ထိုင်းပုဂ္ဂလိကဆေးရုံများ ဆေးကုသစရိတ် ပိုတောင်းပါက တိုင်တန်းနိုင်

ဓာတ်ပုံ - The Nation
ထိုင်းပုဂ္ဂလိကဆေးရုံတွေအနေနဲ့ ပုံမှန်ထက် ဆေးကုသစရိတ် ပိုတောင်းရင် သက်ဆိုင်ရာကို တိုင်တန်းနိုင်တယ်လို့ သည်နေးရှင်းသတင်းမှာ ဖော်ပြပါတယ်။ ထိုင်းနိုင်ငံက ပုဂ္ဂလိကဆေးရုံပေါင်း ၁၀၀ ကျော်မှာ ထိုက်သင့်တဲ့ ဆေးဖိုးဝါးခတွေထက် အဆပေါင်း ၂၀၀ ရာခိုင်နှုန်းမှ ၃၀၀ ရာခိုင်နှုန်းထိ ကောက်ခံနေတာကို တွေ့ရှိရပြီး လူနာတွေအနေနဲ့ မတရားဘူးလို့ယူဆရင် သက်ဆိုင်ရာကို တိုင်တန်းနိုင်တယ်လို့ ထိုင်းနိုင်ငံ  ပြည်တွင်းစီးပွားကူးသန်းရောင်းဝယ်မှု ဝန်ကြီးဌာနက ပြောပါတယ်။ ဒီမတိုင်ခင်က သူတို့ဌာနအနေနဲ့ ထိုင်းနိုင်ငံရှိ ပုဂ္ဂလိကဆေးရုံပေါင်း ၃၅၃ ရုံက ဆေးဖိုးဝါးခနဲ့ ဝန်ဆောင်မှု အဖိုးအခစာရင်းတွေကို ပေးပို့ဖို့ ညွှန်ကြားထားကြောင်း၊ အဲဒီစာရင်းတွေနဲ့ ပတ်သက်တဲ့ အစည်းအဝေးတရပ်ကို ပြီးခဲ့တဲ့ ဧပြီ ၄ ရက်နေ့က ကျင်းပခဲ့ရာမှာ ပုဂ္ဂလိကဆေးရုံပေါင်း ၂၉၅ ရုံရဲ့ အစီရင်ခံစာကို လက်ခံရရှိခဲ့ကြောင်း၊ အဲဒီထဲက ဆေးရုံ ၅၀ ရာခိုင်နှုန်းဟာ ဆေးဖိုးဝါးခနဲ့ ဆေးကုသခ ဝန်ဆောင်မှုစရိတ်မှာ ပုံမှန်ထက် ၂၀၀ ရာခိုင်နှုန်းကနေ ၃၀၀ ရာခိုင်နှုန်းထိ ပိုမိုကောက်ခံထားတာ တွေ့ရတယ်လို့  ပြည်တွင်းစီးပွားကူးသန်းရောင်းဝယ်မှု ဝန်ကြီးဌာန ညွှန်ကြားရေးမှူးချုပ် ဝိချိုင်း ဖိုးချနကစ်က ပြောပါတယ်။ ဒါကြောင့် သူတို့ ပြည်တွင်းစီးပွားကူးသန်းရောင်းဝယ်မှု ဝန်ကြီးဌာနအနေနဲ့ အမှန်တကယ် ကုန်ကျမယ့် ဆေးဖိုးဝါးခ၊ ကုသစရိတ်စက စာရင်းတွေ ပြုစုပြီး ဌာနရဲ့ ဝက်ဘ်ဆိုက်ပေါ်မှာ ဖော်ပြပေးသွားမှာဖြစ်ကြောင်း၊ ပြည်သူတွေအနေနဲ့ ပုဂ္ဂလိကဆေးရုံက ဆေးဖိုးဝါးခ မတရားတောင်းတယ်လို့ ယူဆရင် တိုင်ကြားနိုင်ကြောင်း၊ ဆေးကုသစရိတ် ပိုတောင်းပါက ၁၉၉၉ နှစ်က အတည်ပြုပြဋ္ဌာန်းတဲ့ ကုန်ဈေးနှုန်းနဲ့ ဝန်ဆောင်မှု အက်ဥပဒေပုဒ်မ ၂၉ အရ ထောင်ဒဏ် ၇ နှစ်နဲ့ ငွေဒဏ် ဘတ် ၁ သိန်း ၄ သောင်းထိ ကျခံရမယ်လို့ ညွှန်ချုပ်က ဆက်ပြောပါတယ်။ အစီရင်ခံစာ ရောက်မလာသေးတဲ့ ကျန်ပုဂ္ဂလိကဆေးရုံ ၅၈ ရုံကိုလည်း ဆက်သွယ် အကြောင်းကြားသွားမှာဖြစ်ကြောင်း၊ ညွှန်ကြားချက်အတိုင်း လိုက်နာခြင်းမရှိပါက ရဲတပ်ဖွဲ့ကို အကြောင်းကြားပြီး လိုအပ်သလို အရေးယူသွားမယ်လို့ ထိုင်းပြည်တွင်းစီးပွား ကူးသန်းရောင်းဝယ်မှု ဝန်ကြီးဌာန ညွှန်ချုပ်က ပြောသွားပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up