ဒုတိယကမ္ဘာစစ်အတွင်း ကျဆုံးအမေရိကန်စစ်သည်ရုပ်ကြွင်းများ ပြန်လည်သယ်ဆောင်
Email This Story :
ဒုတိယကမ္ဘာစစ်အတွင်းက မြန်မာပြည်မှာ ကျဆုံးခဲ့တဲ့ အမေရိကန်စစ်သည်တွေ ရဲ့ ရုပ်ကြွင်းတွေကို အမေရိကန်နိုင်ငံကို ပြန်လည်သယ်ဆောင်တဲ့ အခမ်းအနား မတ်လ ၁၂ ရက် ညနေက မန္တလေးအပြည်ပြည်ဆိုင်ရာ လေယာဉ်ကွင်းမှာ ပြုလုပ်ခဲ့ပါတယ်။
အမေရိကန်ကာကွယ်ရေးဝန်ကြီးဌာနရဲ့ စစ်ကြောင်းရှာဖွေမှတ်တမ်းတင်ရေးအေဂျင်စီ (ဒီပီအေအေ)ရဲ့အစီအစဉ်နဲ့ စစ်ကိုင်းတိုင်း၊ ဆားလင်းကြီးဒေသတ၀ိုက်မှာမကြာသေးခင်က ရှာဖွေတွေ့ရှိခဲ့တဲ့ ဒုတိယကမ္ဘာစစ်အတွင်း ကျဆုံးခဲ့တဲ့ အမေရိကန် စစ်သည်တွေ ဖြစ်နိုင်ခြေရှိတဲ့သူတွေရဲ့ ရုပ်ကြွင်းတွေကို ပြန်လည် သယ်ယူခဲ့တာဖြစ်ပါတယ်။
ဒီရုပ်ကြွင်းတွေဟာ ဘယ်သူဘယ်ဝါဖြစ်ကြောင်း ဖြစ်နိုင်ခြေရှိတာတွေကို ဆက်လက်ခွဲခြမ်း စိတ်ဖြာ ရှာဖွေဖော်ထုတ်ဖို့ အမေရိကန်ပြည်ထောင်စု ဟာဝိုင်အီရှိ ဒီပီအေအေ ဓာတ်ခွဲခန်းကို ဆက်လက် ပို့ဆောင်သွားမှာလည်းဖြစ်ပါတယ်။
ကျနော်တို့နိုင်ငံအတွက် တာဝန်ထမ်းဆောင်ရင်း ကျဆုံးခဲ့တဲ့ အမေရိကန်နိုင်ငံသားတွေ အဖြစ် ဖြစ်နိုင်ခြေရှိတဲ့ ရုပ်ကြွင်းတွေကို ဒီကနေ့ ကျနော်တို့ ပြန်လည် သယ်ယူပို့ဆောင်တာလို့ အမေရိကန်သံအမတ်ကြီး စတော့မာစီရယ်က ပြောပါတယ်။
“အမေရိကန်ရဲ့ ကျဆုံးစစ်သည်တွေအကြောင်းကို ထာဝရအမှတ်ရဂုဏ်ပြုနေဖို့၊ သူတို့ရဲ့ စွန့်လွှတ်အနစ်နာခံမှုတွေကို ဘယ်တော့မှ မမေ့မလျော့ ငြိမ်းချမ်း၊ တရားမျှတမှုရှိပြီး နေရာတိုင်းမှာ လွတ်လပ်မှုရှိတဲ့ နိုင်ငံတနိုင်ငံအဖြစ် တည်ဆောက်ကြိုးပမ်း အားထုတ်ရေးအတွက် သူတို့ကို ပေးဆပ်ဖို့ ကျနော်တို့မှာတာဝန်ရှိနေပါတယ်။”
ဒီရုပ်ကြွင်းတွေဟာ ၁၉၄၄ ခုနှစ် ဖေဖော်ဝါရီက စစ်သည် ၇ ဦးလိုက်ပါသွားခဲ့တဲ့ ဘီ- ၂၅ လေယာဉ်နဲ့ ဆက်စပ်နေမယ်လို့ယုံကြည်ရတယ်လို့ ဆိုပါတယ်။ ဒုတိယကမ္ဘာစစ်အတွင်း မြန်မာနိုင်ငံမှာ ကျန်ရစ်ပျောက်ဆုံးခဲ့ကာ ရှာဖွေမတွေ့သေးတဲ့ အမေရိကန်စစ်သည် ၆၃၂ ဦး ရှိမယ်လို့ ခန့်မှန်းပါတယ်။ ဒီပီအေအေအနေနဲ့ မြန်မာနိုင်ငံမှာ ၂၀၀၃-၂၀၀၄ ခုနှစ်တွေမှာ ရှာဖွေရေးအစီအစဉ် သုံးကြိမ် ပြုလုပ်ခဲ့ပြီး ၂၀၁၃ နဲ့ ၂၀၁၉ မှာ ၇ ကြိမ် ပြုလုပ်ခဲ့ပါတယ်။
ဒုတိယကမ္ဘာစစ်အတွင်း ကျဆုံးခဲ့တဲ့ အမေရိကန်စစ်သည်တွေရဲ့ ရုပ်ကြွင်းတွေကို အမေရိကန်နိုင်ငံကို ပထမဆုံးအကြိမ် ပြန်လည်သယ်ဆောင်တဲ့အခမ်းအနားကို အမေရိကန်သံရုံး တာဝန်ရှိသူတွေနဲ့ မန္တလေးဒေသကြီး အစိုးရအဖွဲ့က ရှမ်းတိုင်းရင်းသားရေးရာဝန်ကြီး ဦးစန်းပန်းဆိုင်တို့ တက်ရောက်ခဲ့ကြပါတယ်။
