လေယာဉ်ပေါ် ဗီဒီယို ခိုးယူရိုက်ကူးထားခြင်းမဟုတ်ဟု သရုပ်ဆောင် နေမင်းရှင်းလင်း
DVB
·
May 15, 2019
လေယာဉ်ပေါ်မှာ ရိုက်ကူးထားတဲ့ ဗီဒီယိုမှတ်တမ်းတွေဟာ ခိုးယူ ရိုက်ကူးထားတာမျိုးမဟုတ်ဘဲ အရေးပေါ် အခြေအနေမှာ ရိုက်ကူးခဲ့တာလို့ သရုပ်ဆောင်နေမင်းက ရှင်းလင်းပြောကြားလိုက်ပါတယ်။
မေလ ၁၂ရက်က မြန်မာအမျိုးသားလေကြောင်းလိုင်း ခရီးသည်တင်လေယာဉ် ဂီယာ ချို့ယွင်း အရေးပေါ် ဆင်းသက်ခဲ့ရတာနဲ့ ပတ်သက်တဲ့ ဗီဒီယိုမှတ်တမ်းတွေကိစ္စ ရန်ကုန်မြို့၊ သုဝဏ္ဏကွင်းရုံးခန်းမမှာပြုလုပ်တဲ့ လေယာဉ်ပေါ်အတွေ့အကြုံ ရှင်းလင်းပွဲမှာ သရုပ်ဆောင်နေမင်းက ပြောသွားတာပါ။
MNA လေယာဉ်မတော်တဆမှုမှာ လေယာဉ်မယ်တွေက ဖုန်းကိုအသုံးမပြုဖို့ အကြိမ်ကြိမ်သတိပေးနေတဲ့ကြားက ဗီဒီယိုမှတ်တမ်း ရိုက်ကူးခဲ့တဲ့ သရုပ်ဆောင်နေမင်းကို လူမှုကွန်ယက် စာမျက်နှာတွေမှာ ဝေဖန်မှုတွေ မြင့်တက်ခဲ့တာပါ။
MNA လေယာဉ် အရေးပေါ်ဆင်းသက်ခဲ့ရာမှာ ခရီးသည်တွေကို ထိခိုက်မှု တစုံတရာမဖြစ်စေဘဲ လေယာဉ်ကို အောင်မြင်စွာဆင်းသက်ပေးနိုင်ခဲ့တဲ့ လေယာဉ်မှူးနဲ့ လေယာဉ်ဝန်ထမ်းတွေကို မေ ၁၉ ရက် ညနေပိုင်းမှာ ရန်ကုန်မြို့ရှိ နိုဗိုတယ်ဟိုတယ်မှာ ဂုဏ်ပြုပွဲ ကျင်းပသွားဖို့ ရှိပါတယ်။
ရှေ့ဘီးချမရဘဲ လေယာဉ်ဦးခေါင်းပိုင်းနဲ့ ရှပ်တိုက်ပြီး အရေးပေါ်ဆင်းသက်ခဲ့ရတဲ့ အဆိုပါလေယာဉ်ပေါ်မှာ သရုပ်ဆောင်နေမင်း၊ သရုပ်ဆောင် မင်းသမီး ယုသန္တာတင်၊ ခင်လေးနွယ် စတဲ့ အနုပညာရှင်တွေလည်း လိုက်ပါလာခဲ့ကြတာဖြစ်ပါတယ်။
သတင်း - ယူမင်းစိုး၊ ဓာတ်ပုံ- Nay Min
