နေပြည်တော်လွှတ်တော်အနီးနားမှာ ဒရုန်းလွှတ်တင်ခဲ့တဲ့ ပြင်သစ်နိုင်ငံသား တဦးကို ဥတ္တရသီရိမြို့နယ်တရားရုံးက ဒီကနေ့ အလုပ်နဲ့ ထောင်ဒဏ် ၁ လ ချမှတ်ခဲ့ပါတယ်။
မြို့နယ် တရားသူကြီး ဒေါ်စုလာဘ်ရတနာဦးက “သူဟာ နိုင်ငံခြားသားဖြစ်တယ်။ မြန်မာနိုင်ငံအတွင်းကို ဒရုန်းသယ်လာခွင့်ရှိမရှိ မသိရှိတဲ့အတွက် ရုံးတော်က သက်ညှာတဲ့ အနေနဲ့ ပြစ်ဒဏ် အလုပ်နဲ့ ထောင်ဒဏ် တလအမိန့်ချမှတ်ပါတယ်”လို့ ပြောပါတယ်။
ပြင်သစ်နိုင်ငံသား Mr.Michel Desclaux ဟာ လွှတ်တော်နားမှာ ဖေဖော်ဝါရီ ၇ ရက်နေ့က ဒရုန်းလွှတ်တင်ခဲ့မိတာကြောင့် အမှုရင်ဆိုင်နေရတာ ဖြစ်ပါတယ်။
အဆိုပါ ပြင်သစ်နိုင်ငံသားဟာ တရားဝင် ဗီဇာနဲ့ ဇန်နဝါရီ ၃၀ ရက်က မြဝတီ နယ်စပ်ဂိတ်ကနေ စက်ဘီးနဲ့ ဝင်ရောက်လာတာဖြစ်ပြီး နေပြည်တော်ကို လာရာ လမ်းတလျှောက်က မြို့တွေမှာလည်း မှတ်တမ်းတင် ဓာတ်ပုံတွေ ရိုက်ကူးခဲ့ပါတယ်။
