မင်းပြားမြို့နယ်တွင် ကျေးရွာအုပ်ချုပ်ရေးမှူး ၁ ဦး သေနတ်ဖြင့် ပစ်သတ်ခံရ
DVB
·
February 13, 2019
ရခိုင်ပြည်နယ်၊ မင်းပြားမြို့နယ်၊ ကျောက်ခေါက်ကျေးရွာက အုပ်ချုပ်ရေးမှူးကို အမည်မသိလူ လူလေးဦးကနေအိမ်ကိုလာရောက်ပြီး သေနတ်နဲ့ ပစ်သတ်သွားခဲ့တယ်လို့ ကျောက်ခေါက်ကျေးရွာ ဒေသခံတွေက ဒီဗွီဘီကို ပြောပါတယ်။
ဖေဖော်ဝါရီ ၁၂ ရက်ည ၉ နာရီဝန်းကျင်မှာ လူလေးဦးက ကျေးရွာအုပ်ချုပ်ရေးမှူး ဦးမောင်ကျော်ရဲ့ အိမ်ရှေ့ကို ရောက်လာပြီး ထိုင်တဲ့သူတွေအထဲမှာ အုပ်ချုပ်ရေးမှူးကို ရွေးပြီး ပစ်သတ်သွားတယ်လို့ အမည်မဖော်လိုတဲ့ ကျေးရွာသားတဦးက ပြောပါတယ်။
“မနေ့က အိမ်အောက်မှာ သူ့ရဲ့ အသိမိတ်ဆွေတွေနဲ့ စကားထိုင်ပြောနေကြတာပါ။ အဲ့ဒီမှာ လူလေးယောက် ရောက်လာပြီးတော့ သေနတ်နဲ့ ပစ်လိုက်တာ။ အဲ့ဒီမှာ နှစ်ယောက် အထဲကို ဝင်လာတယ်။ အုပ်ချုပ်ရေးမှူးကို ရွေးပစ်လိုက်တာ။ ဝင်လာပြီးတော့ အုပ်ချုပ်ရေးမှူးကို သေနတ်လေးချက်ပစ်လိုက်တာပါ” လို့ပြောပါတယ်။
ကျေးရွာအုပ်ချုပ်ရေးမှူး ဦးမောင်ကျော်ဟာ လည်ပင်းမှာ သေနတ်ဒဏ်ရာ နှစ်ချက်နဲ့ ဘယ်ညာ ခါးနှစ်ဖက်မှာ ဒဏ်ရာတွေနဲ့ နေရာမှာပဲ သေဆုံးခဲ့တာလို့ ကျေးရွာသား တွေကပြောပါတယ်။
အုပ်ချုပ်ရေးမှူးရဲ့အလောင်းကိုတော့ မင်းပြားမြို့နယ် ပြည်သူ့ဆေးရုံကို ပို့ဆောင်ထား ပါတယ်။
ကျောက်ခေါက်ရွာ အုပ်ချုပ်ရေးမှူး သေဆုံးမှုနဲ့ပတ်သက်လို့ မင်းပြားရဲစခန်းနဲ့ အာဏာကိုင်တွေကို ဆက်သွယ်မေးမြန်းလို့ မရသေးပါဘူး။
ရခိုင်ပြည်နယ်ထဲမှာ အရပ်သားတွေကို ပစ်မှတ်ထားပြီး သေနတ်နဲ့ ပစ်သတ်လို့ သေဆုံးခဲ့သူ ၃ ဦး ရှိပြီဖြစ်ပါတယ်။
သတင်း-ဝဏ္ဏခွာညို
