ကျောက်ကြီးမြို့နယ်ထဲက နေအိမ်တချို့ကို ကေအန်ယူက ဖယ်ရှားခိုင်းဟု တပ်မတော်ပြော
3.3K
ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်ရှိ ကျေးရွာက အိမ်ထောင်စုတချို့ကို ကေအန်ယူက ဖယ်ရှားခိုင်းတာကြောင့် ရွာသားတွေ နေအိမ်စွန့်ခွာပြီး ထွက်ပြေးတိမ်း ရှောင်နေရ တယ်လို့ တပ်မတော်ဘက်က ပြောပါတယ်။
စစ်ဖြစ်လာမှာဆိုးလို့ တိမ်းရှောင်သွားတာ မဟုတ်ဘဲ ကေအန်ယူကနေ ဒီမှာနေတဲ့ အိမ်တွေ အားလုံးကို ဖယ်ခိုင်းတာလို့ တောင်ပိုင်းတိုင်း စစ်ဌာနချုပ်၊ တပ်မတော်သ တင်းထုတ်ပြန်ရေးအဖွဲ့၊ ဗိုလ်မှူးကြီး မျိုးအောင် က ဒီဗွီဘီကို ပြောပါတယ်။
“နေအိမ်တွေ တိမ်းရှောင်သွားတာ မဟုတ်ဘူး။ ကေအန်ယူ တပ်မဟာ ၃ ကနေပြီးတော့ ဖယ်ခိုင်းတာ။ ကျနော်သိတာက သူဟာသူ တိမ်းရှောင်သွားတာ မဟုတ်ဘူး။ စစ်ဖြစ်လာမှာဆိုလို့ တိမ်းရှောင်သွားတာ မဟုတ်ဘူး။ ကေအန်ယူ အဖွဲ့အစည်းကနေပြီးတော့မှ ဒီမှာနေတဲ့ အိမ်တွေအားလုံးကို ဖယ်ခိုင်းတာ”လို့ ဗိုလ်မှူးကြီး မျိုးအောင်က ပြောပါတယ်။
ကျေးရွာတချို့က နေအိမ် ၁၆ လုံးလောက်ကို ကေအန်ယူက ဖယ်ခိုင်းတာဖြစ်ပြီး တပ်မတော်ဘက်က တပ်အင်အားတိုးချဲ့တာ မဟုတ်သလို လမ်းဖောက်တာ နှစ်စဉ်ဖောက်နေကျမို့ ဒီနှစ် လမ်းအင်္ဂါရပ်နဲ့အညီ အနည်းငယ်ချဲ့တာဖြစ်တယ်လို့ လည်းဆိုပါတယ်။
ကေအန်ယူ စစ်သည်တချို့ ပစ်တာခတ်တာ ရှိခဲ့ဖူးတာကြောင့် လုံခြုံရေးအရ လမ်းဖောက်လုပ်နေတဲ့ ယာဉ်ယန္တရား၊ စစ်သည်တွေလုံခြုံမှုအရ ရှိသင့်ရှိထိုက်တဲ့ တပ်အင်အား ချထားတာဖြစ်လို့ အင်အားတိုးတာမဟုတ်ဘူးလို့လည်း တပ်မတော်ဘက်ကဆိုပါတယ်။
ပဲခူးတိုင်းဒေသကြီး၊ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီဝင်၊ အရပ်သားကိုယ်စားလှယ်၊ ဦးစောလင်းအောင်က “တပ်မတော်က ဖွံ့ဖြိုးရေး လာလုပ်တဲ့အခါကျတော့ စိုးရိမ်ပူပန်တာ ပါတယ်။ ညှိနှိုိင်းတာတွေတော့ လုပ်တယ်။ သိပ်မပြေ လည်ဘူး။ မပြေလည်တော့ တိုက်ပွဲများဖြစ်မလား။ ဖြစ်ရင်သူတို့လည်း ထိခိုက်မယ်ဆိုတဲ့ စိုးရိမ်ပူပန်မှုနဲ့ တချို့ရွာတွေ ရှောင်သွားတယ်လို့ ကြားတယ်။ အကုန်လုံးတော့ မဟုတ်ဘူး”လို့ ပြောပါတယ်။
ကေအန်ယူတပ်မဟာ ၃ ထိန်းချုပ်နယ်မြေ၊ ညောင်လေးပင်ခရိုင်၊ ကျောက်ကြီးအရှေ့ဖက် မိုင် ၃၀ အကွာမှာရှိတဲ့ ကျေးရွာက အိမ်ထောင်စုတချို့ဟာ နှစ်ဖက်တိုက်ပွဲဖြစ်ပွားမှာကို စိုးရိမ်တဲ့အတွက် နေအိမ်စွန့်ခွာပြီး ထွက်ပြေးတိမ်းရှောင်နေရတယ်လို့ သတင်းတွေ ထွက်နေတာပါ။
ကေအန်ယူ ဗဟိုကော်မီတီဝင်တဦးကတော့ ရွာသားတွေ တိမ်းရှောင်နေတာဟာ ကြောက်ပြီး တိမ်းရှောင်နေတာဖြစ်ပြီး ကေအန်ယူဘက်က စေခိုင်းတာ မရှိဘူးလို့ ပြောပါတယ်။
“ ဘယ်ဟုတ်မလဲ သူတို့ ဘာသူတို့ ကြောက်ပြီးရွှေ့ကြတာ။ လက်နက်ကြီးနဲ့တခါတလေ သွားလုပ်ချလိုက်သေးတယ်။ ရွာထဲတော့မချဘူးပေါ့ကွာ လူရှိတဲ့ နေရာတော့ မပစ်ဘူးပေါ့ကွာ။ တောထဲကို ဗုံးကနဲဆိုတော့ ကြောက်ပြီးထွက်ပြေးကြတာ။ ဘယ်ကေအန်ယူက သွားပြီး ရွှေ့ခိုင်းရမှာလဲ။”
ကျောက်ကြီးမြို့နယ်အတွင်း ဖောက်လုပ်တဲ့လမ်းဟာ ကေအန်ယူတပ်မဟာ ၅ ဘက် ဆက်သွယ်ဖောက်လုပ်မယ့် လမ်းဖြစ်ပြီး လတ်တလော ကေအန်ယူဘက်က တားမြစ်ထားတဲ့ ကြားက တပ်မတော်ဘက်က ဆက်လက်ဖောက်လုပ်နေတာဖြစ်တယ်လို့လည်း ပြောပါတယ်။
ဒီလမ်းဖောက်မှုနဲ့ပတ်သက်ပြီး ပြီးခဲ့တဲ့ သင်္ကြန်မတိုင်ခင် ကေအန်ယူခေါင်းဆောင်တွေ နေပြည်တော်မှာ သွားရောက်ဆွေးနွေးခဲ့ပေမယ့် မအောင်မြင်ခဲ့ဘူးလို့လည်း ပြောပါတယ်။
သတင်း- ရဲမင်းခေါင်
