မြောက်ဦးရှေးဟောင်းစေတီပုထိုးများအနီး လက်နက်ကြီး ကျည်များကျရောက်
ပိုင်စိုး
·
March 20, 2019
ရခိုင်ပြည်နယ် မြောက်ဦးမြို့နယ်ထဲမှာ ပစ်ခတ်မှုတွေကြောင့် ရှေးဟောင်းစေတီ ပုထိုးတွေအနီးကို လက်နက်ကြီးကျည်တွေကျရောက်ခဲ့တယ်လို့ မြောက်ဦး ယဉ်ကျေးမှု အမွေအနှစ်ဒေသ ထိန်းသိမ်းစောင့်ရှောက်ရေးအဖွဲ့က အတည်ပြု ပြောပါတယ်။
ပြီးခဲ့တဲ့ မတ် ၁၅ ညက မြောက်ဦးမြို့နယ်မှာ တပ်မတေ်ာနဲ့ အေအေ (ရက္ခိုင့်တပ်မတော်)တို့အကြား ပစ်ခတ်တိုက်ခိုက်တာတွေဖြစ်ခဲ့သလို ရှေးဟောင်း စေတီပုထိုးတွေကိုလည်း ထိခိုက်ခဲ့တာလို့ ဆိုပါတယ်။
မြောက်ဦး ယဉ်ကျေးမှုအမွေအနှစ်ဒေသ ထိန်းသိမ်းစောင့်ရှောက်ရေးအဖွဲ့ ဥက္ကဋ္ဌ ဒေါ်ခင်သန်းက “ဒုက္ကန်သိမ်နားကို ကျပါတယ်။ ပေ ၅၀ လောက်အကွာမှာပါ။ အဲဒီမှာရှိတဲ့ လုံခြုံရေး အဆောက်အဦလည်းပဲ ဇကာပေါက်လို ဖြစ်သွားပါတယ်။ လေးမျက်နှာဘုရားရဲ့ အနောက်ဘက် မြေထဲစေတီနားကိုလည်း လက်နက်ကြီးကျည်ကျပြီး ဖိနပ်ပေါ်ကို ကျပါတယ်။ နောက်ပြီးတော့ တောမီးတွေကလည်း ခဏ ခဏ လောင်နေပါတယ်။ တခွက်ရာတောင်တန်း၊ ခါးကြီးသမ တောင်တန်းနဲ့ ပီစိတောင်တွေမှာ လောင်ပါတယ်။ ကျမတို့က ကမ္ဘာ့ယဉ်ကျေးမှု အမွေအနှစ်ဝင်ဖို့အတွက် Archeological Zone (ရှေးဟောင်းအမွေအနှစ်ဇုန်) အဖြစ်နဲ့ သတ်မှတ်ထားတဲ့ ဇုန်အတွင်းမှာ လက်နက်ကြီးတွေ ကျတယ်၊ ပေါက်ကွဲမှုဖြစ်တယ်၊ ထိခိုက်မှုဖြစ်တယ်ဆိုတာကတော့ ဝမ်းနည်းဖို့ ကောင်းတယ်ပေါ့နော်။ မလုပ်သင့်တဲ့ ကိစ္စတွေပါ” လို့ ပြောပါတယ်။
ရှေးဟောင်းစေတီပုထိုးတွေ ထိခိုက်ပျက်စီးတဲ့ အခြေအနေကို အသေးစိတ်မသိရသေးဘဲ ပစ်ခတ်တာတွေ ရှိနေဆဲဖြစ်လို့ တချို့နေရာတွေကို သွားဖို့ ခက်နေတယ်လို့ သူက ပြောပါတယ်။
ရှေးဟောင်းအမွေအနှစ်ဒေသကို ကာကွယ်နိုင်ရေးအတွက် လိုအပ်တာတွေ ဆောင်ရွက် ပေးဖို့အတွက် မြောက်ဦးယဉ်ကျေးမှုအမွေအနှစ်ဒေသ ထိန်းသိမ်းစောင့်ရှောက်ရေးအဖွဲ့ ကနေ ရခိုင်ပြည်နယ် ဝန်ကြီးချုပ်ဆီကို စာနဲ့လည်း တင်ပြထားပါတယ်။
မြန်မာနိုင်ငံအနေနဲ့ လက်နက်ကုိုင်ပဋိပက္ခတွေကြားမှာ ယဉ်ကျေးမှုအမွေအနှစ်တွေကို ကာကွယ်စောင့်ရှောက်နိုင်ဖို့ ရည်ရွယ်တဲ့ 1954 Hague Convention နိုင်ငံတကာ သဘောတူညီချက်ကို ၁၉၅၆ ခုနှစ်မှာ လက်မှတ်ရေးထိုးထားပါတယ်။
ဒီသဘောတူညီချက်အရ ယဉ်ကျေးမှုအမွေအနှစ်ဒေသတွေမှာ စက်မက်ဖြစ်တာ၊ ယဉ်ကျေးမှု အမွေအနှစ်တွေကို ခံတပ်လို အကာအကွယ်ယူတာတွေ မလုပ်ဖို့ ပြဋ္ဌာန်းထား တယ်လို့ မြန်မာ ရှေးဟောင်းသုတေသန ပညာအသင်းက ဆိုပါတယ်။
ဒါကြောင့် နှစ်ဖက် အဖွဲ့အစည်းတွေအနေနဲ့ ဒီပြဋ္ဌာန်းချက်တွေကို လေးစားလိုက်နာဖို့၊ မြောက်ဦး ယဉ်ကျေးမှု အမွေအနှစ်ဒေသကို စစ်မဲ့ဇုန်အဖြစ် သဘောတူညီချက်ထားပေးဖို့လည်း မေတ္တာရပ်ခံ ထားပါတယ်။
ရခိုင်မြောက်ပိုင်း ပဋိပက္ခမှာ ပါဝင်သူအားလုံးအနေနဲ့ အရပ်သားတွေကို အကာအကွယ် ပေးဖို့၊ ယဉ်ကျေးမှုအမွေအနှစ်ဆိုင်ရာ အဆောက်အဦတွေနဲ့ အရပ်ဒေသကို စောင့်ရှောက် ထိန်းသိမ်းဖို့ ကုလသမဂ္ဂ ဌာနေညှိနှိုင်းရေးမှူးနဲ့ လူသားချင်းစာနာမှုဆိုင်ရာညှိနှိုင်းရေးမှူးက တိုက်တွန်းထားပါတယ်။
ဒ့ါပြင် မြောက်ဦးဒေသက ပစ်ခတ်မှုတွေကိစ္စတွေကို စုံစမ်းစစ်ဆေးပြီး နိုင်ငံတကာ သဘောတူညီချက် ချိုးဖောက်နေသူတွေကို အရေးယူပေးဖို့ ရန်ကုန်ပညာရေး တက္ကသိုလ် ကျောင်းသားတွေက မနေ့က ရန်ကုန်မှာ ဆန္ဒပြတောင်းဆိုပါတယ်။
မြောက်ဦးရှေးဟောင်းသုတေသနနယ်မြေနဲ့ ယဉ်ကျေးမှုအဆောက်အအုံတွေကို ကမ္ဘာ့အမွေအနှစ် စာရင်းဝင်အဖြစ် တခြားဒေသ ၇ ခုနဲ့အတူ အဆိုပြုထားတယ်လို့ သာသနာရေးနဲ့ ယဉ်ကျေးမှု ဝန်ကြီးဌာနရဲ့ အချက်အလက်တွေအရ သိရပါတယ်။