တနင်္သာရီတိုင်းဒေသကြီး မြိတ်မြို့နယ်၊ နတ်တလင်းသစ်တောကြိုးဝိုင်းအတွင်း ဧပြီ ၂၅ ရက်နေ့ကနေ ၂၆ ရက်နေ့ မနက်ပိုင်းအထိ မီးလောင်ကျွမ်းမှု ဖြစ်ပွားနေတယ်လို့ မီးသတ်တပ်ဖွဲ့က ပြောပါတယ်။ မြိတ်မြို့နယ်၊ ရေမြစ်ကြီးကျေးနဲ့ ကျောက်ဖြူတောင်ကျေးရွာ နတ်တလင်းသစ်တောကြိုးဝိုင်းမှာ ဧပြီ ၂၅ ရက်နေ့က တောမီးရှို့တဲ့ ဥယျာဉ်တခုကနေ မီးစတင်လောင်ကျွမ်းခဲ့တာပါ။ ''ညတုန်းက မီးသတ်တပ်ဖွဲ့၊ တပ်မတော်၊ ရဲနဲ့ ဒေသခံ တွေ စောင့်ကြည့်နေကြတယ်။ ဒီနေ့မနက်ပိုင်းအထိ လောင်ကျွမ်းနေတုန်းပါ။ လောင်ကျွမ်းနေတဲ့နေရာက နှစ်နေရာအထိရှိနေတယ်။ အားနည်းတဲ့အပိုင်းကို ထိန်းချုပ်ဖို့ ကြိုးစားနေရတယ်။ မီးသတ်ကားတွေက တောင်ပေါ်အထိ မတက်နိုင်ကြဘူး၊ ဒေသခံတွေက ကိုယ့်နည်း ကိုယ့်ဟန်နဲ့ ငြိမ်းသတ်နေကြရတယ်'' လို့ ကျွဲကူး မီးသတ်တပ်ဖွဲ့မှ ဒု-တပ်ခွဲမှူး ဦးဆောင်းက ပြောပါတယ်။ မီးစတင်လောင်ကျွမ်းတဲ့ ရေမြစ်ကြီးကျေးရွာဘက်ကနေ ကျောက်ဖြူတောင်ကျေးရွာဘက်ကို မီးကူးစက်လောင်ကျွမ်းလာနေပြီး သစ်တောကြိုးဝိုင်းအတွင်းရှိ ရာဘာစိုက်ခင်းတွေ မီးကူးစက်ခံနေရတယ်လို့ နတ်တလင်းသစ်တောကြိုးဝိုင်းတာဝန်ခံ တောအုပ် ဦးမျိုးလွင်က ပြောပါတယ်။ ''နတ်တလင်းကြိုးဝိုင်းအတွင်းမှာ လောင်ကျွမ်းနေတာပါ။ ဒီအထဲမှာ အစိုးရနဲ့ နှစ်ရှည်စာချုပ် ငှားရမ်းထားတဲ့ ရာဘာစိုက်ခင်းတွေရှိပါတယ်။ သစ်တောကြိုးဝိုင်းကဧက ခြောက်ထောင်ကျော်ရှိပါတယ်။ ဧက ဘယ်လောက်လောင်ကျွမ်းခံနေရသလဲဆိုတာ လက်ရှိမှာ မခန့်မှန်းနိုင်သေးပါဘူး'' လို့ ပြောပါတယ်။ မီးလောင်ကျွမ်းမှု ဖြစ်ပွားရာနေရာတွေမှာ မီးသတ် ကားတက်ဖို့ လမ်းမရှိတာ၊ တောင်ကုန်းတွေပေါ် ရှိနေတာကြောင့် ဒီနေ့ မနက် ၁၁ နာရီခွဲအချိန်အထိ မီးမငြိမ်းသတ်နိုင်သေးဘဲ အခက်အခဲဖြစ်နေကြောင်း သိရပါတယ်။ မြတ်ထွဋ် (မြိတ်)