ဇွဲကပင်တောင်တက်ကားလမ်း ပတ်ဝန်းကျင်မထိခိုက်အောင် ခွင့်ပြုချက်ရယူရန်လိုအပ်
DVB
·
January 11, 2019
ဇွဲကပင်တောင်တက်ကားလမ်း ရေရှည်တည်မြဲဖို့နဲ့ ပတ်ဝန်းကျင်ထိခိုက်မှုမရှိအောင် ၀န်ကြီးဌာနရဲ့ ခွင့်ပြုချက်ရယူဖို့ လိုအပ်တယ်လို့ ကရင်ပြည်နယ် သဘာဝပတ်ဝန်းကျင် ထိန်းသိမ်းရေး၊ သစ်တောသတ္တုနှင့် လမ်းပန်းဆက်သွယ်ရေးဝန်ကြီး ဦးစောပြည်သာက ဒီဗွီဘီကို ပြောပါတယ်။
ဝန်ကြီး ဦးစောပြည်သာက “ခွင့်ပြုချက်ရှိထားရင် ရေရှည်လည်း ကိုယ့်လုပ်ငန်းတည်မြဲတာပေါ့။ နောက်ပြီး ပတ်ဝန်းကျင်ထိခိုက်မှုတို့ စနစ်တကျဖြစ်တာပေါ့။ သူတို့ကို ကျနော်တို့ ပြောတဲအတိုင်းပေါ့နော်။ ခွင့်ပြုချက်ရအောင် လိုအပ်ချက်တွေကို စနစ် တကျဆောင်ရွက်ဖို့ကိုလည်း သူတို့ကို တွန်းအားပေးချင်တယ်။ ဆက်လုပ်ချင်တယ်ဆိုရင် ခွင့်ပြုချက်တော့ယူဖို့လိုကို လိုအပ်တယ်”လို့ ပြောပါတယ်။
ဘားအံမြို့၊ ဇွဲကပင်တောင်ဆရာတော်၊ ဘဒ္ဒန္ဒ က၀ိဓဇ က“ဖွံ့ဖြိုးတိုးတက်အောင်လုပ်တာကို အားလုံးပဲဝိုင်းဝန်းကူညီပံ့ပိုးပါ။ မပံ့ပိုးပဲ အနှောက်အယှက်ပြုကျရင်တော့ ဘယ်သူကြောင့် မဖြစ်သလဲဆိုတာ နောက်အကောင်အထည် ပေါ်လာမှာပါ။ ဒါကြောင့်မို့ ဦးဇင်းတို့ဆန္ဒကတော့ ဒီကိစ္စနှစ်ရပ် မဖြစ်မနေလုပ်ကိုလုပ်မယ်လို့ စိတ်ဆုံးဖြတ်ချက် အပြီးချပြီးသား”လို့ မိန့်ကြားပါတယ်။
ဇွဲကပင်တောင်တက်ကားလမ်းနဲ့ ကောင်ကင်းကေဘယ်ကား စီမံကိန်းဟာ ကရင်ပြည်နယ် ကျက်သရေရှိလာဖို့နဲ့ သာသနာတော်ကြီး ဖွံဖြိုးတိုးတက်လာဖို့ ရည်ရွယ်ချက်တွေနဲ့ ဆောင်ရွက်နေတာလို့ တာဝန်ရှိသူက ပြောပါတယ်။
တောင်တက်ကားလမ်းကို မြိုင်ကြီးငူဆရာတော်ကြီး လမ်းညွှန်မိန့်ကြားချက်နဲ့ ဇွဲကပင်တောင်အရှေ့ဖက်ခြမ်း၊ ဗျိုင်းတောင်ကျေးရွာတောင်ခြေကနေ အရှည် ၅ မိုင်ခန့်ရှိတဲ့လမ်းကို၂၀၁၇ မတ်လ၂၂ရက်က စတင်ပြီး လမ်းအူကြောင်းရှာဖွေ ဖောက်လုပ်ခဲ့ရာ အခုအခါ ၃ မိုင်ခန့်ဖောက်လုပ်ပြီးစီးနေပြီဖြစ်ပြီး၊ ကျန်လမ်းပိုင်းကို ဧပြီလအတွင်းပြီးစီးအောင် ဖောက်လုပ်သွားမှာပါ။
အလားတူ ဇွဲကပင်အနောက်ဘက်ခြမ်း တော်ပုံကျေးရွာကနေ ကောင်းကင် ကေဘယ်ကား စီမံကိန်းကို ဒေါ်လာ ၁၂ သန်းကျော် အကုန်အကျခံတည်ဆောက်နေပြီး ကရင်ပြည်နယ်နေ့ အခမ်းအနားအမှီ ၂၀၁၉ နိုဝင်ဘာမှာ ဖွင့်လှစ်နိုင်မယ်လို့ ဆရာတော်ကြီးက မိန့်ကြားပါတယ်။
ဇွဲကပင်တောင်တက်ကားလမ်းကို အများစုပေါင်းလှူဒါန်းငွေနဲ့ ဆရာတော်ကြီးတွေကိုယ်တိုင် ဦးစီးဖောက်လုပ်တာပါ။
ကေဘယ်ကားစီမံကိန်းကို ကမ္ဘာ့သာသနာပြု ဆရာတော်ကြီး ၄ ပါးက ကြီးမှူးဦးဆောင်ပြီး ချစ်လင်းမြိုင်တိုယိုတာကုမ္ပဏီက ဒေါ်လာ ၁၂ သန်းကျော် ရင်းနှီးမြှုပ်နှံကာ မြန်မာ့ဇာတိမြေ အများနဲ့သက်ဆိုင်တဲ့ကုမ္ပဏီက တာဝန်ယူတည်ဆောက်နေတာဖြစ်တဲ့အတွက် ချစ်လင်းမြိုင်ကုမ္ပဏီက အကျိုးအမြတ် ၇၅ ရာခိုင်နှုန်း၊ ကုမ္ပဏီက နှစ် ၅၀ လုပ်ပိုင်ခွင့်ရရှိထားပြီး၊ ကျန် ၂၅ ရာခိုင်နှုန်းကို ဇွဲကပင်မြေဖွံ့ဖြိုးရေးအတွက် ရရှိမှာပါ။
ရဲမင်းခေါင်