မနေ့က သွားရောက်စစ်ဆေးခဲ့ပါတယ်။
မင်းဘူးခရိုင်အုပ်ချုပ်ရေးမှူး ဦးဆန်းဌေးက “ကမ်းပါးပြိုတာမဟုတ်ဘဲ ကမ်းပါးနဲ့ ဝေးတဲ့နေရာတွေမှာ အက်ကွဲကြောင်းတွေပေါ်တာဖြစ်တယ်။ သဲတွေမြေတွေ ဖို့ထားပြီးဖြစ်တဲ့ အတွက် မြင်ကွင်းမရှင်းတော့လို့ မြေမဖို့်သေးတဲ့နေရာတွေ ရှာဖွေစစ်ဆေးခဲ့ရတယ်။ ပညာရှင်တွေ ပြောပြတာကတော့ ဒီနှစ်မှာ နေပူ တအားပြင်းပြီး ရေဓာတ်ခမ်းခြောက်တဲ့အချိန် မိုးရွာချလိုက်တော့ မြေအောက်ကွဲကြောင်းတွေကနေ ရေဝင်ပြီး မြေလွှာအက်ကွဲတာပါ။ ဒေသခံတွေ စိုးရိမ်နေ သလိုမျိုး နေအိမ်တွေ ကျွံကျတာမျိုးမဖြစ်နိုင်ဘူးလို့ ပညာရှင်တွေကပြောပြချက်အရ သိရတယ်"လို့ ပြောပါတယ်။
မြေလွှာအက်ကွဲလို့ ရွှေပြောင်းလိုတဲ့သူတွေကို ရွှေပေးဖို့ စီစဉ်နေပြီး အစိုးရအဖွဲ့ အထောက်အပံ့နဲ့ မြေနေရာရရှိအောင် ဆောင်ရွက်နေတယ်လို့လည်း ပြောပါတယ်။
မရိုးကုန်းကျေးရွာမှာ အိမ်ထောင်စု ၂၈၀ လောက်နေထိုင်ကြကာ နှစ်စဉ် မုန်းချောင်းရေတိုက်စားပြီး ကမ်းပါးပြိုတဲ့အတွက် နေအိမ်တွေရွှေ့ပြောင်းနေရတာပါ။
ဒီနှစ်မှာလည်း ကမ်းနဘေးမှာရှိတဲ့ နေအိမ် ၃၀ ကျော်၊ မူကြိုကျောင်း ၁ကျောင်းနဲ့ ဓမ္မာရုံ တရုံ ရွှေပြောင်းပေးရဖို့ ရှိနေပါတယ်။
သတင်း-မင်းထီး
