တအောင်းနှင့်ကိုးကန့်တပ်ဖွဲ့ ဖမ်းသွားသည့် ရွာလူကြီးများ လွတ်မြောက်ရေး တပ်မတော်ကူညီမည်

တအာင်းအမျိုးသားလွတ်မြောက်ရေးတပ်မတော် (TNLA)နဲ့ ကိုးကန့်တပ်ဖွဲ့ MNDAA တပ်ဖွဲ့တို့က ဖမ်းထားတဲ့ တိုင်းရင်းသားတွေ လွတ်မြောက်ရေးအတွက် တပ်မတော်အနေနဲ့ လိုအပ်သလိုဆောင်ရွက်သွားမယ်လို့ ကာကွယ်ရေးဦးစီးချုပ်ရုံးက ထုတ်ပြန်ပါတယ်။ ရှမ်းပြည်နယ်မြောက်ပိုင်း၊ ကွမ်းလုံမြို့နယ်ထဲမှာ  MNDAA ကိုးကန့်တပ်ဖွဲ့က ရပ်ရွာလူကြီး ၁၀ ဦးကို ဖမ်းဆီးခေါ်ဆောင်သွားပြီး တပ်သားသစ်စုဆောင်းနေလို့  ရာနဲ့ချီတဲ့ မြောင်ဇီတိုင်းရင်းသားတွေ ထွက်ပြေးတိမ်းရှောင်နေရကြရတာဖြစ်ပါတယ်။ တပ်မတော်အနေနဲ့ စစ်ရေးလှုပ်ရှားမှုတွေ ရပ်ဆိုင်းခဲ့ပေမယ့် MNDAA၊ TNLA အဖွဲ့တွေက ဒေသခံတိုင်းရင်းသားတွေအပေါ် အနိုင်ကျင့်တာ၊ အစိုးရရဲ့ အုပ်ချုပ်မှုယန္တရားကို နှောင့်ယှက်တာ၊ ပြည်သူလူထုရဲ့ အသက်အိုးအိမ်စည်းစိမ် အကျိုးစီးပွားကို ထိခိုက်အောင်လုပ်လာလို့   တပ်မတော် အနေနဲ့ ဖမ်းဆီးခံရသူတွေ ပြန်လည်လွတ်မြောက်ဖို့ လိုအပ်သလို ဆောင်ရွက်သွားမယ်လို့ တပ်မတော်သတင်းမှာ ဖော်ပြပါတယ်။ MNDAA တပ်ဖွဲ့ဝင်တွေဟာ  ဇန်နဝါရီ ၆ ရက်မှာ ရှမ်းပြည်နယ် (မြောက်ပိုင်း)၊ ကွမ်းလုံမြို့နယ်ထဲက ပန်ဟုန်း၊ တာရှောက်တီး၊ ဖတ်တူနဲ့ ကျန်ကြားကျိုင်းကျေးရွာတွေကို သွားရောက်ပြီး အုပ်ချုပ်ရေးမှူးနေအိမ်တွေမှာ လူသစ်စုဆောင်းပေးဖို့ အစည်းအဝေးပြုလုပ်ခဲ့ပြီး တာရှောက်တီးကျေးရွာက ဦးဇီသွေးလျှံ၊ ဦးဇီရှောက်ကျုံး၊ ဦးကျန်ရှောက်ယွမ်နဲ့ ဦးဝေလောက်တယ်၊ ကျန်ကြားကျိုင်း ကျေးရွာက ဦးရှန်ဖူးနဲ့  ဦးစီတို့ကို ဖမ်းဆီး ခေါ်ဆောင်သွားခဲ့တယ်လို့ ဆိုပါတယ်။ MNDAA အဖွဲ့ရဲ့ တပ်သားသစ်စုဆောင်းခံရမှာ စိုရိမ်းပြီး ကျန်ကြားကျိုင်း ကျေးရွာနဲ့ ပတ်ဝန်းကျင် ကျေးရွာတွေက အိမ်ထောင်စု ၁၆ဝ စု၊ အမျိုးသား ၂ဝဝ ဦး၊ အမျိုးသမီး ၂၅၅ ဦး၊ စုစုပေါင်း ၄၅၅ ဦးတို့ဟာ ကွမ်းလုံမြို့နယ်၊ ဟိုလီကျေးရွာစာကြည့်တိုက်နဲ့ ကျေးရွာ အုပ်ချုပ်ရေးမှူးရုံးတို့ကို  ဇန်နဝါရီ ၇ ရက်မှာ ထွက်ပြေး တိမ်းရှောင်ခဲ့ရပါတယ်။ အလားတူ TNLA အဖွဲ့အင်အား ၅ဝ လောက်ကလည်း  ဇန်နဝါရီ ၄ ရက် မွန်းလွဲပိုင်းမှာ နမ့်ခမ်းမြို့နယ်၊ တာကွန့်ကျေးရွာနဲ့ ပန်မောင်း ကျေးရွာတွေကို ဝင်ရောက်ခဲ့ပြီး ကျေးရွာသား ၁၈ဦး ကို ဘိန်းစိုက်ပျိုးတာ အကြောင်းပြပြီး ဖမ်းဆီးခေါ်ဆောင်သွားခဲ့တယ်လို့ တပ်မတော် သတင်းမှာ ဖော်ပြပါတယ်။ အရှေ့မြောက်တိုင်းစစ်ဌာနချုပ်နယ်မြေ အပါအ၀င် စစ်တိုင်း ၅တိုင်းမှာ စစ်ရေးဆိုင်ရာ လှုပ်ရှားမှုအားလုံးကို ရပ်ဆိုင်းကြောင်း တပ်မတော်ကာကွယ်ရေး ဦးစီးချုပ်ရုံးက ပြီးခဲ့တဲ့ ဒီဇင်ဘာ ၂၁ ရက်မှာ ကြေညာခဲ့ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up