တရုတ်ဇနီးမယားအဖြစ် လက်ထပ်ရန်စေခိုင်းခဲ့သူ ၂ ဦးကို လူကုန်ကူးမှုဖြင့်ဖမ်းဆီး
2.7K
မန္တလေးတိုင်းဒေသကြီး၊ ပြင်ဦးလွင်မြို့မှာနေတဲ့ မြန်မာအမျိုးသမီးတဦးကို တရုတ် ဇနီးမယားအဖြစ် လက်ထပ်ပေါင်းသင်းဖို့စေခိုင်းခဲ့သူ နှစ်ဦးကို ဇန်နဝါရီ ၂၁ ရက်က လူကုန်ကူးမှု တားဆီးရေး ရဲတပ်ဖွဲ့က ဖမ်းဆီးလိုက်ပါတယ်။
အသက် ၂၀ အရွယ် မြန်မာအမျိုးသမီးငယ်ကို တရုတ်နိုင်ငံသား ချိုင်ချွင်လိန်က ပြင်ဦးလွင်မြို့မှာ တည်းခိုပြီး တရုတ်နိုင်ငံကို ခေါ်ဆောင်ဖို့ဆောင်ရွက်နေတာကို လူကုန်ကူးမှု တားဆီးရေးက တာဝန်ရှိသူတွေက မသင်္ကာဖြစ်ပြီး အုပ်ချုပ်ရေးအဖွဲ့ဝင်တွေနဲ့ ရပ်ကွက်အုပ်ချုပ်ရေးမှူးရုံးကို ခေါ်ဆောင်စစ်ဆေးခဲ့ရာကနေ လူကုန်ကူးမှု ပေါ်ပေါက်ခဲ့တာပါ။
ပြီးခဲ့တဲ့ ၁၀ ရက်လောက် ပြင်ဦးလွင်မြို့ ဈေးလေးအနီးက လီလီအထည်ဆိုင်ပိုင်ရှင် ဒေါ်လီလီဟာ လူကုန်ကူးခံရတဲ့ အမျိုးသမီးငယ်ထံကို ရောက်ရှိလာကာ တရုတ်နိုင်ငံသားတဦးနဲ့ လက်ထပ်ပေါင်းသင်းဖို့ တရုတ်ကိုယူပါက ငွေကြေးပြည့်စုံ ကြွယ်ဝချမ်းသာမှာဖြစ်ကြောင်း စည်းရုံးပြောဆိုပြီး တရုတ်နိုင်ငံသားရှိတဲ့ ကန်တော်ကြီးကို ခေါ်ဆောင်သွားခဲ့ပါတယ်။
နောက်တရက်မှာ ဒေါ်လီလီနဲ့ ချိုင်ချွင်လိန်တို့နှစ်ဦးဟာ အမျိုးသမီးငယ်ရဲ့ နေအိမ်ကို ရောက်လာခဲ့ကာ လက်ထပ်ဖို့ကိစ္စတွေပြောဆိုခဲ့ပြီး အမျိုးသမီးငယ်ကို ဒေါ်လီလီ၊ ချိုင်ချွင်လိန် တို့နဲ့အတူ မန္တလေးမြို့ကို နှစ်ညအိပ် အလည်ခေါ်ဆောင်သွားခဲ့ပါတယ်။
လူကုန်ကူးခံရတဲ့ အမျိုးသမီးငယ် နေအိမ်ကိုပြန်လာခဲ့ရာ အစ်မဖြစ်သူ မဖြူဝင်းက တရုတ်နိုင်ငံသားနဲ့ သဘောမတူကြောင်း ပြောဆိုခဲ့တဲ့အတွက် ချိုင်ချွင်လိန်ကို လက်မထပ်နိုင် ကြောင်း ငြင်းဆိုခဲ့ပါတယ်။ ဒါပေမယ့် ချိုင်ချွင်လိန်ဟာ နေအိမ်ကို မကြာခဏလာရောက်ပြီး ညီမဖြစ်သူကို ခေါ်ဆောင်နေတာကြောင့် မဖြူဝင်းမှ ရပ်ကွက်အုပ်ချုပ်ရေးမှူးရုံးမှာ တိုင်ကြားခဲ့တာ ဖြစ်ပါတယ်။
ပြင်စာရဲစခန်းက စခန်းမှူး ဝင်းဗိုလ်က “လူကုန်ကူးဖို့လုပ်တဲ့ ဒေါ်လီလီနဲ့ တရုတ်နိုင်ငံသားကို တော့ ချက်ချင်းဖမ်းဆီးမိခဲ့တယ်။ ကြားထဲမှာတော့ တရုတ်နိုင်ငံသားကို ကူညီပေးခဲ့တဲ့မန္တလေးက လူကတော့ မမိသေးဘူး” ပြောပါတယ်။
တရုတ်နိုင်ငံသား ချိုင်ချွင်လိန်ဟာ မန္တလေးမြို့မှာနေထိုင်တဲ့ သူငယ်ချင်းဖြစ်သူ ရှီကျားကျွင့် နဲ့ ဒေါ်လီလီတို့ကို ချိတ်ဆက်ပေးခဲ့ပြီး မြန်မာနိုင်ငံအတွင်းမှာ နေထိုင်စားသောက်စရိတ်တွေကို ရှီရားကျွင့်က ကုန်ကျစရိတ်ကျခံစေပြီး မိန်းကလေးတွေကို ချဉ်းကပ်ဖို့ ဖုန်းနဲ့လမ်းညွှန်ပေးခဲ့ကာ မိန်းမရပြီး တရုတ်နိုင်ငံသို့ပြန်ရောက်ခဲ့ရင် ချိုင်ချွင်လိန်းက ရှီကျားကျင့်ကို တရုတ် ယွမ်ငွေ ၆၀၀၀ဝ ပေးရမှာလည်း ဖြစ်ပါတယ်။
တရုတ်ဇနီးမယားအဖြစ် လက်ထပ်ပေါင်းသင်းဖို့ ဆောင်ရွက်သူတွေဖြစ်တဲ့ ဒေါ်လီလီ ချိုင်ချွင်လိန်နဲ့အတူ ရှီကျားကျွင့်တို့ကို ပြင်စာနယ်မြေရဲစခန်းက (ပ)၁၆/၂၀၁၉ လူကုန်ကူးမှု တားဆီးနှိမ်နှင်းရေး ဥပဒေပုဒ်မ- ၂၄/၃၂ နဲ့အမှုဖွင့်လှစ်ထားပြီး ရှီရားကျွင့်ကို ဖမ်းဆီးရမိနိုင်ရေး ဆောင်ရွက်နေပါတယ်။
