ဂြိုဟ်သားနှင့် လူသားများအကြား ပဋိပက္ခ ရုပ်ရှင် – Captive State (နမူနာ)

သွေးပျက်ထိတ်လန့်စရာ မြင်ကွင်းတွေနဲ့ ရာဇဝတ်ပြစ်မှုဆိုင်ရာ Sci-Fi အမျိုးအစား ရုပ်ရှင်ကားတကားဖြစ်တဲ့ Captive State ကို လာမယ့် မတ်လ ၁၅ ရက်နေ့ ရုံတင်ပြသတော့မှာ ဖြစ်ပါတယ်။ ဒီကားကိုတော့ အမေရိကန် ရုပ်ရှင်ထုတ်လုပ်ရေး ကုမ္ပဏီတခုဖြစ်တဲ့ Focus Features က တင်ဆက်လိုက်တာဖြစ်ပြီး ဗြိတိန်ရုပ်ရှင်ဒါရိုက်တာ Rupert Wyatt က ရိုက်ကူး ပုံဖော်ပေးထားတာပါ။ ဒီရုပ်ရှင်ထဲမှာတော့ လူသားတွေနေထိုင်တဲ့ ကမ္ဘာကို ပြင်ပကမ္ဘာက ဂြိုဟ်သားတွေ အချိန်ဆယ်စုနှစ်နဲ့ချီကြာအောင် သိမ်းပိုက်အုပ်ချုပ်နေခဲ့ကြချိန်ကို အခြေတည်ထားခဲ့တာပါ။ ဒီအချိန်မှာ တချို့ကတော့ ဂြိုဟ်သားတွေနဲ့ ပူးပေါင်းကြပြီး တချို့ကတော့ ခုခံတော်လှန်ကြဖို့ ကြိုးစားလာကြချိန်မှာ ဘာတွေဖြစ်လာမလဲ။ ဒါရိုက်တာ Rupert Wyatt ဟာ ၂၀၁၁ ခုနှစ်က ရုံတင်ပြသခဲ့ပြီး ရုပ်ရှင်ထူးချွန်ဆုတွေ အများကြီးရခဲ့တဲ့ Rise of the Planet of the Apes ရုပ်ရှင်ကို ရိုက်ကူးပုံဖော်ခဲ့သူဖြစ်တာမို့ ဒီကားထဲမှာလည်း ဘယ်လိုရိုက်ကူးထားမလဲ ဆိုတာတွေကို ပရိသတ်တွေ ရှုစားကြရမှာ ဖြစ်ပါတယ်။ ဒီကားထဲမှာတော့ အမေရိကန် သရုပ်ဆောင်မင်းသား John Goodman က ချီကာဂိုက ရဲအရာရှိ Mulligan အနေနဲ့ ခေါင်းဆောင်ပါဝင်ထားပြီး သရုပ်ဆောင်မင်းသမီး Vera Farmiga၊ ရက်ပ်ပါအဆိုတော် Machine Gun Kelly တို့နဲ့အတူ တခြားသရုပ်ဆောင်တွေလည်း ပါဝင်ထားကြတာ ဖြစ်ပါတယ်။ ဒီကားထဲမှာပါဝင်တဲ့ ကြမ်းတမ်းတဲ့ တိုက်ခိုက်မှုတွေ၊ ဇာတ်ဝင်ခန်းမြင်ကွင်းတွေ၊ ပြကွင်းပြကွက်တွေ၊ ပြောစကား ဒိုင်ယာလော့ခ်တွေက အသက် ၁၃ နှစ်အောက် ကလေးငယ်တွေ ကြည့်ရှုဖို့ မသင့်တော်တာမို့ ဒီကားကို ကြည့်ရှုမယ်ဆိုရင်တော့ မိဘအုပ်ထိန်းသူ ခွင့်ပြုချက်နဲ့မှ ကြည့်ရှုသင့်တဲ့ PG-13 အဆင့် သတ်မှတ်ထားပါတယ်။ ကြာမြင့်ချိန် မိနစ် ၁၁၀ ရှိတဲ့ ဒီရုပ်ရှင်ကားကိုတော့ ဘတ်ဂျက် အမေရိကန်ဒေါ်လာ ၂၅ သန်း အကုန်အကျခံ ရိုက်ကူးထားတာ ဖြစ်ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up