မြိတ်မြို့၊ ဆိပ်ငယ်ဈေး အဆင့်မြင့်တည်ဆောက်မည့်အစီအစဉ် ဈေးသူ/သားများ ကန့်ကွက်
1.9K
မြိတ်မြို့ ဆိပ်ငယ်ဈေးအား စည်ပင်သာယာရေးမှ ဦးဆာင်ကာ အဆင့်မြင့်ဈေးအဖြစ် တည်ဆောက်ပေးမယ့် အစီအစဉ်ကို ဈေးသူ/သားတွေက သဘောမတူဘူးလို့ သိရပါတယ်။
မြိတ်မြို့နယ်စည်ပင်သာယာရေးအဖွဲ့ပိုင် ဆိပ်ငယ်ဈေးကြီးကို အဆင့်မြင့်ဈေးအဖြစ် ပြန်လည်တည်ဆောက်ပေးဖို့ အစီအစဉ်နဲ့ပတ်သက်ပြီး စည်ပင်က ဖေဖော်ဝါရီ ၃ ရက်နေ့က မြိ်တ်မြို့ ပုလဲရတနာခန်းမမှာ ဈေးသူ/သား တွေနဲ့ တွေ့ဆုံခဲ့ကြပါတယ်။
“မြိတ်မြို့မှာ စည်ပင်သာယာရေးအဖွဲ့ပိုင် ဈေးကြီး ၆ ဈေးနဲ့ ပျံကျဈေး ၁၅ ဈေးရှိပါတယ်။ ဆိပ်ငယ်ဈေးကြီးမှာ ဆိုင်ခန်းပေါင်း ၁၅၀၃ ခန်းရှိပါတယ်။ ကျနော်တို့သွားမယ့် ပုံစံက ဈေးသူ/သား များရဲ့ဆန္ဒ သဘောထားနှင့်သွားမှာပါ။ သဘောမတူရင် ကျနော်တို့ ရှေ့ဆက်ဆောင်ရွက်ဖို့ မရှိပါဘူး” လို့ မြိတ်မြို့နယ်စည်ပင်သာယာရေးကော်မတီဥက္ကဋ္ဌ ဦးမြတ်ကိုကိုက ပြောပါတယ်။
ဆန္ဒသဘောထားကောက်ယူပြီး မဲပေးမယ့်အစီအစဉ်ကိုလည်း ဈေးသူ/သားတွေက ငြင်းဆန်ခဲ့ပြီး ဈေးကိုသာ ပြန်လည်မွမ်းမံမယ့်အစီအစဉ်ကို လက်ညှိုးထောင် မဲခွဲခဲ့ကြကြောင်း သိရပါတယ်။
“ဈေးကြီးကို အဆင့်မြင့်တင်ခြင်း ဆိုတဲ့စကားတခွန်းအပေါ်မှာ နှစ်ထပ်ဆောက်မလား၊ သုံးထပ်ဆောက်မလား ဆိုတဲ့အပေါ် ဈေးသူ/သားတွေ စိုးရိမ်စိတ်ဖြစ်နေတယ်။ အဆင့်မြှင့်တင်ခြင်း အသုံးအနှုန်းမဟုတ်ဘဲ ပြန်လည်မွန်းမံခြင်းလို့ သုံးလိုက်ရင် ဈေးသူ/ဈေးသားတွေရဲ့ စိုးရိမ်စိတ်တွေ ပြေလျှော့နိုင်လိမ့်မယ်" လို့ ဆိုင်ခန်းပိုင်ရှင် ဦးခင်မောင်သန်းက ပြောပါတယ်။
အင်္ဂလိပ်ကိုလိုနီခေတ်ကတည်းက စတင်တည်ရှိခဲ့တဲ့ ဆိပ်ငယ်ဈေးကြီးဟာ မြို့လယ်ခေါင်မှာ တည်ရှိပေမယ့် ဈေးအမိုးတွေပေါက်ပြဲတာ၊ လေ၀င်လေထွက် မကောင်းတာ၊ တထပ်တည်းသာ တည်ရှိနေတဲ့အတွက် စည်ပင်က ပြန်လည်ပြုပြင်ဖို့ စီစဉ်ပေးပေမယ့် ဈေးသူ/သားတွေက သဘောတူညီခြင်းမရှိခဲ့ပါဘူး။
ဈေးသူ/သားတွေက ဈေးအမိုးလဲပေးတာ၊ အိမ်သာပြုပြင်ပေးတာ၊ မီးဘေးအန္တရာယ် ကာကွယ်ပေးတာနဲ့ ရေစီးရေလာ ကောင်းမွန်အောင် လုပ်ဆောင်ပေးဖို့သာ တောင်းဆိုခဲ့ပြီး အဆင့်မီတည်ဆောက်တာကို သဘောမတူခဲ့ကြောင်း သိရပါတယ်။
မြတ်ထွဋ် (မြိတ်)
