ဘူးသီးတောင်မြို့နယ် နွားရုံတောင်နယ်ခြားစောင့်စခန်း မီးလောင်
DVB
·
April 13, 2019
ရခိုင်ပြည်နယ်၊ ဘူးသီးတောင်မြို့နယ်ရှိ နွားရုံတောင်နယ်ခြားစောင့်စခန်းမှာ ဧပြီ ၁၂ ရက်မွန်းလွဲ ၃ နာရီလောက်က မီးလောင်မှုဖြစ်ပွားခဲ့တယ်လို့ စံဂိုးထောင်ကျေးရွာအုပ်စု အုပ်ချုပ်ရေးမှူး စံထွန်းကျော်က ပြောပါတယ်။
"နယ်ခြားစောင့် စခန်းမီးလောင်တယ်လို့ ရွာသားတွေဖုန်းဆက်ပြောလို့ သိရပါတယ်။ ဘာကြောင့် လောင်တယ်ဆိုတာတော့မသိပါဘူး။ ထင်းထားတဲ့ အဆောင် တခုလုံးမီးလောင်သွား တာလို့သိရတယ်။" လို့ပြောကြားပါတယ်။
နွားရုံတောင်ရွာဟာ စုံဂိုးထောင်ကျေးရွာအုပ်စုထဲမှာပါဝင်ပြီး နွားရုံတောင် နယ်ခြားစောင့်စခန်းကတော့ ရွာရဲ့ အရှေ့ဘက် ဘူးသီးတောင်- ရသေ့တောင်ကားလမ်းပေါ်မှာ တည်ရှိပါတယ်။
မီးလောင်မှုနဲ့ပတ်သက်ပြီး အမည်မဖော်လိုတဲ့ မျက်မြင် ကျေးရွာသားတဦးက "မီးလောင်တာနဲ့ စစ်တပ်နဲ့ နယ်ခြားစောင့် တပ်သား အင်အား ၁၂၀ လောက် ကျောက်ရံအုပ်စု ထိပ်တူးပေါက်ကျေးရွာဘက်ကို ထွက်သွားကြပါတယ်။ မီးသတ်ကားလည်း မလာပါဘူး။ မီးလောင်တယ်ဆိုရင် သူတို့ မီးငြှိမ်းသတ်ရမယ့်တာဝန်ရှိပါတယ်"လို့ပြောပါတယ်။
မီးလောင်မှုကို မြင်တွေ့လိုက်ရတဲ့ နောက်ထပ် ရွာသားတဦးကတော့ “ထမင်းချက်အဆောင်တဆောင်၊ မီးစက်ထားတဲ့ အဆောင်တ ဆောင်နဲ့ အခြား အဆောင်တဆောင်ပါ ပါမီးလောင်နေတာတွေရပါတယ်။ ညနေ ၆နာရီအချိန်အထိ နောက် အဆောင် ၂ ဆောင်ကို ဆက်လက်မီးကူနေပါတယ်” လို့ ပြောပါတယ်။
မီးလောင်ရာနေရာကို ဘူးသီးတောင်မီးသတ် တပ်ဖွဲ့တွေ လာရောက်ခြင်းမရှိသလို အာဏာပိုင်တွေကလည်း လာရောက်ကြည့်ရှု မီးငြှိမ်းသတ်ခဲ့တာ မရှိဘူးလို့ ဒေသခံ ရွာသားတွေက ပြောပါတယ်။
အဆိုပါ မီးလောင်မှုနဲ့ပတ်သတ်ပြီး ဘူးသီးတောင်မြို့နယ် အုပ်ချုပ်ရေးမှူး ဦးကျော်မင်းထွန်းကတော စုံစမ်းနေဆဲပဲလို့ ပြောပါတယ်။
နွားရုံတာင်ကျေးရွာမှာ အိမ်ခြေ ၁၇၀ ရှိတဲ့အနက် အိမ်ထောင်စု ၇၀ လောက်ကတော့ ရွာမှာ လုံခြုံမှု မရှိတော့တဲ့ အတွက် စေတောင်စစ်ဘေးရှောင်စခန်းကို ခိုလှုံသွားကြပြီလို့ သိရပါတယ်။