Home
မေးမြန်းခန်း
“သူတို့ကိုယ်ကျိုးအတွက် မလုပ်ဖူးဆိုတာ ရဲရဲဝင့်ဝင့် ပြောရဲပါတယ်” ဒေါက်တာမျိုးညွန့်
DVB
·
April 26, 2019
ပြည်သူတွေအကြား အငြင်းပွားမှုတွေ အပြင်းအထန်ဖြစ်နေတဲ့ မြစ်ဆုံစီမံကိန်းနဲ့ ပတ်သက်ပြီး အစိုးရက ပွင့်ပွင့်လင်းလင်းချမပြသေးတာနဲ့ ဒီစီမံကိန်းကို ဘာကြောင့် လျှို့ဝှက်ထားရတယ်၊ ရှေ့ဆက်လုပ်မလား၊ ရပ်မလား၊  ဘယ်လို ဆောင်ရွက်သွားမယ် ဆိုတာတွေနဲ့ ပတ်သက်ပြီး အမျိုးသားဒီမိုကရေစီအဖွေဲ့ချုပ် (အန်အယ်လ်ဒီ)ပြောရေးဆိုခွင့်ရှိသူ ဒေါက်တာမျိုးညွန့်ကို ဒီဗွီဘီက သီးသန့်တွေ့ ဆုံမေးမြန်းထားပါတယ်။ အပြည့်အစုံ------ မေး- ပြီးခဲ့တဲ့ရက်ပိုင်းက ရန်ကုန်မှာ မြစ်ဆုံနဲ့ပတ်သက်ပြီး လူတဦးကို တဒေါ်လာထည့်ဝင်ပြီး ဧရာဝတီကို ပြန်ရွေးကြဖို့ဆိုတဲ့ လှုပ်ရှားမှု လုပ်သွားတယ်။  အဲဒီပွဲမှာ နယ်ပယ်စုံက ပညာရှင်တွေလည်း တက်ရောက်ဆွေးနွေးခဲ့တယ်။ ဒီအပေါ်မှာ သဘောထားကွဲလွဲမှုတွေ၊ ဝေဖန်မှုတွေလည်း အတော်လေး မြင့်တက်နေတာတွေ့ ရတော့ လက်ရှိအာဏာရပါတီအနေနဲ့ ဒီပွဲရဲ့လုပ်ဆောင်ပေါ်ကို ဘယ်လို မြင်ပါသလဲ။ ဖြေ- “ဒါဟာ လုပ်ထုံးလုပ်နည်းအရ လုံးဝကို မှားယွင်းနေတဲ့အနေအထားပါ။ ဒီလိုလုပ်လို့လည်း တရုတ်နိုင်ငံအနေနဲ့ မြစ်ဆုံစီမံကိန်းကို ရပ်တန့်မှာ မဟုတ်ပါဘူး။ ကျနော်တို့ တကယ်တမ်း ရပ်တန့်ဖို့ဆိုရင် အစိုးရအချင်းချင်း ညှိနှိုင်းပြီးတော့ ဘယ်လို အချက်အလက်တွေအရ ရပ်တန့်သင့်တယ်။ ဘယ်လို ကတိက၀တ်တွေ ဖြည့်ဆည်းပြီးမှ ဆွေးနွေးဆောင်ရွက်လို့ရမှာပါ။” “ဒါပေမယ့် အခုလို နိုင်ငံရေးလှုပ်ရှားမှုမျိုးဆောင်ရွက်တဲ့အခါမှာ ပြည်သူတွေ လေးစားတဲ့ ပညာရှင်တွေ ပါတယ်ကိုလည်း သတိထားမိပါတယ်။ ဒါပေမယ့် အခုဆောင်ရွက်ချက်ဟာ မြစ်ဆုံစီမံကိန်းကို ပြည်သူတွေ ဆန့်ကျင်လာအောင် ရည်ရွယ်ပြီးလုပ်တဲ့ နိုင်ငံရေးလှုပ်ရှားမှုမျိုး ဖြစ်နေတယ်။ အဲဒီတော့ မအောင်မြင်နိုင်တဲ့ ဒီလှုပ်ရှားမှုကနေ ပြည်သူတွေ စိတ်ထဲမှာ မြစ်ဆုံစီမံကိန်းအပေါ် အကျိုးအမြတ်အရ သဘောတူတာမဟုတ်ပဲနဲ့ စိတ်လှုပ်ရှားမှုအရ ဆန့်ကျင်တာကိုပဲ တွေ့ ရတယ်။ ဒါ့ကြောင့် ဒီလို လှုပ်ရှားမှုမျိုးက မသင့်လျော်ဘူးလို့ထင်ပါတယ်။” မေး- အခုလိုမျိုး လုပ်ဆောင်ခဲ့တဲ့အတွက် လက်ရှိအစိုးရအပေါ်မှာကော ဘယ်လို ဖိအားမျိုး သက်ရောက်သွားစေပါသလဲ။ ဖြေ- “စိတ်ခံစားမှုအရ ဆန့်ကျင်လာအောင် လုပ်တာဟာ အစိုးရအနေနဲ့ ဆုံးဖြတ်ချက်ချတဲ့အခါမှာ ရေရှည်အကျိုးအတွက် စဉ်းစားတဲ့အခါမှာ နည်းနည်းအနှောင့်အယှက်တွေ ဖြစ်လာနိုင်တယ်။ ကျနော်တို့ နိုင်ငံတော်အတိုင်ပင်ခံ ပုဂ္ဂိုလ်ပြောတာကို အလေးအနက် စဉ်းစားစေချင်ပါတယ်။ နိုင်ငံရေး၊ စီးပွားရေးနဲ့ တခြား သဘာဝပတ်ဝန်းကျင်အရေး အကုန်လုံးပေါ့။ အခုသူတို့ ပြောနေတာက သဘာဝပတ်ဝန်းကျင်ကိစ္စကိုပဲ တည်ပြီးပြောနေတာ တွေ့ရတယ်။” “ကျနော်တို့ နိုင်ငံဟာ အခက်အခဲပေါင်းများစွာ၊ စိန်ခေါ်မှုပေါင်းများစွာနဲ့ ကြုံနေရတဲ့ နိုင်ငံဖြစ်တယ်။ နှစ်ပေါင်း ၇၀ကျော် ပြည်တွင်းစစ်ရယ်၊ နိုင်ငံစီးပွားရေးကိစ္စတွေ၊ နောက်ပြီး နိုင်ငံတကာဖိအားတွေရယ်၊  ဒါတွေအားလုံးဟာ မြစ်ဆုံစီမံကိန်းနဲ့ တနည်းတဖုံ ပက်သက်နေတယ်။ အဲဒီတော့သေချာတာ တခုကတော့ နိုင်ငံတော်အတိုင်ပင်ခံပုဂ္ဂိုလ် ဦးဆောင်ပြီး လက်ရှိအုပ်ချုပ်ရေးတာဝန်ရှိသူတွေဟာ ရာထူးတွေကို မက်မောလို့မဟုတ်ဖူး။ ကိုယ်ကျိုးစီးပွားအတွက် တစုံတရာလုပ်မှာလည်းမဟုတ်ဖူး။ သူတို့လုပ်သမျှကိုလည်း တာဝန်ယူမှု တာဝန်ခံမှု အပြည့်နဲ့ပြည်သူတွေကို ရှင်းပြသွားမှာပါ။ ဒါကိုတော့ ယုံကြည်စေချင်ပါတယ်။ ကျနော်တို့ စိတ်ခံစားမှု လွန်ကဲနေရင် အမှားအမှန်ကို ဝေခွဲရခက်လာလိမ့်မယ်။” မေး- နောက် မြစ်ဆုံနဲ့ပတ်သက်ပြီး  တိုင်းရင်းသားပါတီခေါင်းဆောင်တဦးက ပြောထားတယ်၊ မြစ်ဆုံနဲ့ပတ်သက်ပြီး အစိုးရအနေနဲ့ မှားယွင်းတဲ့ဆုံးဖြတ်ချက်မျိုးချမိရင် နိုင်ငံရေးအရ ကြီးမားတဲ့ အကျိုးသက်ရောက်မှုတွေ ရှိလာနိုင်တယ်ဆိုပြီးတော့ အဲဒီ တော့လက်ရှိ အာဏာရ ပါတီအနေနဲ့ ဒီအပေါ်မှာ ဘယ်လို