ရတနာပုံဆိုင်ဘာစီးတီးကျောင်းသားကိုသတ်သည့် အဓိကတရားခံကို မသေမချင်းကြိုးကွင်းစွပ်သတ်ရန် အမိန့်ချ
2.2K
မန္တလေးတိုင်း၊ ပြင်ဦးလွင်မြို့နယ် ပြင်စာကျေးရွာ ဆိုင်ဘာစီးတီးမြို့သစ် မီးသတ်စခန်းအနီး ရတနာပုံဆိုင်ဘာစီးတီးကျောင်းသားကို သတ်ခဲ့တဲ့သူတွေကို မသေမချင်း ကြိုးကွင်းစွပ်သတ်ဖို့နဲ့ ရာဇသတ်ကြီးပုဒ်မ ၃၉၇ အရ အလုပ်ကြမ်းနဲ့ ထောင်ဒဏ် ၁၀ နှစ်ကျခံဖို့ ဒီနေ့ ပြင်ဦးလွင်ခရိုင် တရားရုံးက အမိန့်ချမှတ်ပါတယ်။
အမှုတွဲမှာပါဝင်ခဲ့တဲ့ ကုဋေစိုး(ခ) ငစိုးကို ပုဒ်မ ၃၉၇ အရ အလုပ်ကြမ်းနဲ့ ထောင်ဒဏ် နှစ် ၂၀၊ စူးရှ (ခ) ကျော်ကျော်သင်းကို ရာဇသတ်ကြီးပုဒ်မ ၃၉၆ အရ အလုပ်ကြမ်းနှင့်ထောင်ဒဏ် ၁၀နှစ် အမိန့်ချမှတ်ခဲ့ပြီး အသက်မပြည့်သေးတဲ့ မောင်နှစ်တစ် (ခ) ကိုကိုမောင်ကိုတော့ ထောင် ၇ နှစ် ချမှတ်ခဲ့ပါတယ်။
ပြင်ဦးလွင်ခရိုင်တရားရုံးက ပြန်ကြားရေးအရာရှိ ဒေါ်သန္တာရှင်က “ကျောင်းသားကို သတ်ခဲ့တဲ့အမှုမှာ (၁) တရားခံ မှုံကြီးက ဒီကိစ္စမှာ အဓိကပတ်သက်နေလို့ သူ့ကို သေဒဏ်ချမှတ်ခဲ့ ပါတယ်။ အဲ့ဒီမှာ (၃) တရားခံပါပါတယ်။ စူးရှ (ခ) ကျော်ကျော်သင်း က လူငယ်ဖြစ်နေတဲ့အတွက် ၁၀ နှစ်အထက် ချလို့မရဘူးဖြစ်နေတယ်”လို့ ပြောပါတယ်။
လူသတ်တရားခံကို ရုံးချိန်းပေါင်း ၁၀ ချိန်း စစ်ဆေးခဲ့ပြီး တရားလိုပြသက်သေ ၂၃ ဦးအနက် ၉ ဦးကိုတော့ တရားရုံးက ပယ်ချခဲ့ပါတယ်။ နောက်တိုးသက်သေ တဦးကို စစ်ဆေးခဲ့ကာ တရားလိုပြသက်သေတွေ စစ်ဆေးအပြီးမှာ တရားခံပြသက် နှစ် ဦးကို ဆက်လက်စစ်ဆေးခဲ့ ပါတယ်။
ပြင်ဦးလွင်မြို့နယ် ပြင်စာအနီးက နည်းပညာတက္ကသိုလ် ရတနာပုံ ဆိုင်ဘာစီးတီး ICT မေဂျာ ဒုတိယနှစ် ပညာသင်ကြားနေတဲ့ အသက် ၁၇ နှစ်အရွယ် ကိုထက်လင်းသန့်ကို ဒီဇင်ဘာ ၆ ရက် ညနေက အမည်မသိလူတွေက ရိုက်နှက် ဆိုင်ကယ်လုယက်ခဲ့ပြီး နေရာမှာ သေဆုံးခဲ့ပါတယ်။
ဒီဇင်ဘာလ ၁၀ ရက်က ကျူးလွန်သူ ၃ ဦးကို ပထမဆုံးဖမ်းမိခဲ့ပြီး အခြားတဦးကိုလည်း သက်သေခံ လုယက်ခံခဲ့ရတဲ့ မော်တော်ဆိုင်ကယ်နဲ့အတူ ထပ်မံဖမ်းဆီးရမိခဲ့ပါတယ်။
ကျောင်းသား ကိုထက်လင်းသန့်နဲ့ မဇူးဇူးဟန်ကို တို့ဟာ သုံးထောင်ကျေးရွာက စားသောက်ဆိုင်ကနေ ရတနာပုံမြို့သစ်စီမံကိန်းအတွင်းလမ်းကနေ ပြန်လာစဉ်မှာ အမည်မသိလူတွေက ဆိုင်ကယ်ကိုတွန်းလှဲပြီး တုတ်နဲ့ ရိုက်နှက်ခဲ့တာပါ။
ဒီအမှုမှာ ပါဝင်ပတ်သက်တဲ့ ကျူးလွန်သူ ၅ ဦးရှိပေမယ့် ငမိုး(ခ)မိုးကြီးဟာ ထွက်ပြေးလွတ်မြောက်နေလို့ ဝရမ်းထုတ်ထားပါတယ်။
