Email This Story :
မြန်မာနိုင်ငံမှာ မြို့ပြစီမံကိန်းတွေ စနစ်တကျရေးဆွဲနိုင်ဖို့ မြို့ပြနဲ့ ဒေသဖွံ့ဖြိုးရေးဆိုင်ရာ စီမံကိန်းဥပဒေကြမ်းကို ဇွန်လ ၅ ရက်နေ့ အမျိုးသားလွှတ်တော်မှာ ဆောက်လုပ်ရေး ၀န်ကြီးဌာနက တင်သွင်းလိုက်ပါတယ်။
ဝန်ကြီးဌာနအနေနဲ့ မြန်မာနိုင်ငံမှာ မြို့ပေါင်း ၃၃၀ ရှိတဲ့အနက် ၂၀၁၁ ခုနှစ်ကနေ ၂၀၁၉ ခုနှစ်အတွင်း မြို့ပေါင်း ၁၃၀ ရဲ့ မြို့ပြဖွံ့ဖြိုးရေးစီမံကိန်းပုံစံတွေ ရေးဆွဲပြီးပေမယ့် ဒီစီမံကိန်းတွေ အတွက် ပင်မစီမံကိန်း (Master Plan) ဆက်လက်ရေးဆွဲပြီး အကောင်အထည်ဖော်ဖို့ ကျောထောက်နောက်ခံ ဥပဒေတခုလိုအပ်နေတယ်လို့ ဆောက်လုပ်ရေးဒုဝန်ကြီး ဦးကျော်လင်းက ဆိုပါတယ်။
“ရန်ကုန်၊ မန္တလေး၊ တောင်ကြီး၊ မြစ်ကြီးနားစတဲ့ မြို့ကြီးတွေမှာ လူဦးရေ တိုးပွားလာမှုနဲ့ စီးပွားရေးတိုးတက်ပြောင်းလဲမှုတို့ကြောင့် စနစ်မကျတဲ့ မြို့ပြကြီးမှုတွေ၊ အခြေခံအဆောက်အအုံ မလုံလောက်မှုတွေဖြစ်ပေါ်နေလို့ မြို့ပြတွေကို စနစ်တကျစီမံကိန်းတွေ ရေးဆွဲ အကောင်အထည်ဖော်ဖို့ အထူးလိုအပ်နေပါတယ်။ ဆိုလိုတာက အဲဒီမြို့တွေရဲ့ နှစ်ပေါင်းများစွာက ရှိနေတဲ့ အခြေခံသဘာဝအရင်းအမြစ်တွေဟာ စနစ်မကျတဲ့ မြို့ပြဖွံ့ဖြိုးတိုးတက်မှုတွေကြောင့် လက်ရှိအခြေအနေမှာ ပျောက်ဆုံးနေပြီး ထူးခြားတဲ့ သွင်ပြင်လက္ခဏာတွေ ပျောက်ဆုံး သွားတဲ့အတွက် ဒီဥပဒေကို အမြန်ဆုံးရေးဆွဲဖို့ လိုအပ်နေပါတယ်”
မြို့ပြတွေကို စနစ်တကျစီမံကိန်းတွေ ရေးဆွဲအကောင်အထည်ဖော်ဆောင်ရွက်ဖို့ လိုအပ်တဲ့အတွက် ဒီဥပဒေကိုရေးဆွဲခဲ့ရတာဖြစ်ပြီး စီးပွားရေး၊ စိုက်ပျိုးမွေးမြူရေး၊ လျှပ်စစ်၊ စွမ်းအင်၊ သတ္တုနဲ့ သစ်တော၊ စက်မှုလက်မှု၊ ပို့ဆောင်ရေးနဲ့ ဆက်သွယ်ရေး၊ ဆောက်လုပ်ရေး စတဲ့ လူမှုစီးပွားဖွံ့ဖြိုးရေးဆိုင်ရာကဏ္ဍ စီမံကိန်းတွေနဲ့ ချိတ်ဆက်မှုရှိတဲ့ (Integrated Development) မြို့ပြနဲ့ဒေသစီမံကိန်းရေးဆွဲခြင်းတို့ ပါဝင်တယ်လို့ ဆိုပါတယ်။
ဒီဥပဒေပြဋ္ဌာန်းပြီးရင် Myanmar Sustainable Development Plan ရဲ့ ရည်ရွယ်ချက်တွေနဲ့ လိုက်လျောညီထွေ ဖော်ဆောင်နိုင်မှာဖြစ်သလို လိုအပ်လာမယ့် မြို့ပြမြေတွေ ဖော်ထုတ်တာမှာလည်း မြေအသုံးချမှု မူဝါဒနဲ့အညီ မြေအသုံးပြုမှုတွေ ပြောင်းလဲအသုံးပြု လာနိုင်မှာဖြစ်တယ်လို့ ဆိုပါတယ်။
အမျိုးသားလွှတ်တော် ဥပဒေကြမ်းကော်မတီကတော့ သဘာဝဘေးဒဏ်ခံနိုင်ပြီး ဘက်စုံ ကောင်းမွန်တဲ့ မြို့ပြတွေ ဖြစ်စေဖို့၊ နယ်မြေဒေသတခုနဲ့ တခု ဖွံ့ဖြိုးမှုကွာဟချက် လျော့ချနိုင်ဖို့၊ ဘက်ညီမျှတဲ့ မြို့ပြတွေ စနစ်တကျ တည်ဆောက်နိုင်ဖို့ အတည်ပြုထားတဲ့ ဖွံ့ဖြိုးရေးစီမံကိန်း နေရာကလွဲပြီး တိုးချဲ့ဆောင်ရွက်ခြင်းနဲ့ စီမံကိန်းပါ အချက်အလက်တွေ ပြောင်းလဲဆောင်ရွက်ခြင်း တို့အတွက် ထိရောက်ဟန့်တားတဲ့ ပြစ်ဒဏ်တွေ ဖြည့်စွက်သင့်တယ်လို့ အကြံပြုခဲ့ပါတယ်။