စဉ်းစားထားပါသလဲ။ ဖြေ- “ကျနော်တို့အားလုံးလည်း သိပါတယ်။ ဒီမြစ်ဆုံသဘောတူစာချုပ်က လျှို့ဝှက်ချက်တွေ အများကြီးနဲ့ စာချုပ်တခုဆိုတာ၊ ဘာကြောင့်လျှို့ဝှက် ထားရသလဲဆိုရင် ပြည်သူကို အခုအချိန်ချပြ အသိပေးလိုက်ရင် ပိုပြီးတော့ ပြဿနာတွေ  ပိုများလာမလားဆိုတာကို လက်ရှိ အုပ်ချုပ်သူတွေက စဉ်းစားရပါတယ်။ ဒါပေမယ့် ဒီမိုကရေစီနည်းအရ သတင်းသိပိုင်ခွင့် လွတ်လပ်ပါတယ်ဆိုတဲ့ အမေရိကန်လို နိုင်ငံမျိုးမှာတောင် ၀ီကီလိလို သတင်းတွေကို လွတ်လွတ်လပ်လပ်ဖွင့်ချလိုက်တဲ့အခါမှာ သူတို့မှာ အများကြီး အခက်အခဲတွေ တွေ့စေတယ်။ ကျနော်တို့နိုင်ငံမှာက ဒိထက်ပိုတဲ့ အကြောင်းအရာတွေရှိတယ်။ လူထုက စိတ်ခံစားမှုအရ တုန့်ပြန်လာရင် ရေရှည်အကျိုးစီးပွားအရ ဆုံးဖြတ်လုပ်ကိုင်ရတာ ပိုခက်လာပါလိမ့်မယ်။ ဒါကြောင့်လည်း ထိန်းထိန်းသိမ်းသိမ်း လုပ်ဆောင်နေရတာပါ။” မေး-- မြစ်ဆုံနဲ့ ပက်သက်ပြီး အခုဆိုရင် အတော်လေးဝေဖန်သံတွေထွက်နေတဲ့အချိန်မှာ ပါတီတာဝန်ရှိသူတချို့က မြစ်ဆုံကို ဆက်လုပ်သင့်ပါတယ်ဆိုပြီး အာဘော်ဆောင်းပါးမျိုး ရေးသားတာကိုလည်း တွေ့နေရတော့ လူတွေက အတော်လေးစိုးရိမ်နေကြတယ်။ ဒီစိုးရိမ်မှုတွေကိုကော ဘာများပြောချင်သလဲ။ ဖြေ- “ကျနော်တို့အဖွဲ့ချုပ်က လူတွေရေးတဲ့ဆောင်းပါးတွေကို ထောက်ပြပြီးတော့ အန်အယ်လ်ဒီဟာ မြစ်ဆုံကိုပြန်လုပ်မလားဆိုတဲ့ စိုးရိမ်ချက်တွေကို သဘောပေါက်ပါတယ်။ လောလောဆယ် အဖွဲ့ချုပ် ဒုဥက္ကဋ္ဌ ဒေါက်တာဇော်မြင့်မောင် ပြောသလို ပြည်သူရဲ့ဆန္ဒကို အလေးအနက်ထားပြီး ပြည်သူနဲ့ တသားထဲရှိနေတယ်ဆိုတာ ကျနော်တို့ရဲ့ လောလောဆယ်ရပ်တည်ချက်ပါ။ ဆရာဇော်မြင့်မောင်တောင် ဒီစာချုပ်ကို မသိသေးဘူး။ မသိသေးဘဲနဲ့ သူပေးနိုင်တဲ့ကတိကို အမြင့်ဆုံးအစွမ်းကုန် ပေးထားတာပါ။ အဲတော့ ခံစားချက်အရတော့ ကျနော်တို့မပြောလိုပါဘူး။ “ဘယ်လိုကောင်းတဲ့ကိစ္စ၊ ဆိုးတဲ့ကိစ္စပဲ ဖြစ်ပါစေ အမြဲတမ်း အမြင်နှစ်ဖက်တော့ရှိတယ်။ ဥပမာပြောရရင် လာအိုနိုင်ငံမှာ ဆည်တွေဆောက်တယ်၊ ဖွံ့ဖြိုးဆဲနိုင်ငံမှာ လျှပ်စစ်တွေရောင်းပြီး နိုင်ငံစီးပွားရေး အဆင်ပြေလာတာကိုတွေ့ ရတယ်။ အမေရိကန်နိုင်ငံမှာလည်း လွန်ခဲ့တဲ့ နှစ်ပေါင်း ၄၀၀လောက်ကတည်းက  ဟူးဖားဆယ်ကြီးဆောက်ခဲ့တယ်။ ခုထိဘာပြဿနာမှ မဖြစ်ဘူး။ ဒီလိုပဲ ကျနော်တို့နိုင်ငံမှာဆိုလည်း လောပိတ စီမံကိန်းဆို နှစ်ပေါင်းများစွာရှိပြီ ဘာပြဿနာများရှိလို့လဲ၊ ကျနော်တို့ဟာ ခံစားချက်ကို မူတည်လို့မရပါဘူး။” မေး- ဒီမြစ်ဆုံစီမံကိန်းနဲ့ ပတ်သက်ပြီးတော့  သဘာဝပတ်ဝန်းကျင် ပညာရှင်တွေကလည်း ထောက်ပြပြောဆိုထားတာရှိတယ်။ ဒီစီမံကိန်းကနေ ဘယ်လို အန္တရာယ်ဖြစ်လာနိုင်သလဲ။ ဘယ်လို အကျိုးတွေရှိလာနိုင်မလဲ။ ဖြေ- “ဒီကိစ္စနဲ့ ပတ်သက်ပြီး  ဆရာဦးထွန်းလွင်တို့လို မိုးလေ၀သပညာရှင်တွေပါ ပါလာတယ်ဆိုတာ သိပါတယ်။ ဒါပေမယ့် ဒီဘက်က အနုစိတ်ရောက်တဲ့ခေတ်ဖြစ်သွားပြီ။ သူတို့အဓိကပြောနေတာက ငလျင်ကိစ္စပဲ။  မြေငလျင်နဲ့ ပတ်သက်ရင် သူ့မှာ သီးခြားပညာရှင်တွေရှိပါတယ်။ ဒါတောင် ပညာရှင်က သူကိုယ်တိုင်ပြောလို့မရသေးပါဘူး နှစ်နဲ့ချီပြီးတော့ တိုင်းတာမှုတွေ၊ တွက်ချက်မှုတွေလုပ်ပြီးမှ ထုတ်ပြန်ရတာပါ။” “အဲဒီလိုပညာရှင်တွေရဲ့စကားတွေ မြန်မာနိုင်ငံမှာ ကြုံတွေ့နေရတဲ့ ပြည်တွင်းစစ် စိန်ခေါ်မှုတွေ၊ စီးပွားရေး အကျပ်အတည်းတွေ၊ နိုင်ငံတကာဖိအားတွေကိုလည်း ထည့်သွင်းစဉ်းစားရပါတယ်။ နောက်ဆုံး ငလျင်အန္တရာယ်ရှိတယ်ဆိုတာတောင် ဘယ်လို ကာကွယ်လို့ရနိုင်မလဲဆိုတာ ဘက်ပေါင်းစုံက စဉ်းစားရပါမယ်။ ပြီးတော့စာချုပ်ထဲမှာ ဘာတွေပါသလဲ၊ နိုင်ငံအကျိုးဘယ်လောက်ရှိသလဲဆိုတာ ကျနော်တို့အတိအကျ မပြောနိုင်သေးပါဘူး။ ပြီးတော့ဒီဆည်ကြီးဆောက်ဖြစ်ခဲ့ရင် ကျနော်တို့မြန်မာနိုင်ငံက အဓိက လိုအပ်နေတဲ့လျှပ်စစ်ဓာတ်အားရမယ်၊ သို့သော် တကယ်ရမလားဆိုတာကတော့ ကျနော်တို့ စဉ်းစားရမှာပေါ့။  တကယ်ဆောက်ပြီးရင် ထင်သလောက်မရဘဲ ရာခိုင်နှုန်းအရ အားနည်းနေရင် ဘက်ပေါင်းစုံက စဉ်းစားပြီးမှ ဒါကိုပြောလို့ရမှာပေါ့။” မေး--- အန်အယ်လ်ဒီပါတီအာဏာမရခင်က ဒေါ်အောင်ဆန်းစုကြည်က ပြောခဲ့ဖူးတယ်။ အန်အယ်လ်ဒီသာ အာဏာရခဲ့ရင် ဒီမြစ်ဆုံစာချုပ်ကို ပွင့်ပွင့်လင်းလင်း ပြည်သူကို ချပြမယ်လို့ပြောခဲ့ဖူးတယ်။ ခု အစိုးရသက်တမ်း ၃နှစ်ကော်ျလာပြီ ခုထိ စာချုပ်ကို မချပြနိုင်သေးတာ ဘယ်လိုကြောင့်လဲ။ ဖြေ- “ဒီစာချုပ်ဟာ လျှို့ဝှက်ထားတဲ့ သဘောရှိပါတယ်။ ချပြလိုက်ရင် ပြည်သူတွေကြားထဲမှာ  စိတ်ခံစားမှုအရ မကျေနပ်မှုတွေ ရှိလာနိုင်တယ်။ လောလောဆယ်အခြေအနေအရ စာချုပ်ပါ အချက်အလက်တွေကို ကျနော်တို့ ပြောလို့မရသေးပါဘူး။ ဒါတွေကို မသိတဲ့အတွက် ချပြခြင်းနဲ့ မချပြခြင်းမှာ ခုလောလောဆယ် ထိန်းသိမ်းထားဖို့သင့်တယ်လို့ အုပ်ချုပ်ရေး တာဝန်ရှိသူတွေက ဆုံးဖြတ်ထားတယ်။ ဒါပေမယ့် သေချာတာကတော့ လက်ရှိအုပ်ချုပ်ရေး တာဝန်ရှိသူတွေနဲ့ ဒေါ်အောင်ဆန်းစုကြည်ကော သမ္မတဦးဝင်းမြင့်ကပါ သူတို့ကိုယ်ကျိုးအတွက် မလုပ်ဖူးဆိုတာ ရဲရဲဝင့်ဝင့် ပြောရဲပါတယ်။” မေး- မြစ်ဆုံစီမံကိန်းနဲ့ ပတ်သက်ပြီး အန်အယ်လ်ဒီပါတီကကော အစိုးရကပါ ပြည်သူ့မျက်နှာကို ကြည့်မယ်ပြောထားတယ်။ ပြည်သူတွေက ကန့်ကွက်မယ် မကြိုက်ဘူးဆိုရင် ဒါကို ဆက်လုပ်မှာလား။ ဖြေ- “ကျနော်တို့ ပြောထားပြီးပါပြီ။ ပြည်သူဆိုတာ နိုဗိုတယ်မှာလုပ်တဲ့ တက်ကြွလှုပ်ရှားသူတွေရှိတယ်၊  ဒါတွေအကုန်လုံးကို ပြည်သူလို့ ပြောဖို့ခဲယဉ်းပါတယ်။ ပြည်သူ့ ဆန္ဒယူမယ်ဆိုရင် ဥပမာ ပြည်သူ့ဆန္ဒခံယူတဲ့ဟာမျိုးလုပ်လေ၊ ဆန္ဒခံယူပွဲ လုပ်မယ်ဆိုလည်း အချက်အလက် တိတိကျကျပြောပြီးမှ လုပ်လို့ရမှာလေ။ ဒါမှ ဆန္ဒခံယူပွဲအဖြေက အဓိပ္ပါယ်ရှိမှာ၊ အချက်အလက်အပြည့်အစုံတင်ပြပြီးမှ ပြည်သူအများရဲ့ဆန္ဒကိုသိမှ ကျနော်တို့ဆုံးဖြတ်လို့ရမှာ၊ ပြည်သူအများစုက လျှပ်စစ်မရရင် နေပါစေ၊ တို့ နေနိုင်ပါတယ်ဆိုတဲ့ အချိန်မှာ ဆက်လုပ်၊ မလုပ်ဆိုတဲ့ ဒီအချက်ကို စဉ်းစားရမှာပါ။” ကျေးဇူးတင်ပါတယ်။
Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024